އިޓަލީގެ ސްކޮޑުގައި ވެރާޓީ އާއި ސެންސީ ހިމަނައިފި

ކުރިއަށް އޮތް ޔޫރޯ ފުޓްބޯޅަ މުބާރާތަށް އިޓަލީން އެކުލަވާލި ސްކޮޑުގައި އަނިޔާވެފައިވާ ދެ މިޑްފީލްޑަރުން ކަމަށްވާ މާކޯ ވެރާޓީ އާއި ސްޓެފާނޯ ސެންސީ ހިމަނައިފިއެވެ.

އަންގާރަ ދުވަހުގެރޭ ފައިނަލްކުރި 26 ކުޅުންތެރިންގެ ސްކޮޑުގައި ޕީއެސްޖީއަށް ކުޅެމުން އަންނަ އުމުރުން 28 އަހަރުގެ ވެރާޓީ ހިމަނަން ރޮބާޓޯ މަންޗިނީ ނިންމިއިރު، މިދިޔަ މަހުގެ ތެރޭގައި އޭނާގެ ކަކުލަށް ވަނީ އަނިޔާވެފައެވެ. އަދި އެ އަނިޔާއިން އެއްކޮށް ރަނގަޅުވުމަށް މަދުވެގެން ހަ ހަފުތާ ނަގާނެ ކަމަށް މީގެ ކުރިން ވަނީ ރިޕޯޓުކޮށްފައެވެ. އެހެންކަމުން އިޓަލީގެ ސްކޮޑުގައި ވެރާޓީ ހިމެނި ނަމަވެސް، ޔޫރޯގެ ގްރޫޕް ސްޓޭޖު މެޗުތައް އޭނާއަށް ގެއްލޭނެ ކަމަށް ރިޕޯޓުތައް ބުނެއެވެ.

ދެން ސްކޮޑުގައި ހިމެނި އިންޓަ މިލާނަށް ކުޅެމުން އަންނަ އުމުރުން 25 އަހަރުގެ ސެންސީގެ ފައިގެ ފަލަމަސްގަނޑަށް ވަނީ އަނިޔާވެފައެވެ. އޭނާއަށް އަނިޔާވީ އިޓާލިއަން ލީގުގެ ފަހު މެޗުގައި މިދިޔަ މެއި މަހުގެ 23 ވަނަ ދުވަހު އުދިނޭޒީ އަތުން މިލާން މޮޅުވި މެޗުގެ ތެރެއިންނެވެ.

އަނިޔާގައި ތިބި ދެ ކުޅުންތެރިއަކު ސްކޮޑުގައި ހިމަނަށް މަންޗިނީ ނިންމިއިރު، އޭނާ ވަނީ މި ފަހަރުގެ ސްކޮޑުގައި ތަޖުރިބާކާރު ދެ ޑިފެންޑަރުން ކަމަށްވާ ޖިއޯޖިއޯ ކިއެލީނީ އާއި ލެއޮނާޑޯ ބޮނޫޗީ ހިމަނާފައެވެ. ރިޕޯޓުތައް ބުނާ ގޮތުން ޔޫރޯއަށް ފަހު ފުޓްބޯޅަ ކުޅުން ހުއްޓާލަން އުމުރުން 36 އަހަރުގެ ކިއެލީނީ ވަނީ ނިންމާފައެވެ.

އުމުރުން 56 އަހަރުގެ މަންޗިނީގެ އިރުޝާދުގެ ދަށުން ޔޫރޯއާ އިޓަލީ ކުރިމަތިލާއިރު، އޭނާ އިޓަލީގެ ކޯޗުގެ މަގާމާ ހަވާލުވީ 2018 ވަނަ އަހަރުއެވެ. އެފަހަރު އެ މަގާމު ހުސްވީ 1958 ވަނަ އަހަރުގެ ފަހުން ފުރަތަމަ ފަހަރަށް އެ ގައުމަށް ފީފާ ވޯލްޑް ކަޕުގެ ޖާގައެއް ގެއްލުމާ ގުޅިގެން، އޭރު ކޯޗުގެ މަގާމުގައި ހުރި ޖިއަން ޕިއެރޯ ވެންޗޫރާ މަގާމުން ވަކިކުރުމުންނެވެ. އަދި ދާދި ފަހުން މަންޗިނީ ވަނީ އިޓަލީގެ އެއްބަސްވުން 2026 ވަނަ އަހަރުގެ ޖޫން މަހުގެ ނިޔަލަށް އާކޮށްފައެވެ.

މި މަހުގެ 11 ވަނަ ދުވަހު ޔޫރޯ ފަށާއިރު، އެ މުބާރާތުގައި އިޓަލީ ހިމެނުނީ ގުރޫޕް އޭ ގައެވެ. އެ ގުރޫޕުގައި ދެން ހިމެނެނީ ސްވިޓްޒަލެންޑް، ތުރުކީ އަދި ވޭލްސްއެވެ. މި ފަހަރުގެ ޔޫރޯ ފަށާ މެޗުގައި އިޓަލީ ކުޅޭއިރު، އެ މެޗުގައި އެ ގައުމު ނުކުންނާނީ ތުރުކީއާ ދެކޮޅަށެވެ.