ކޮވިޑަށް ޚާއްސަ ޕޯޓަލެއް ފުވައްމުލަކުގައި ތައާރަފުކޮށްފި
ހޯމަދުވަހުން ފެށިގެން މަސް މާރުކޭޓުގައި މަސްކެނޑުން ވަގުތީ ގޮތުން ހުއްޓާލަނީ
ފުވައްމުލައް ސިޓީގައި ކޮވިޑަށް ޚާއްސަކޮށްގެން ތައާރަފުކުރި ޕޯޓަލް
ފުވައްމުލަކުގެ ކޮވިޑް ހާލަތުގެ އެއްމެ ފަހުގެ މައުލޫމާތުތައް ފޯރުކޮށްދިނުމަށް ޚާއްސަ ޕޯޓަލް އިފްތިތާހު ކޮށްފިއެވެ.
ޕޯޓަލް އިފްތިތާހު ކޮށްދެއްވީ ފުވައްމުލައް ސިޓީގެ މޭޔަރ އިސްމާއިލް ރަފީގެވެ. މިއީ އެއް ތަނަކުން ހުރިހާ މައުލޫމާތެއް ރައްޔިތުންނަށް ފޯރުކޮށްދިނުމަށް ތައްޔާރުކޮށްފައިވާ ޕޯޓަލްއެކެވެ.
މި މައުލޫމާތުތައް މި ގޮތަށް ދިނުމަށް ނިންމީ، މިކަންކަމަށް ބަލައި، ރައްޔިތުން އިތުރަށް ހޭލުންތެރިވެ، މިކަމުން އަރައިގަތުމަށް ފަރުދީ ފެންވަރެއްގައި މަސައްކަތް ކުރުމުގެ ބޭނުމުގައެވެ.
ފުވައްމުލަކުގައި ކޮވިޑާއި ގުޅިގެން އަޅާފައިވާ ފިޔަވަޅުތަކުގެ ތެރޭގައި، އެގެއެއްގައި އުޅޭ ބިދޭސީން ފިޔަވައި އެހެން ބިދޭސީން ގެއަށް ގެންގޮސްގެން މަސައްކަތް ކުރުވުން ވަނީ މަނާކޮށްފައެވެ. ސިޓީ ކައުންސިލުން ބުނީ، މިހެން މިކަން ނިންމާފައި އޮތްނަމަވެސް ބިދޭސީން ގެއަށް ގެންގޮސްގެން މަސައްކަތްކުރާ ކަމުގެ ޝަކުވާ ލިބެމުންދާ ކަމަށެވެ. މިގޮތަށް އަމަލުކުރާނަމަ ފިޔަވަޅު އަޅަންޖެހޭނެކަން ކައުންސިލުން ފާހަގަކުރެއެވެ.
މޭޔަރ ވިދާޅުވީ، ފުވައްމުލަކުގައި ސައްހަ ލިޔެކިޔުން ނެތި މަސައްކަތްކުރާ ބިދޭސީން ފޮނުވާލުމަށް އިކޮނޮމިކް މިނިސްޓްރީއާއެކު މަޝްވަރާ ކުރައްވަމުން ގެންދަވާ ކަމަށެވެ. އަދި ބިދޭސީންގެ ދަފްތަރެއް އެކުލަވާލުމަށް މަސައްކަތް ކުރަމުން އަންނަ ކަމަށްވެސް މޭޔަރ ވިދާޅުވިއެެވެ. ފުވައްމުލަކުގައި ޕޮޒިޓިވްވާ މީހުންގެ ތެރެއިން ގިނައީ ބިދޭސީންނެވެ.
ފުވައްމުލަކުގައި ކޮވިޑާ ގުޅިގެން އަޅާފައިވާ ފިޔަވަޅުތައް ވަރުގަދަ ކުރުމުގެ ގޮތުން ހޯމަދުވަހުން ފެށިގެން މަސްމާރުކޭޓުގެ މަސް ކެނޑުންވެސް ވަގުތީ ގޮތުން މެދުކަނޑާލަން ވަނީ ނިންމާފައެވެ.
ފުވައްމުލަކުން ފާއިތުވި ސައުވީސްގަޑިއިރުގެ ތެރޭގައި ނަތީޖާ ލިބުނީ 80 ސާމްޕަލެކެވެ. އޭގެ ތެރެއިން 22 ސާމްޕަލަކީ ޕޮޒިޓިވް ސާމްޕަލެވެ. ޕޮޒިޓިވް ސާމްޕަލް ތަކުގެ ތެރޭގައި ހިމެނެނީ، 10 ބިދޭސީންނާއި، 12 ދިވެހިންނެވެ.
އެކްޓިވް 232 ކޭސް މިހާރުވެސް އޮތް އިރު އޭގެތެރޭގައި ހިމެނެނީ 62 ބިިދޭސީންނާއި، 170 ދިވެހިންނެވެ. 457 ގެއެއް މޮނިޓަރިންއަށް ލާފައިވާއިރު، ހައި ރިސްކް 191 މީހަކު އެބަތިބިކަމަށް ހޮސްޕިޓަލުން މައުލޫމާތުދެއެވެ
