ޒުވާން ޑިފެންޑަރު ގާސިއާ ބާސާއަށް
1 ޖޫން 2021 | އަންގާރަ 10:51ގާސިއާގެ އެއްބަސްވުން އުވާލަން 400 މިލިޔަން ޔޫރޯ ދައްކަން ޖެހޭ
ސިޓީއަށް ކުޅެމުން އަންނަ ސްޕެއިނުގެ ޒުވާން ޑިފެންޑަރު އެރިކް ގާސިއާ
މެންޗެސްޓާ ސިޓީއަށް ކުޅެމުން އަންނަ ސްޕެއިނުގެ ޒުވާން ޑިފެންޑަރު އެރިކް ގާސިއާ ބާސެލޯނާއަށް ބަދަލުވާން އެއްބަސްވެއްޖެއެވެ.
އަންގާރަ ދުވަހުގެ ވަގުތެއްގައި ބާސާއިން ވަނީ ގާސިއާއާއެކު އެއްބަސްވުމަކަށް އައިސްފައިވާކަން އިއުލާން ކޮށްފައެވެ. އެކަމަކު އޭނާ ބާސާގެ އެއްބަސްވުމުގައި ސޮއި ކުރާނީ މި މަހުގެ ނިޔަލަށް ސިޓީއާއެކު ހަދާފައި އޮތް އެއްބަސްވުމުގެ މުއްދަތު ހަމަވުމުންނެވެ.
ބާސާއިން ހާމަކޮށްފައިވާ ގޮތުން ގާސިއާ ބާސާއާއެކު ފަސް އަހަރުގެ އެއްބަސްވުމެއްގައި ސޮއިކުރާނެއެވެ. އެހެންކަމުން 2026 ވަނަ އަހަރުގެ ޖޫން މަހުގެ ނިޔަލަށް އޭނާ ބާސާގައި މަޑުކުރާނެއެވެ. އަދި އެ އެއްބަސްވުން އުވާލަން އެހެން ކުލަބަކުން 400 މިލިޔަން ޔޫރޯ ދައްކަން ޖެހޭނެ ކަމަށްވެސް ބާސާއިން ވަނީ ބުނެފައެވެ.
ކުރިއަށް އޮތް ސީޒަނަށް ގާސިއާ ބާސާއަށް ބަދަލުވިއިރު، އޭނާ ސިޓީއާ ގުޅުނީ 2017 ވަނަ އަހަރެވެ. އެކަމަކު އޭގެ ކުރިން ގާސިއާ ވަނީ ބާސާގެ މަޝްހޫރު ޔޫތު އެކެޑަމީ ކަމަށްވާ ލަ މާސިއާއިން ތަމްރީނު ހަދާފައެވެ. ސިޓީގައި ގާސިއާ ތިން ސީޒަން ހޭދަކުރި ނަމަވެސް، އޭނާ މިހާތަނަށް ސިޓީގެ ސީނިއާ ޓީމަށް ކުޅެދީފައިވަނީ އެންމެ 35 މެޗެވެ. އެކަމަކު އޭނާ ވަނީ ސިޓީ އާއެކު އިނގިރޭސި ޕްރިމިއާ ލީގާއި، އެފްއޭ ކަޕުގެ އިތުރުން ކޮމިއުނިޓީ ޝީލްޑް ކާމިޔާބުކޮށްފައެވެ. އަދި ސްޕެއިނުގެ ސީނިއާ ޓީމުންވެސް ގާސިއާ ފުރުސަތު ހޯދާފައިވާއިރު، އޭނާ ވަނީ ގައުމީ ޓީމަށް މިހާތަނަށް ހަތް މެޗު ކުޅެދީފައެވެ.
ސިޓީގެ ޒުވާން ޑިފެންޑަރު ގާސިއާ ބާސާއަށް ބަދަލުވިއިރު، ދާދި ފަހުން ބާސާއިން ވަނީ ދެ އަހަރުގެ އެއްބަސްވުމެއްގެ ދަށުން ސިޓީއަށް ކުޅެމުން އައި އާޖެންޓީނާގެ ތަޖުރިބާކާރު ފޯވާޑް ސާޖިއޯ އަގުއޭރޯގެ ސޮއިވެސް ހޯދާފައެވެ.
