ގައުމު ބިނާކުރުމަށް އެމްއެންޔޫއިން ދޭ ޚާއްސަ ސްކޮލަރޝިޕަށް ކުރިމަތިލުމުގެ ފުރުސަތު ހުޅުވާލައިފި
ސްކޮލަރޝިޕް ފޯމް ބަލައިގަންނަ އެންމެ ފަހު ތާރީޚަކީ 9 ސެޕްޓެމްބަރު
އެމްއެންޔޫ ދަސްވެރިވުން
ގައުމު ބިނާކުރުމަށް ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އިން ދޭ ޚާއްސަ ސްކޮލަރޝިޕަށް ކުރިމަތިލުމުގެ ފުރުސަތު ހުޅުވާލައިފިއެވެ.
އެމްއެންޔޫއިން ބުނީ ސްކޮލަރޝިޕް ގެ މައިގަނޑު މަގުސަދަކީ މި ވަގުތަށް ގައުމަށް ބޭނުންވާ ކޯސްތަކަށް އިއުލާނުކުރުމުން އެދާއިރާއަކަށް ދަރިވަރުން ނުލިބޭ ޚާއްސަ ދާއިރާތަކުން މީހުން ބިނާ ކުރުން ކަމަށެވެ.
އެގޮތުން 2021 ވަނަ އަހަރުގެ ދެވަނަ ޓާމަށް ޚާއްސަކުރެވިފައިވާ ދާއިރާތަކަކީ, ފަށާ ތަޢުލީމުގެ މުދައްރިސްކަމާއި މެރިޓައިމް ދާއިރާއެވެ.
ސްކޮލަޝިޕް ދޭ ދާއިރާތަކުގެ ތެރެއިން, ބެޗްލަރ އޮފް ޕްރައިމަރީ އެޑިޔުކޭޝަންގެ ދާއިރާއިން 30 ދަރިވަރުންނަށް ޖާގަ ދިނުމަށް ހަމަޖެހިފައިވެއެވެ. އޭގެ ތެރެއިން 15 ސްކޮލަރޝިޕް އަކީ އެމްއެންޔޫ އިން ދޭ ސްކޮލަރޝިޕްއެވެ. އަދި އަނެއް 15 ސްކޮލަރޝިޕް އަކީ މިނިސްޓްރީ އޮފް އެޑިޔުކޭޝަންގެ އެޑިޔުކޭޝަން ޑިވެލޮޕްމަންޓް ފަންޑުން ސްޕޮންސަރ ކުރެވޭ ސްކޮލަރޝިޕްއެވެ.
އެމްއެންޔޫއިން ބުނީ އެ ކޯސް ލިބޭ ދަރިވަރުންނަށް ކިޔަވާ ކޯހުގެ ޓިއުޝަން ފީ، ކޮންމެ މަހަކު އެލަވަންސްގެ ގޮތުގައި ދެވޭ -/5000 ރުފިޔާ، ފޮތާއި އެހެނިހެން ތަކެތި ގަތުމަށް ކޮންމެ ޓާރމަކު -/5000 ރުފިޔާ، ސްކޮލަރޝިޕް ލިބޭ ފުރަތަމަ މަހު "އެސްޓެބްލިޝްމަންޓް" ގްރާންޓެއްގެ ގޮތުގައި -/5000 ރުފިޔާ އަދި އެދަރިވަރަކު ހުރުމަށް މަޖްދުއްދީން ދަނާލުން ޖާގަ ލިބޭނެ ކަމަށެވެ.
ބެޗްލަރ އޮފް ޕްރައިމަރީ އެޑިޔުކޭޝަންގެ ސްކޮލަރޝިޕަށް ދަރިވަރުން ހޮވާނީ އެމްއެންޔޫއިން ކަނޑައަޅާފައިވާ 60 ރަށަކުން ކުރިމަތީލާ ފަރާތްތަކުގެ ތެރެއިން ކަމަށް އެމްއެންޔޫއިން މައުލޫމާތު ދެއެވެ.
މެރިޓައިމް ދާއިރާއިން ނޯޓިކަލް ސްޓަޑީޒް / ސެޓިފިކެޓް 3 އިން މެރިޓައިމް އޮޕަރޭޝަންސް ކޯހުން ސްކޮލަޝިޕް ދިނުމަށް ހަމަޖެހިފައި ވާއިރު, ޖުމްލަ ހަ ދަރިވަރަކަށް ޖާގަ ދިނުމަށް ހަމަޖެހިފައި ވެއެވެ. މި ކޯހަށް ހޮވޭ ދަރިވަރުންނަށް ކިޔަވާ ކޯހުގެ ޓިއުޝަން ފީ، ކޮންމެ މަހަކު އެލަވަންސްގެ ގޮތުގައި ދެވޭ -/5000 ރުފިޔާ، ފޮތާއި އެހެނިހެން ތަކެތި ގަތުމަށް ކޮންމެ ޓާރމަކު -/5000 ރުފިޔާ އަދި ސްކޮލަރޝިޕް ލިބޭ ފުރަތަމަ މަހު "އެސްޓެބްލިޝްމަންޓް" ގްރާންޓެއްގެ ގޮތުގައި -/5000 ރުފިޔާ ލިބޭނެ ކަމަށް އެމްއެންޔޫއިން މައުލޫމާތުދެއެވެ.
މީގެ އިތުރުން އެމްއެންޔޫގައި ގައި 2021 ވަނަ އަހަރުގެ ދެވަނަ ޓާރމްގައި އަލަށް ކޯސްތަކަށް ކުރިމަތިލާ ފަރާތްތަކަށް އެދަރިވަރަކު ހޮވިފައިވާ ކޯހަކާއެކު ސްކޮލަރޝިޕަށް އެދި ހުށަހެޅުމުގެ ފުރުޞަތު ލިބިގެންދާނެ ކަމަށް އެމްއެންޔޫން ބުނެއެވެ.
މި ސްކޮލަރޝިޕްތަކަށް ހޮވާނީ ތައުލީމީ ގޮތުން އެންމެ މޮޅު ދަރިވަރުންނެވެ. ދަރިވަރުންގެ ނަތީޖާ ތަރުތީބު ކުރުމަށްފަހު، ލިބޭ މާރކްސް އެއްވަރު ވެއްޖެނަމަ އެކުދިންގެ ތެރެއިން ހޮވުމަށް ހަމަޖެހިފައިވަނީ ގުރުއަތު ލައިގެން ކަމަށް އެމްއެންޔޫއިން ބުނެއެވެ.
ސްކޮލަރޝިޕް ފޯމް ބަލައިގަންނަ އެންމެ ފަހު ތާރީޚަކީ 9 ސެޕްޓެމްބަރު ވާ ބުރާސްފަތި ދުވަހުގެ މެންދުރު 2:00 އެވެ.
