ސަޕްރައިޒިން ނަތީޖާތަކެއް ނެރެވިދާނެ: ކޫޕްމަން

ކުރިއަށް އޮތް ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ސަޕްރައިޒިން ނަތީޖާތަކެއް ނެރެވިދާނެ ކަމަށް ގައުމީ ފުޓްބޯޅަ ޓީމުގެ ކޯޗު ނެދަލެންޑްސްގެ މާޓިން ކޫޕްމަން ބުނެފިއެވެ.

ކޮލިފައިންގައި ރާއްޖެ ހިމެނޭ ގްރޫޕް އޭގެ ބާކީ ހުރި މެޗުތައް މި މަހުގެ 30 ވަނަ ދުވަހުން ފެށިގެން އަންނަ ޖޫން މަހުގެ 15 ވަނަ ދުވަހުގެ ނިޔަލަށް ޗައިނާގައި ކުޅެން ވަނީ ތާވަލުކޮށްފައެވެ. އެހެންކަމުން 25 ކުޅުންތެރިންގެ ފައިނަލް ސްކޮޑެއް އެކުލަވާލައި، ގައުމީ ޓީމުން އަންނަނީ ދުބާއީގައި ތަމްރީނުތައް ހަދަމުންނެވެ.

ދުބާއީގައި ކުރިއަށްގެންދާ ތަމްރީނުތަކުގެ ތެރެއިން ދިން އިންޓަވިއުއެއްގައި ކޫޕްމަން ބުނީ ކުރިއަށް އޮތް މެޗުތަކަށް ތައްޔާރުވުމަށް ވަރަށް ވަރުގަދައަށް ތަމްރީނުތައް ކުރިއަށްގެންދަން ޖެހޭ ކަމަށާއި، އެކަމަކު އެކަން ކުރަން ޖެހެނީ ބަލައިގެން ކަމަށެވެ. އެގޮތުން އެތައް ހަފުތާއެއް ވަންދެން ނުކުޅެ ތިބުމަށްފަހު، ވަރުގަދައަށް ތަމްރީނުކޮށްގެން އަނިޔާއެއްވުންވެސް އެކަށީގެންވާ ކަމަށް ވަނީ ބުނެފައެވެ.

މިދިޔަ އަހަރުގެ ޖެނުއަރީ މަހު ގައުމީ ޓީމާ ކޫޕްމަން ހަވާލުވި ފަހުން މިހާތަނަށް ގައުމީ ޓީމުން ރަސްމީ މެޗަކަށް ނުކުމެފައެއް ނުވެއެވެ. އަދި ދާދި ފަހުން ގައުމީ ޓީމާއެކު ހަދާފައި އޮތް އެއްބަސްވުން އިތުރު ތިން އަހަރަށް ކޫޕްމަން އާކުރިއިރު، އޭނާގެ ފުރަތަމަ މެޗަށް ވެގެންދާނީ އަންނަ މަހުގެ ތިން ވަނަ ދުވަހު ޗައިނާއާ ދެކޮޅަށް ނުކުންނަ މެޗެވެ.

އެ މެޗު ކުޅުމަށް ޗައިނާއަށް ފުރުމުގެ ކުރިން ކޫޕްމަން ބުނީ ރާއްޖޭގެ ގައުމީ ޓީމުގެ ކޯޗަށް ވުމުން އޭނާ ފަޚުރުވެރިވާ ކަމަށެވެ. އަދި މިއީ ޓީމަށް ކުރިމަތިވެފައި އޮތް އުދަނގޫ ހާލަތެއް ކަމަށާއި، އެކަމަކު މަސައްކަތް ކޮށްގެން ސަޕްރައިޒިން ނަތީޖާތަކެއް ނެރެވިދާނެ ކަމަށްވެސް ވަނީ ބުނެފަައެވެ.

މިދިޔަ ހަފުތާގެ އާދީއްތަ ދުވަހުން ފަށައިގެން ގައުމީ ޓީމުން ދުބާއީގައި ކޭމްޕް ކުރަމުން އަންނައިރު، މީގެ ކުރިން ރާއްޖޭގައި ތަމްރީނު ހެދުމުގެ ފުރުސަތު ގައުމީ ޓީމަށް ލިބިފައެއް ނުވެއެވެ. އެގޮތުން ގައުމީ ޓީމުގެ ކުޅުންތެރިން މީގެ ކުރިން ތަމްރީނު ހަދާފައިވަނީ އެ ކުޅުންތެރިން މާލޭގައި ކޭމްޕް ކޮށްގެން ތިބި ހޮޓެލް ޖެންގެ ބޯލްރޫމްގައެވެ. އެއާއެކު މީގެ ކުރިން ކޫޕްމަން ވަނީ އެކަމާ ކަންބޮޑުވުން ފާޅުކޮށްފައެވެ.

ކޮވިޑާ ގުޅިގެން ކޮލިފައިން މެޗުތައް ޗައިނާގައި ކުޅޭއިރު، ދުބާއީގައި ތަމްރީނުތައް ހެދުމަށް ފަހު އާދީއްތަ ދުވަހު ގައުމީ ޓީމު ޗައިނާއަށް ފުރުމަށް ވަނީ ހަމަޖެހިފައެވެ. ކޮލިފައިންގައި ރާއްޖެއަށް ބާކީ ތިން މެޗު އޮތްއިރު، އެއީ ޗައިނާ އާއި، ސީރިއާ އަދި ފިލިޕީންސާ ދެކޮޅަށް ކުޅެން އޮތް މެޗުތަކެވެ. މީގެ ތެރެއިން ސީރިއާ މެޗަކީ ރާއްޖޭގެ ހޯމް މެޗެކެވެ.

އޭޝިއަން ކަޕަށް ކޮލިފައިވުމަށް ރާއްޖެއިން އަމާޒުހިފާފައިވާއިރު، ކޮލިފައިންގައި ރާއްޖެ އޮތީ ހަތަރު މެޗުން ހަ ޕޮއިންޓާއެކު ގްރޫޕުގެ ހަތަރުވަނައިގައެވެ. ގްރޫޕުގެ އެއްވަނައިގައި އޮތީ ފަސް މެޗުން 15 ޕޮއިންޓާއެކު ސީރިއާއެވެ. ހަތަރު މެޗުން ހަތް ޕޮއިންޓާއެކު ދެވަނައިގައި ޗައިނާ އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓް ހޯދާފައިވާ ފިލިޕީންސެވެ. އަދި ރާއްޖޭގެ ފަހަތުން ފަސްވަނައިގައި އޮތީ ފަސް މެޗު ކުޅެގެން އަދި ޕޮއިންޓެއް ލިބިފައިނުވާ ގުއާމެވެ.