ސްރީލަންކާގެ އައްސޭރިއާ ގާތުން އަނދަމުންދާ ކޮންޓެއިނަރު ބޯޓުގެ ސަބަބުން އެގައުމުގެ ގޮނޑުދޮށަށް ޕްލާސްޓިކް ކުނި ލައްގައި ތިމާވެއްޓަށް ގެއްލުންވަމުންދާ ކަމަށް ލަންކާގެ އޮފިޝަލަކު ވިދާޅުވެއްޖެއެވެ.

ލަންކާގެ ކަނޑުގެ ސަރަހައްދުގައި މި މަހު 20ގައި ރޯވި އެކްސްޕްރެސް ޕާލް ދަތުރުކުރަމުން ދިޔައީ ކެމިކަލްތަކާއި ކޮސްމެޓިކް ސާމާނު ބަރުކޮށްގެނެވެ. އެ ބޯޓުން ގޮނޑުދޮށަށް މިހާރު ޕްލާސްޓިކް އެތިކޮޅުތަކެއް ލައްގަމުންދާ ކަމަށާއި، އޭގެ ސަބަބުން އެގައުމަށް އަހަރުތަކަކަށް ދެމިގެންދާނެ ފަދަ ގެއްލުންތަކެއް ލިބިގެންދާނެ ކަމަށް ލަންކާގެ މެރިން ޕްރޮޓެކްޝަން އޮތޯރިޓީން ވަނީ ބުނެފައެވެ.

މެރިން ޕްރޮޓެކްޝަން އޮތޯރިޓީގެ ޗެއާމަން ދަރުޝަނީ ލަހަންދަފޫރު ވިދާޅުވީ މިއީ ލަންކާގެ ތާރީޚުގައިވެސް ގޮނޑުދޮށް އެންމެ ބޮޑަށް ތަޣައްޔަރުވުމުގެ ހާދިސާ ކަމަށެވެ.

ލަހަންދަފޫރު އިތުރަށް ވިދާޅުވީ ބޯޓުން ބޭރުވާ ކުނީގެ ސަބަބުން ކަނޑުގެ ދިރުންތަކަށް ލިބޭނެ ގެއްލުންތައް ދެނެގަތުމަށް ސާމްޕަލް ނަގާފައިވާ ކަމަށާއި އަދި ބޯޓުގައި ރޯވި އަލިފާންގަނޑުގެ ސަބަބުން ވައި ތަޣައްޔަރުވާ މިންވަރުވެސް ބަލަމުން އަންނަ ކަމަށެވެ.

ބޯޓުގައި ރޯވި އަލިފާންގަނޑު މިހާރު ކޮންޓްރޯލް ވެފައިވާ ކަމަށް ލަންކާގެ ކަނޑުގެ ސިފައިން ބުނެއެވެ. ލަންކާއިން ވަނީ ގެއްލުމުގެ ބަދަލުގައި ބޯޓުގެ ވެރިން 17 މިލިއަން ޑޮލަރު ދޭން ޖެހޭނެ ކަމަށް ވެސް ބުނެފައެވެ.