ހުއްދަ ނަގައިގެން އައްޑޫ ސިޓީއަށް އެތެރެކޮށްފައިވާ ވެހިކަލްތަކެއް ރަޖިސްޓްރީ ކޮށްދިނުން މެދުކަނޑާލި މައްސަލަ ހޫނުވެއްޖެއެވެ.
ރާއްޖެއެމްވީއާ ވާހަކަ ދައްކަވަމުން އައްޑޫ ސިޓީގެ މޭޔަރު އަލީ ނިޒާރު ވިދާޅުވީ، ހުއްދަ ނަގައިގެން އެތެރެކޮށްފައިވާ ވެހިކަލްތަކުގެ ތެރެއިން 5 އަހަރު ދުވަހަށްވުރެ ގިނަ ދުވަސްވެފައިވާ ވެހިކަލްތައް ރަޖިސްޓްރީ ކޮށްދިނުން މެދުކަނޑާލާފައިވާ ކަމަށް ޓްރާސްޕޯޓް އޮތޯރިޓީން އަންގާފައިވާ ކަމަށެވެ. އަދި އެކަން ޓްރާސްޕޯޓުން އަންގާފައިވަނީ ކުއްލިއަކަށް ކަމަށާއި، އެއްވެސް މުއްދަތެއް ދިނުމަކާ ނުލާ ކަމަށެވެ.
މޭޔަރު ވިދާޅުވީ ވެހިކަލް ރަޖިސްޓްރީ ކޮށްނުދޭނެކަން ޓްރާންސްޕޯޓުން އަންގާފައިވާއިރު، ވެހިކަލްތަކަކީ އެތައް މިލިއަން ރުފިޔާގެ އަގުހުރި މުދާ ކަމަށް ވާއިރު، މި މައްސަލާގައި ޒުވާނުން ވަރަށް ކަންބޮޑުވާ ކަމަށެވެ.
މިކަމާ ގުޅިގެން ފާއިތުވީ ހޯމަ ދުވަހު ޒުވާނުން ސިޓީ ކައުންސިލަށް ގޮސް ކަންބޮޑުވުން ހިއްސާކޮށްފައިވާކަން މޭޔަރު ފާހަގަކުރެއްވިއެވެ. އަދި އެކަމާ ގުޅިގެން މުޒާހަރާކޮށްފައިވާ ކަމަށް ބައެއް މީޑިއާތަކުގައި ބުނެފައިވާ ބުނުން މޭޔަރު ވަނީ ދޮގުކުރައްވާފައެވެ.
މޭޔަރު ވިދާޅުވީ ޒުވާނުންގެ އެކަންބޮޑުންތައް ހައްލު ކުރުމުގެ މަސައްކަތް ފަށާފައިވާ ކަމަށާއި، ޓްރާސްޕޯޓް އޮތޯރިޓީއާއެކު އެމަޝްވަރާތައް ކުރިއަށް ގެންދާނެ ކަމަށެވެ.
މަގާމުގެ ނުފޫޒު ބޭނުންކޮށްފައިވާ ކަމަށް ދެކެވޭ ވާހަކަތަކަށް މޭޔަރު ރައްދު ދެއްވައި އޭނާ ވިދާޅުވީ، މަގާމުގެ ނާޖާއިޒު ފައިދާ އެއްވެސް އިރެއްގައި ނުނަގާ ކަމަށާއި، އަދި މޭޔަރު ކަމުގެ މަގާއި ހަވާލުވިފަހުން ދެމަސް ވެސް ނުވާ ކަމަށެވެ. އަދި އެފަދަ ކަމެއް ކުރިއަށް އޮތްތަނުގައި ތަކުރާރު ނުވާނެ ކަމުގެ ޔަގީންކަން މޭޔަރު ދެއްވިއެވެ.
