ޤައުމުތަކަށް ނިސްބަތްކޮށް ވޭރިއަންޓަށް ނަން ކިޔުމުގެ ބަދަލުގައި ގްރީކް ލެޓާސް ބޭނުންކުރުމަށް ޑަބްލިޔުއެޗްއޯއިން ނިންމައިފި

ޤައުމުތަކަށް ނިސްބަތްކޮށް ވޭރިއަންޓަށް ނަން ކިޔުމުގެ ބަދަލުގައި ގްރީކް ލެޓާސް ބޭނުންކުރުމަށް ދުނިޔޭގެ ސިއްހަތު ޖަމުޢިއްޔާ (ޑަބްލިޔުއެޗްއޯ) އިން ނިންމައިފިއެވެ.

ދުނިޔޭގެ ސިއްހަތު ޖަމުޢިއްޔާ އިން ބުނީ ގްރީކް ލެޓާސް ބޭނުންކުރުމަށް ނިންމާފައިވަނީ އައު ވޭރިއަންޓް ފެނިފައިވާ ބައެއް ޤައުމުތައް ކަމަށްވާ އިނގިރޭސިވިލާތް، ދެކުނު އެފްރިކާ އަދި އިންޑިއާއަށް ކަމަށެވެ. އެގޮތުން އިނގިރޭސިވިލާތުން ފެނިފައިވާ ވޭރިއަންޓްއަށް އަލްފާގެ ނަން ދީފައިވާއިރު ދެކުނު އެފްރިކާއިން ފެނިފައިވާ ވޭރިއަންޓްއަށް ދީފައިވަނީ ބީޓާ އަދި އިންޑިއާއިން ފެނިފައިވާ ވޭރިއަންޓްއަށް ދީފައިވަނީ ޑެލްޓާގެ ނަމުންނެވެ.

ދުނިޔޭގެ ސިއްހަތު ޖަމުޢިއްޔާއިން އިތުރަށް ބުނީ މިގޮތަށް ނިންމާފައިވަނީ އެކި މަޝްވަރާތައް ފަސޭހަ ކުރުމަށާއި އެކި ޤައުމުތަކަށް ނިސްބަތްކޮށްގެން ނަން ކިޔުމުން އަމާޒުވާ ފާޑުކިޔުންތައް ނައްތާލުމަށް ކަމަށެވެ.

ދުނިޔޭގެ ސިއްހަތު ޖަމުޢިއްޔާއިން މިހެން ނިންމާފައިވާއިރު އެންމެ ހަލުވިކޮށް ފެތުރެމުންދާ ކޮވިޑްގެ ބާވަތަށް، "އިންޑިޔާ ވޭރިއެންޓް" ކިޔުން ހުއްޓާލުމަށް އެ ގައުމުން އެންމެންގެ ކިބައިން އެދިފައިވާ ދަނޑިވަޅެއްގައެވެ.

އިންޑިޔާގައި އެންމެ ފަހުން އުފެދިގެން އުޅޭ އަދި އެންމެ ހަލުވިކޮށް ފެތުރެމުންދާ ކޮވިޑްގެ ބާވަތަށް، "އިންޑިޔާ ވޭރިއެންޓް" ކިޔުން ހުއްޓުވުމަށް ވެސް ސޯޝަލް މީޑިއާގެ ޕްލެޓްފޯމްތައް ހިންގާ ކުންފުނިތަކަށް، އިންޑިއާ ސަރުކާރުން ވަނީ ބާރު އަޅަން ފަށާފައެވެ. އިންޑިޔާ އިން ބުނާ ގޮތުގައި، އެ ގައުމަށް ނިސްބަތްކުރި ކަމުގައި ވިޔަސް، ކޮވިޑް-19 އިން އެންމެ ފަހުން އުފެދުނު ވޭރިއަންޓްގެ ސައިންޓިފިކް ނަމަކީ އެއީއެއް ނޫނެވެ. އަދި އިންޑިޔާއާ ގުޅުވައިގެން އެ ނަން ބޭނުންކުރާތީ، އެގައުމުގެ ތަސައްވުރު ހުތުރުވަމުންދާ ކަމަށް ވެސް އިންޑިޔާއިން ބުނެއެވެ.