ރިސޯޓު ތަރައްގީކުރުމަށް ހުޅުވާލި 16 ރަށަށް ބިޑްކުރުމުގެ މުއްދަތު އިތުރުކޮށްފި
މިގޮތަށް ނިންމީ ކޮވިޑް-19ގެ ސަބަބުން އިންވެސްޓަރުންނަށް ދިމާވެފައިވާ ދަތުރުފަތުރު ކުރުމުގެ ގޮންޖެހުންތަކުގެ ސަބަބުން
ތަރައްގީކުރަން ހުޅުވާލާފައިވަނީ ހއ. އަތޮޅުގެ ދެރަށް ހދ. އަތޮޅުގެ އެއް ރަށް، މ. އަތޮޅުގެ ދެރަށް، ތ. އަތޮޅުގެ ތިން ރަށް، ލ. އަތޮޅުގެ ތިން ރަށް ގއ. ގެ ދެރަށް އަދި ގދ. ގެ ތިން ރަށުގައި
16 ރަށެއްގައި ރިސޯޓް ތަރައްގީކޮށް ހިންގާނެ ފަރާތެއް ހޯދުމަށް ހުޅުވާލާފައިވާ ބީލަމަށް ބިޑްހުށަހެޅުމުގެ މުއްދަތު ޓޫރިޒަމް މިނިސްޓްރީން އިތުރުކޮށްފިއެވެ.
ޓޫރިޒަމް މިނިސްޓްރީން ނެރުނު ބަޔާނެއްގައި ބުނެފައި ވަނީ މިރަށްތަކަށް ބިޑް ހުށަހެޅުމުގެ ސުންގަޑި ޖޫން 24ގެ ހެނދުނު 10:00ށް އިތުރުކޮށްދީފައިވާ ކަމަށާއި ޖޫން 20ގެ ނިޔަލަށް ބީލަން ފޮތް ލިބޭނެ ކަމަށެވެ. މިގޮތަށް ނިންމީ ކޮވިޑް-19ގެ ސަބަބުން އިންވެސްޓަރުންނަށް ދިމާވެފައިވާ ގޮންޖެހުންތައް ކަމަށްވާ ދަތުރުފަތުރުގެ ދަތިކަމާއި ގައުމުތަކުގެ ބޯޑަރު ބަންދުކުރުން ފަދަ ކަންކަމުގެ ސަބަބުން ކަމަށް މިނިސްޓްރީން ފާހަގަކުރެއެވެ.
ރިސޯޓް ތަރައްގީކުރަން ހުޅުވާލާފައިވާ ރަށްތަކުގެ ތެރޭގައި ހއ. އަތޮޅުގެ ދެރަށް، ހދ. އަތޮޅުގެ އެއް ރަށް، މ. އަތޮޅުގެ ދެރަށް، ތ. އަތޮޅުގެ ތިން ރަށް، ލ. އަތޮޅުގެ ތިން ރަށް ގއ. ގެ ދެރަށް އަދި ގދ. ގެ ތިން ރަށް ހިމެނެއެވެ.
ރާއްޖޭގައި ރިސޯޓް ތަރައްގީކުރުމަށް ރަށްތައް ދޫކުރަމުންދާއިރު، ސަރުކާރުން ދަނީ ރަށު ފަތުރުވެރިކަން ތަރައްގީކުރުމަށް ހާއްސަ ސަމާލުކަމެއް ދެމުންނެވެ. އެގޮތުން "ޓޫރިޒަމް ޑައިވާސިފިކޭޝަން އެންޑް ލޯކަލައިޒޭޝަން" ޕްރޮޖެޓް ތައާރަފުކުރައްވަމުން ޓޫރިޒަމް މިނިސްޓަރ، ޑރ. އަބްދުﷲ މައުސޫމް ވަނީ ރަށުގައި ފަތުރުވެރިކަން ކުރިއަރުވައި ހިންގުމަށް ކައުންސިލްތަކަށް ބޭނުންވާ ފަންނީ އެހީތެރިކަން ފޯރުކޮށްދޭނެކަމުގެ ޔަގީންކަން އަރުވާފައެވެ. އަދި ރަށު ފަތުރުވެރިކަން ތަރައްގީކުރުމަށް ދިވެހި ސަރުކާރުން ވަނީ ޔުނައިޓެޑް ނޭޝަންސް ޑިވެލޮޕްމެންޓް ޕްރޮގްރާމް (ޔޫއެންޑީޕީ) އާއެކު 4.7 މިލިއަން ރުފިޔާގެ އެއްބަސްވުމެއްގައި ސޮއިކޮށްފައެވެ. މިއެއްބަސްވުމުގެ ސަބަބުން ރާއްޖޭގެ ތާރީޚާއި ސަގާފަތާއި އާދަކާދަ އިޝްތިހާރުކޮށް، ފަތުރުވެރިކަން ކުރިއެރުވުމުގެ މަސައްކަތާއި ދެމެހެއްޓެނިވި ގޮތެއްގައި ރަށުފަތުރުވެރިކަން ތަރައްގީކުރުމަށް ފަތުރުވެރިކަމުގެ ސިނާއަތުގެ ހިއްސާދާރުން ތަމްރީންކުރެވިގެންދާނެއެވެ.
