ގައުމީ ފުޓްބޯޅަ ޓީމާއެކު ހަދާފައި އޮތް އެއްބަސްވުން ނެދަލެންޑްސްގެ މާޓިން ކޫޕްމަން އާކޮށްފިއެވެ.

އުމުރުން 64 އަހަރުގެ ކޫޕްމަން ގައުމީ ޓީމުގެ އެއްބަސްވުން އިތުރު ތިން އަހަރަށް އާކޮށްފައެވެ. އޭނާ މިކަން އިއުލާން ކޮށްފައިވަނީ އަމިއްލަ އިންސްޓަރާމް އެކައުންޓް މެދުވެރިކޮށެވެ. އަދި ކޫޕްމަން ވަނީ އޭނާއަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކުރާ އިތުބާރަށް ޝުކުރުއަދާކޮށްފައެވެ.

ގައުމީ ޓީމުގެ އެއްބަސްވުން ކޫޕްމަން އިތުރު ތިން އަހަރަށް އާކުރިއިރު، އޭނާ ގައުމީ ޓީމާ ހަވާލުވެފައިވަނީ މިދިޔަ އަހަރުގެ ޖެނުއަރީ މަހުގެ 26 ވަނަ ދުވަހު ދެ އަހަރުގެ އެއްބަސްވުމެއްގެ ދަށުންނެވެ. އެކަމަކު ގައުމީ ޓީމާއެކު މިހާތަނަށް ކޫޕްމަން މެޗަކަށް ނުކުމެފައެއް ނުވެއެވެ.

އެއީ ކޮވިޑް-19 ގެ ސަބަބުން މިދިޔަ އަހަރު ކުޅެން އޮތް 2022 ވަނަ އަހަރުގެ ފީފާ ވޯލްޑް ކަޕާއި 2023 ވަނަ އަހަރުގެ އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަން މެޗުތަކާއި ސާފް ސުޒުކީ ކަޕް މި އަހަރަށް ފަސްކުރުމާ ގުޅިގެންނެވެ. މި މެޗުތައް ފަސްކުރި ނަމަވެސް މީގެ ކުރިން ގައުމީ ޓީމުން ވަނީ މިދިޔަ އަހަރު ދެ ފަހަރެއްގެ މަތިން ކޫޕްމަންއާއެކު ފަރިތަކުރުންތައް ކުރިއަށް ގެންގޮސްފައެވެ.

މިހާރު ތާވަލުކޮށްފައި އޮތް ގޮތުން ގައުމީ ޓީމުގެ ކޮލިފައިންގ މެޗުތައް މި އަހަރުގެ މާޗު މަހު ފަށާނެއެވެ. އެގޮތުން ރާއްޖެއިން ރަށުންބޭރުގައި ޗައިނާއާ ދެކޮޅަށް ކުޅޭ މެޗާއި، މާލޭގައި ސީރިއާއާ ދެކޮޅަށް ކުޅޭ މެޗު ވަނީ މާޗު މަހަށް ތާވަލުކޮށްފައެވެ. އަދި ރަށުން ބޭރުގައި ފިލިޕީންސާ ދެކޮޅަށް ކުޅެން އޮތް މެޗު ވަނީ ޖޫން މަހަށް ތާވަލުކޮށްފައެވެ.

ކޮލިފައިންގައި ރާއްޖެއަށް ބާކީ ތިން މެޗު އޮތްއިރު، ރާއްޖެ އޮތީ ކުޅުނު ހަތަރު މެޗުން ލިބުނު ހަ ޕޮއިންޓާއެކު ގްރޫޕުގެ ހަތަރުވަނައިގައެވެ. މި ގްރޫޕުގެ އެއްވަނައިގައި އޮތީ ފަސް މެޗުން 15 ޕޮއިންޓާއެކު ސީރިއާއެވެ. ހަތަރު މެޗުން ހަތް ޕޮއިންޓާއެކު ޗައިނާ ދެވަނައިގައި އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓް ހޯދާފައިވާ ފިލިޕީންސެވެ. އަދި ރާއްޖޭގެ ފަހަތުން ފަސްވަނައިގައި އޮތީ ފަސް މެޗު ކުޅެ ޕޮއިންޓެއް ލިބިފައިނުވާ ގުއާމެވެ.

މީގެ އިތުރުން މިދިޔަ އަހަރު ބާއްވަން ނިންމި ސާފް ސުޒުކީ ކަޕުވެސް މި އަހަރު ބާއްވާއިރު، މި އަހަރުގެ ސެޕްޓެމްބަރު މަހުގެ 19 ވަނަ ދުވަހުން ފެށިގެން 30 ވަނަ ދުވަހުގެ ނިޔަލަށް ބަންގްލަދޭޝްގައި މި މުބާރާތް ބާއްވަން ވަނީ ތާވަލުކޮށްފައެވެ.