ކޯޗުންގެ ގުޅުން އިތުރަށް ހަރުދަނާކުރުމަކީ ބޮޑު މަގުސަދެއް: ފައިސަލް
1 ޖޫން 2021 | އަންގާރަ 05:52ކްރިކެޓް ކޯޗުންގެ އެއްބަސްވުންތައް އާކުރުމުގެ މަސައްކަތް ވަނީ ފަށާފައި
ކްރިކެޓް ބޯޑް އޮފް މޯލްޑިވްސްގެ ރައީސް މުޙައްމަދު ފައިސަލް
ކްރިކެޓް ކޯޗުންނާއި ކްރިކެޓް ބޯޑް އޮފް މޯލްޑިވްސްއާ ދޭތެރޭ އޮންނަ ގުޅުން އިތުރަށް ހަރުދަނާކުރުމަކީ ވަރަށް ބޮޑު މަގުސަދެއް ކަމަށް އެ ބޯޑުގެ ރައީސް މުޙައްމަދު ފައިސަލް ވިދާޅުވެއްޖެއެވެ.
ދާދިބ ފަހުން ކްރިކެޓް ބޯޑުން ވަނީ އެ ބޯޑުގެ ޑިވެލޮޕްމަންޓް ޕްރޮގްރާމްތަކުގައި މަސައްކަތްކުރާ ކޯޗުންގެ އެއްބަސްވުންތައް އާކޮށް، އެއްބަސްވުންތައް ހަވާލުކުރުމުގަ މަސައްކަތް ފަށާފައެވެ. އެ މަސައްކަތުގެ ތަފުސީލު ހާމަކުރައްވާ ކްރިކެޓް ބޯޑުގެ ރައީސް ފައިސަލް ވިދާޅުވީ މި ދަނޑިވަޅަކީ ކްރިކެޓް ބޯޑަށްވެސް ވަރަށް ބޮޑެތި ގޮންޖެހުންތަކެއް ކުރިމަތިވެފައިވާ ދަނޑިވަޅެއް ކަމަށާއި، އެކަމަކު ކްރިކެޓް ކުރިއެރުވުމަށްޓަކައި މިހާތަނަށްވެސް ވަރަށް ބުރަކޮށް މަސައްކަތްކުރި ކޯޗުން ތިބުމާއި އަދި އަލަށް ފެށުމަށް ހަމަޖެހިފައިވާ ޑިވެލޮޕްމަންޓް ޕްރޮގްރާމް ފެށުމަށް ވާން ޖެހޭ ތައްޔާރީތައް ހުރުމާއެކު، މި ވަގުތު ކޮޗުންގެ އެއްބަސްވުންތައް އާކުރަން މަސައްކަތް ފަށާފައިވާ ކަމަށެވެ.
އަދި އަލަށް ހެދުނު އެއްބަސްވުންތައް ހެދިފައިވަނީ ކޯޗުންނަށް ލިބޭ އިނާޔަތްތައް ތަމްރީނު ޕްރޮގްރާމްތަކާ ގުޅުވައި، ޕްރޮގްރާމްތައް ހިންގާ މިންވަރަށް ބަލާ އިނާޔަތްތައް އިތުރުވާނެ ގޮތަށް ކަމަށާއި، އެ ގޮތަށް ހަމަޖެހުމުން ހުރިހާ ފަންތީގެ ކޯޗުންގެ މުސާރަވެސް ކުރިއަށް ވުރެ ބޮޑުވެގެންދާނެ ކަމަށްވެސް ވިދާޅުވިއެވެ. މީގެ އިތުރުން އަންހެން ކްރިކެޓް ކުރިއެރުވުމަށް ފަށާ މަސައްކަތުގެ ތެރެއިން އަލަށް އެއްބަސްވުން ހަދާއިރު، ކޮންމެ ކޯޗަކާވެސް މަދުވެގެން އެއް އަންހެން ސްކްޑް ހަވާލުކުރެވޭނެ ކަމަށްވެސް ފައިސަލް ވަނީ ވިދާޅުވެފައެވެ.
ކްރިކެޓް ބޯޑުން އަލަށް ތައްޔާރުކުރާ ޑިވެލޮޕްމަންޓް ޕްރޮގަރާމްގައި ހަރަކާތްތެރިވުމަށް 15 ކޯޗަކު މިހާތަނަށް ވަނީ ހަމަޖައްސާފައެވެ. އެ ގޮތުން މާލެއަށް ނުވަ ކޯޗުން، ފުވައްމުލަކަށް ފަސް ކޯޗުން އަދި ލ. ކުނަހަންދޫއަށް ދެ ކޯޗުން ހަމަޖެހިގެންދާނެ ކަމަށް ކްރިކެޓް ބޯޑުން މައުލޫމާތުދެއެވެ.
އަދި ކްރިކެޓް ބޯޑު ހިންގުމާ އައު ހިންގާ ކޮމިޓީ ހަވާލުވުމަށް ފަހު، ކްރިކެޓް ތަރައްގީކުރުމަށް ހިންގޭ ޕްރޮގްރާމްތައް ދިރާސާކޮށް، އެ ޕްރޮގްރާމް ހަރުދަނާކޮށް ނަތީޖާ ނެރެވޭނެ ފަދަ ޕްރޮގްރާމަކަށް ހެދުމަށް ގެންނަޖެހޭ ބަދަލުތަކާ ގުޅޭ ކަންކަން މިހާރު ނިމިފައިވާ ކަމަށްވެސް އެ ބޯޑުން މައުލޫމާތުދެއެވެ. މީގެ އިތުރުން ކޮވިޑުގެ ހާލަތު ރަނގަޅުވެ، ލުއިތައް ލިބުނުހާ އަވަހަކަށް ވައިޑީޕީ ހަރަކާތްތައް ފެށުމަށް މަސައްކަތްކުރަމުން އަންނަ ކަމަށްވެސް ކްރިކެޓް ބޯޑުން މައުލޫމާތުދެއެވެ.
ފައިސަލުގެ ބެލުމުގެ ދަށުން ކްރިކެޓް ކުރިއެރުވުމަށް ގިނަ މަސައްކަތްތަކެއް ރާވާފައިވާއިރު، އޭނާ ކްރިކެޓް ބޯޑުގެ ރައީސްގެ މަގާމާ ހަވާލުވެވަޑައިގަތީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ. އަދި މިދިޔަ ޖެނުއަރީ މަހު އޭޝިއަން ކްރިކެޓް ކައުންސިލް (އޭސީސީ) ގެ އެގްޒެކުޓިވް ބޯޑުގެ ޑައިރެކްޓަރަކަށްވެސް ފައިސަލް ވަނީ އިންތިޚާބުކޮށްފައެވެ.
