ފްލައިންގ ސުކޫލް މައްސަލައިގައި އޭޖީގެ ލަފާ ސިވިލް އޭވިއޭޝަން އޮތޯރިޓީއަށް
އޭޖީގެ ލަފާފުޅަކަށް އެދިފައިވަނީ މިހިނގާ މެއި މަހުގެ 30 ވަނަ ދުވަހު
އޭޝިއަން އެކެޑަމީ އޮފް އެއިރޮނޯޓިކްސް | އޭޝިއަން އެކެޑަމީ އޮފް އެއިރޮނޯޓިކްސް
އައްޑޫ ގައި ހިންގާ ފްލައިންގ ސްކޫލުގެ މައްސަލާގައި ޤާނޫނީ ގޮތުން ދޭންޖެހޭ ލަފާ ބަންޑާރަނައިބް (އޭޖީ) އިބްރާޙިމް ރިއްފަތު މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނަށް އަރުވައިފިއެވެ.
ޓްރާންސްޕޯޓް މިނިސްޓްރީން މިކަމުގައި އޭޖީގެ ލަފާފުޅަކަށް އެދިފައިވަނީ މިހިނގާ މެއި މަހުގެ 30 ވަނަ ދުވަހުއެވެ. އޭޖީ ވަނީ ސިވިލް އޭވިއޭޝަން އޮތޯރިޓިގެ ޤާނޫނާއި މަތީ ތަޢުލީމާބެހޭ ޤާނޫނުގެ ދަށުން އެޅިދާނެ ފިޔަވަޅުތައް ބަޔާން ކުރައްވައި، ހޯމަ ދުވަހުގެރޭ ޖަވާބު ފޮނުއްވާފައެވެ. އެކަން އޭޖީ ވަނީ ޓްވިޓަރ ގައިވެސް ހިއްސާ ކުރައްވާފައެވެ.
މި މައްސަލައާ ގުޅިގެން ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙުވެސް ވަނީ ބައެއް ފިޔަވަޅުތައް އެޅުއްވުމަށް ނިންމަވާފައެވެ. އެގޮތުން ސިވިލް އޭވިއޭޝަން އޮތޯރިޓީގެ އޮޑިޓްގައި ފާހަގަކޮށްފައިވާ ކަންކަމާ ގުޅިގެން އެ ތަނުގެ ހެޑް އޮފް ޕައިލެޓް ޓްރެއިނިންގ އާއި އެކައުންޓެބަލް މެނޭޖަރުގެ މައްސަލަ އިތުރަށް ބަލައި ފިޔަވަޅު އެޅުއްވުމަށް ވަނީ ނިންމަވާފައެވެ. އެއާއެކު އޭޝިއަން އެކެޑަމީ އޮފް އެރޮނިޓިކްސް (އޭއޭއޭ) ގެ ހެޑް އޮފް ޓްރެއިނިންގެ ގޮތުގައި ހުންނެވި ސުރަންޖަން ޑި ސިލްވާއަށް ދޫކޮށްފައިވާ ހުއްދަވެސް ދާދި ފަހުން ސިވިލް އޭވިއޭޝަން އޮތޯރިޓީން ވަނީ އަތުލާފައެވެ. އަދި ސްކޫލުގެ އެކައުންޓަބަލް މެނޭޖަރުގެ މަގާމުގައި ހުރި އަލީ އަކުބަރު ޖީވަންޖީގެ ހުއްދަ އަތުލާނެކަމުގެ ފަހު އިންޒާރުވެސް ވަނީ ދީފައެވެ.
އައްޑޫ ފްލައިން ސްކޫލުގައި ކިޔަވަމުންދާ ދަރިވަރުންގެ ހައްގުތަކަށް ތަކުރާރުކޮށް އަރައިގަންނަމުންދާތީ އެ ސްކޫލް 35،000 ރުފިޔާއިން ޖޫރިމަނާކޮށް އަނެއްކާވެސް ކަންކަން އިސްލާހު ކުރުމަށް މީގެކުރިން ވަނީ އިތުރު ފުރުސަތެއް ދީފައެވެ. 2001 ވަނަ އަހަރު އަމަލު ކުރަން ފެށި މަދަނީ ވައިގެ ދަތުރުފަތުރުގެ ގާނޫނު ބުނާ ގޮތުން އެގާނޫނާއި ޚިލާފުވާ ފަރާތްތައް -/100،000 (އެއް ލައްކަ) ރުފިޔާ އަށްވުރެ ބޮޑުނުވާ އަދަދަކުން ޖޫރިމަނާ ކުރެވިދާނެއެވެ.
