އައްޑޫގައި ވެސް ބޭރަށް ނުކުތުމަށް ޕޮލިސް ޕާމިޓް ބޭނުންވާނެ
އައްޑޫ ސިޓީ ނޫން އެހެން ސަރަހައްދެއްގައި ހުރެގެން މައުލޫމާތު ސާފުކުރުމަށް 6886098 އަށް ގުޅުމަށް ވަނީ އެދިފައި
ފުލުހުންނާއި ސިފައިން ގުޅިގެން މާލެތެރެ ބެލެހެއްޓުމަށް ކުރިއަށްގެންދާ އޮޕަރޭޝަންގެ ތެރެއިން
ކޮވިޑް19ގެ ހާލަތާ ގުޅިގެން އައްޑޫ ސިޓީގައި މިހާރު އަޅާފައިވާ ފިޔަވަޅުތަކުގެ ތެރެއިން، ބޭރަށް ނުކުމެ އުޅުން މަނާ ވަގުތު ތަކުގައި، ޒަރޫޒީ ބޭނުންތަކަށް ބޭރަށް ނުކުތުމަށް ޕޮލިސް ޕާމިޓް ޕޯޓަލް މެދުވެރިކޮށް ހުއްދައަށް އެދެވޭނެ ކަމަށް ފުލުހުން ބުނެފިއެވެ.
ފުލުހުން ބުނީ އައްޑޫ ސިޓީން ހުއްދަ ދޫކުރުމާ ގުޅޭގޮތުން އެއްވެސް މައުލޫމާތެއް ސާފުކުރަން ބޭނުންވާނަމަ، އައްޑޫ ސިޓީގައި ހުރެގެން ގުޅާނަމަ 1665 ނުވަތަ އައްޑޫ ސިޓީ ނޫން އެހެން ސަރަހައްދެއްގައި ހުރެގެން ގުޅާނަމަ 6886098 އަށް ގުޅައިގެން މައުލޫމާތު ސާފު ކުރެވޭނެ ކަމަށެވެ.
ރަށްތަކުގައި ވެސް ފެންނަ ކޮވިޑުގެ ކޭސްތައް އިތުރުވެފައިވާއިރު ސަރުކާރުން މިވަނީ ކޮވިޑު ކޮމްޓްރޯލް ކުރުމަށްޓަކައި ހަރުކަށި ފިޔަވަޅުތަކެއް އަޅަން ފަށާފައެވެ. އެގޮތުން ކޮވިޑް-19ން ރައްކާތެރިވުމަށް ބަލި ފެތުރުން ކޮންޓްރޯލްކުރުމަށްޓަކައި މޮނިޓަރިންގ ގެ ހާލަތަށް ގެނެވޭ ރަށްރަށުގައި ފިޔަވަޅުތަކެއް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ވަނީ އަންގާފައެވެ.
އެގޮތުން މޮނިޓަރިންގ ގައި އޮންނަ ރަށްރަށުގައި ރޭގަނޑު 9ން ފެށިގެން ފަތިހު 4ށް އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނިކުތުން ވަނީ މަނާކޮށްފައެވެ. އެހެންނަމަވެސް ރަށުގައި ބަލިފެތުރުމުގެ ހާލަތަށް ބަލައި މި ފިޔަވަޅު އަޅައިފައިވާ ވަގުތަށް ބަދަލުގެނެވޭނެކަމަށް އެޗްޕީއޭއިން ބުނެއެވެ.
މާލެސިޓީގެ އިތުރުން އަތޮޅުތެރޭގެ ގިނަ ރަށްތަކުން ކޮވިޑް-19ގެ ކޭސްތައް ފެނިފައިވާތީ އެރަށްތަކުގެ ހާލަތު ވަރަށް ގާތުން ސަރުކާރުން ދަނީ ބަލަމުންނެވެ.
އެގޮތުން އަތޮޅުތަކުގެ ހާލަތު ބެލުން އިތުރަށް ހަރުދަނާ ކުރުމަށާއި ކޯޑިނޭޝަން އިތުރަށް ރަނގަޅު ކުރުމަށްޓަކައި ކޮންމެ އަތޮޅަކަށް ސަރުކާރުގެ ފަރާތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިހާރު ވަނީ އިސް ބޭފުޅަކު ހަމަޖައްސަވާފައެވެ. އެގޮތުން އެކި މިނިސްޓްރީތަކުން ސްޓޭޓް މިނިސްޓަރެއް ނުވަތަ ޑެޕިއުޓީ މިނިސްޓަރެއް ކޮންމެ އަތޮޅަކަށް ވަނީ ކަނޑައަޅުއްވާފައެވެ. މިބޭފުޅުން މަސައްކަތްކުރައްވާނީ ކައުންސިލްތަކާއި ޓާސްކްފޯސްތަކާ ގުޅިގެން އެ އަތޮޅެއްގައި ކޮވިޑް ކޮންޓްރޯލްކޮށް ހުއްޓުވުމަށް ކުރަމުންދާ މަސައްކަތުގައި ހުރި މައްސަލަތަކާއި، ދަތިތައް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) އަދި ކަމާއި ގުޅުންހުރި ފަރާތްތަކުގެ ސަމާލުކަމަށް ގެނެސްދެއްވައި އަދި އެކަން ހިނގާނުހިނގާ ގޮތް މޮނިޓަރ ކުރެއްވުމަށެވެ.
ބަލި ކޮންޓްރޯލް ކުރުމުގެ ގޮތުން ގިނަ ރަށްތަކުގައި ކާފިއު ހިންގަމުންދާއިރު، އަޅާފައިވާ ފިޔަވަޅުތަކާއި ގައިޑްލައިންތަކާ އެއްގޮތަށް ގިނަ ރައްޔިތުން އަމަލުކުރަމުންދާ ކަމަށް އެރަށްތަކުގެ ކައުންސިލްތަކުން މައުލޫމާތުދެއެވެ. އަދި މި މަސައްކަތުގައި އާއްމު ރައްޔިތުންގެ ފުރިހަމަ އެއްބާރުލުން ލިބޭކަން ކައުންސިލްތަކުން ފާހަގަކުރެއެވެ.
