ސަލާމަތީ ޚިދުމަތްތަކުގެ ބޭފުޅުންނާ މެދު ނަފުރަތު އުފެއްދުމަށް ކުރަމުންދާ މަސައްކަތް ހުއްޓާލަން ޖެހޭ: އަލީ ޒާހިރު
31 މެއި 2021 | ހޯމަ 07:46އެބޭފުޅުންގެ އަގު ވައްޓާލަން ކުރާ މަސައްކަތް ހުއްޓާލަން ޖެހޭ
ރައީސް އޮފީހުގެ ޗީފް އޮފް ސްޓާފް އަލީ ޒާހިރު،
ސަލާމަތީ ޚިދުމަތްތަކުގެ ބޭފުޅުންނާ މެދު ނަފުރަތު އުފެއްދުމަށް ކުރަމުންދާ މަސައްކަތް ހުއްޓާލަން ޖެހޭ ކަމަށް ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެއެވެ.
އަލީ ޒާހިރު މިހެން ވީދާޅުވީ ސަލާމަތީ ޚިދުމަތްތަކުގެ އިސްބޭފުޅުން މަސައްކަތަށް ސީރިއަސްތޯ އަދި މުހިއްމު ބައްދަލުވުންތަކަށް ސިފައިން ވަޑައިނުގަންނަވާ ކަމަށް ބުނެ ޓްވިޓާގައި ކުރި ސުވާލަށް ޖަވާބު ދެއްވަމުންނެވެ.
އަލީ ޒާހިރު ވިދާޅުވީ ސިފައިންގެ ތެރޭގައި އެފަދަ މައްސަލައެއް ނުޖެހޭ ކަމަށެވެ. އަދި ސަލާމަތީ ޚިދުމަތްތަކުގެ ބޭފުޅުންނާ މެދު ނަފްރަތު އުފައްދައި، އެބޭފުޅުންގެ އަގު ވައްޓާލަން ކުރާ މަސައްކަތް ހުއްޓާލަން ޖެހޭ ކަމަށް އަލީ ޒާހިރު ވިދާޅުވިއެވެ.
ސަލާމަތީ ޚިދުމަތްތަކުގެ ބޭފުޅުންނާ މެދު ނަފްރަތު އުފެއްދުމަށް ކުރަމުންދާ މަސައްކަތް ހުއްޓާލުމަށް ގޮވާލާފައި މިވަނީ، މި މަހުގެ 6 ވަނަ ދުވަހު، ކުރީގެ ރައީސް އަދި ރައްޔިތުން މަޖިލީހުގެ ރައީސް ނަޝީދަށް އަމާޒުކޮށްދިން ޓެރަރިސްޓް ހަމަލާއާ ގުޅިގެން އެމްއެންޑީއެފްއަށް އާއްމުންގެ ފާޑު ކިޔުން އަމާޒުވެފައިވާ ދަނޑިވަޅެއްގައެވެ. މި ހަމަލާއާ ގުޅިގެން އިންޓެލިޖެންސްގެ އެއްވެސް މައުލޫމާތެއް ލިބިފައިނުވާ ކަމަށް ފުލުހުން ބުނެފައިވާތީ އެކަމާ ވެސް ގިނަ ބަޔަކު ކަންބޮޑުވުންފާޅު ކޮށްފައިވެއެވެ. މީގެ އިތުރުން ރައީސް ނަޝީދުގެ ދަރިކަނބަލުންނާއި އެމަނިކުފާނުގެ އާއިލީ ބައެއް މެމްބަރުން ޑިފެންސް މިނިސްޓަރ މާރިޔާ އަހުމަދު ދީދީގެ އިސްތިއުފާއަށް ވެސް ގޮވާލާފައިވެއެވެ.
ރައީސް ނަޝީދު އަވަހާރަކޮށްލަން ދިން މިހަމަލާގައި ސީރިއަސް ގިނަ ޒަހަމްތަކެއް ލިބިވަޑައިގެންނެވިއެވެ. އޭޑީކޭގައި ފަރުވާ ހޯއްދެވުމަށްފަހު މިހާރު ހުންނެވީ ލިބިވަޑައިގެންނެވި ޒަޚަމްތަކަށް އިތުރު ފަރުވާ ހޯއްދެވުމަށް ޖަރުމަންވިލާތުގައެވެ.
