އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން، އޭނާގެ ލޯބިވެރިޔާ ކެރީ ސިމަންޑްސްއާ ކައިވެނި ބައްލަވައިގެންފިއެވެ.

ބޮޑުވަޒީރުގެ އޮފީހުގެ ތަރުޖަމާނަކު ވިދާޅުވެފައިވަނީ، ޖޯންސަން ކައިވެނި ބައްލަވައިގެންފައިވަނީ ހޮނިހިރު ދުވަހު ކަމަށާއި، އަދި އެ ހަފުލާގައި ބައިވެރިވީ ދެބޭފުޅުންގެ އާއިލާގެ މެމްބަރުންނާއި ގާތް އެކުވެރިން އެކަނި ކަމަށެވެ.

ރިޕޯޓްތައް ބުނާ ގޮތުން ޖޯންސަން އަކީ ފާއިތުވި 200 ވަރަކަށް އަހަރުގެ ތެރޭގައި ބޮޑުވަޒީރުކަމުގެ މަގާމުގައި ހުންނަވައި، ކައިވެނި ބައްލަވައިގެން ފުރަތަމަ ބޭފުޅާއެވެ.

2019 ވަނަ އަހަރު އިނގިރޭސިވިލާތުގެ ބޮޑުވަޒީރު ކަމަށް ވަޑައިގެންނެވި ޖޯންސަން މީގެ ކުރިން ދެފަހަރަކު ކައިވެނި ބައްލަވައިގަތެވެ. އަދި އެ ކައިވެނިފުޅުތަކަށް 4 ބޭފުޅުން ވަނީ ލިބިވަޑައިގެންފައެވެ.