ގާޒާއަށް ދެމުން ގެންދާ ހަމަލާތައް ހުއްޓާލުމުގެ މަޝްވަރާއަށް އިސްރާއީލުގެ ހާރިޖީ ވަޒީރު މިސްރަށް
31 މެއި 2021 | ހޯމަ 12:33ހަމާސްއިން ގާޒާގައި ހައްޔަރުކޮށްފައިވާ އިޒްރާއީލުގެ މީހުން މިނިވަން ކުރުމާއި ގުޅޭގޮތުންވެސް މަޝްވަރާ ކުރެވިގެންދާނެ
އިސްރާއީލުގެ ހާރިޖީ ވަޒީރު ގާބީ އަޝްކެނާޒީ
އިޒްރާއީލުގެ ސިފައިންނާ ގާޒާގެ ހަމާސް ޖަމާއަތާ ދެމެދު ހަމަލާ ބަދަލު ކުރުން ހުއްޓާލުމުގެ މަޝްވަރާތަކަށް އިޒްރާއީލުގެ ޚާރިޖީ ވަޒީރު ގާބީ އަޝްކެނާޒީ މިސްރަށް ވަޑައިގެންފިއެވެ.
އިސްރާއީލުގެ ޚާރިޖީ ވަޒީރު އަޝްކެނާޒީ ކުރެއްވި ޓްވީޓެއްގައި ވިދާޅުވީ ހަމާސް ޖަމާއަތާއިއެކު އެގައުމުން މަޝްވަރާ ކުރަމުން އަންނަނީ ހަމަލާތައް ދާއިމަށް ހުއްޓާލުމުގެ އެއްބަސްވުމަކަށް އައުމަށް ކަމަށެވެ. އަދި ގާޒާއަށް އިންސާނީ އެހީ ފޯރުކޮށްދެވޭނެ ގޮތްތައް ހޯދައި، ގާޒާ އަލުން ބިނާ ކުރުމަށް، ބައިނަލްއަގްވާމީ ފަރާތްތަކުން ބައިވެރިވުމާ ބެހޭގޮތުން މި މަޝްވަރާތަކުގައި ވާހަކަދެކެވިގެންދާނެ ކަމަށެވެ.
މީގެ އިތުރުން ހަމާސްއިން ގާޒާގައި ހައްޔަރުކޮށްފައިވާ އިޒްރާއީލުގެ މީހުން މިނިވަން ކުރުމާއި ގުޅޭގޮތުންވެސް މަޝްވަރާ ކުރެވިގެންދާނެ ކަމަށް އޭނާ ވިދާޅުވިއެވެ.
ފަލަސްތީނާއީ އިޒްރާއީލު މައްސަލައިގައި މިސްރުން އިސް ދައުރެއް އަދާ ކުރަމުން އަންނައިރު، މީގެ ކުރިން މިސްރުން ބުނެފައިވަނީ ފަލަސްތީނު އާރާސްތުކުރުމުގައި މިސްރުން އަބަދުވެސް އެހީވާނެ ކަމަށެވެ. އެގޮތުން ގާޒާ އާރާސްތުކުރުމަށް 500 މިލިއަން ޑޮލަރު ހަދިޔާ ކުރަން ނިންމާފައިވާ ކަމަށް މިސްރުން ވަނީ ބުނެފައެވެ.
ރަމަޟާން މަހުގެ ފަހު 10ގެ ތެރޭގައި އިސްރާއީލުން ގާޒާއަށް ދިން ހަމަލާތަކުގައި ފަލަސްތީނުގެ 354 މީހަކު ވަނީ ޝަހީދުއެވެ.
