އިންޓަނޭޝަނަލް މޯލްޑިވްސް ޓްރެވަލް މާކެޓް (އައިއެމްޓީއެމް) 2021ގައި ރަޖިސްޓަރީވާން ހުޅުވާލައިފި އެވެ.

އައިއެމްޓީއެމް 2021 މިފަހަރު ބާއްވާނީ ވަރޗުއަލްކޮށެވެ. މިއީ ރާއްޖޭގައި ކުރިއަށް ގެންދާ އިންޓަނޭޝަނަލް ޓްރެވަލް އެންޑް ޓްރޭޑް ފެއަރއެކެވެ.

ބީ2ބީ ހަރަކާތް މިފަހަރު ބާއްވަން ހަމަޖެހިފައިވަނީ، 21 ސެޕްޓެމްބަރުން 23 ސެޕްޓެމްބަރަށް، އައިއެމްޓީއެމްގެ ވަރޗުއަލް ޕްލެޓްފޯމް "އައިއެމްޓީއެމް އެއަރ" މެދުވެރިކޮށެވެ. ކޮވިޑް19ގެ ހާލަތާ ގުޅިގެން މިދިޔަ އަހަރުވެސް އައިއެމްޓީއެމް ފެއާ ކުރިއަށް ގެންދިޔައީ ވާޗުއަލް ކޮށެވެ.

ޓޫރިޒަމް ދާއިރާގެ ވިޔަފާރިތަކާއި އެ ދާއިރާ އާއި ގުޅުންހުރި ވިޔަފާރިތަކަށް އަމާޒުކޮށްގެން ކުރިއަށްގެންދާ މި ފެއަރ ބާއްވާ މިއީ ހަތަރުވަނަ އަހަރެވެ. އައިއެމްޓީއެމް ލަފާކުރާ ގޮތުގައި މިއަހަރުގެ ހަރަކާތުގައި 20 ގައުމަކުން، 100 އަށް ވުރެ ގިނަ އިންޓަނޭޝަނަލް ބަޔަރސް ބައިވެރިވާނެއެވެ. އަދި 400 އަށްވުރެ ގިނަ ޓްރޭޑް ވިޒިޓަރުން މި އިވެންޓަށް ޒިޔާރަތްކުރާނެއެވެ.

މިއީ ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތަކަށް، ރާއްޖޭގައި ތިބެގެން ވިޔަފާރި ޕްރޮމޯޓުކުރުމުގެ ފުރުސަތު ފަހިކޮށްދޭ ޕްލެޓްފޯމެކެވެ.

މި ފަހަރުގެ ފެއަރގެ އިންޓަނޭޝަނަލް ބަޔަރސް އަށް ހާއްސަ އޮފަރއެއްގެ ގޮތުން، ފުރަތަމަ ރަޖިސްޓަރީވާ 15 ފަރާތަކަށް، ހޯސްޓެޑް ބަޔަރސްގެ ގޮތުގައި ފެއަރގައި ބައިވެރިވުމުގެ ފުރުސަތު ދޭނެ ކަމަށް އެފަރާތުން މައުލޫމާތު ދެއެވެ. އައިއެމްޓީއެމްގައި ރަޖިސްޓަރީވުމުގެ ފުރުސަތު މިހާރު ހުޅުވާލާފައިވާ، އިރު ސިންގަލް ޔޫޒަރ ރެޖިސްޓްރޭޝަނުގެ އަގަކީ 56 ޑޮލަރެވެ. އަދި މަލްޓި ޔޫޒަރ ރެޖިސްޓްރޭޝަނުގެ އަގަކީ 112 ޑޮލަރެވެ. މިއީ އައިއެމްޓީއެމް ބާއްވާ 4 ވަނަ އަހަރެވެ.