އިންޑިއާގެ ކޮންސިއުލޭޓެއް އެޅުމަށް ހުށަހެޅުމާއި ގުޅިގެން އިދިކޮޅުން ކަންބޮޑުވުން ފާޅުކޮށްފި
އެހެން ސަރަހައްދެއްގައި ކޮންސިއުލޭޓް ޖެނެރަލް އޮފީހެއް ހުންނަން ޖެހޭ ސަބަބެއް ފެންނާކަށް ނެތް
އައްޑޫ ސިޓީ ހިތަދޫ - އިންޑިއާގެ ކޮންސިއުލޭޓެއް އައްޑޫގައި އެޅުމަށް އިންޑިއާ ސަރުކާރުން ވަނީ ނިންމާފައި
އިންޑިއާގެ ކޮންސިއުލޭޓް ޖެނެރަލް އޮފީހެއް އައްޑޫ ސިޓީގައި ގާއިމު ކުރަން ޖެހޭ އެއްވެސް ސަބަބެއް ފެންނާން ނެތްއިރު، އެފަދަ އޮފީހެއް އައްޑޫ ސިޓީގައި ޤާއިމު ކުރުމަށް ކުރެވެމުންދާ މަސައްކަތާއިމެދު އިދިކޮޅު ކޯލިޝަނުން ކަންބޮޑުވުން ފާޅުކޮށްފިއެވެ.
މިކަމާއި ގުޅިގެން އިދިކޮޅުން ނެރުނު ނޫސްބަޔާނެއްގައި ބުނެފައިވަނީ ޑިޕްލޮމެޓިކް އިމްތިޔާޒު ލިބޭ ކޮންސިއުލޭޓް ޖެނެރަލް އޮފީހެއް ދިވެހިރާއްޖޭގެ ވަކި ސަރަޙައްދެއްގައި ޤާއިމު ކުރުމަށް އިންޑިއާގެ ސަރުކާރުން ނިންމާފައިވާ ނިންމުމުގައި ސުވާލު އުފެދޭ ކަންތައްތަކެއް ހުރި ކަމަށް ޤަބޫލު ކުރާ ކަމަށެވެ. ޢާންމު ގޮތެއްގައި ބޭރު ޤައުމެއްގެ އޮފީހެއް ނުވަތަ ކޮންސިއުލޭޓެއް ޤާއިމު ކުރުމަށް ސަރުކާރުތަކުން ކުރަމުން ގެންދާ އާދަކާދައަށް ބަލާއިރު، އެކަމުގެ ރަސްމީ މަޝްވަރާތައް ދެ ޤައުމުގެ ދޭތެރޭ ކުރެވޭ ކަމަށެވެ.
އަދި ކޮންސިއުލޭޓް ޖެނެރަލްގެ އޮފީހެއް ގާއިމު ކުރަންޖެހޭ ސަބަބުތަކުގެ ތެރޭގައި އެ އޮފީހެއް ނިސްބަތް ވާ ގައުމުގެ ރައްޔިތުން ގިނަ ޢަދަދަކަށް އޮފީސް ގާއިމު ކުރެވޭ ސަރަހައްދުގައި އުޅޭތީ އެފަރާތްތަކަށް ދޭން ޖެހޭ ހިދުމަތްތައް ދިނުމުގައި ދަތިތައް ކުރިމަތިވުން އެއީ މައިގަނޑު އެއްސަބަބު ކަމުގައި ބެލެވޭ ކަމަށެވެ. އެހެންކަމަށްވާއިރު، ރާއްޖޭގެ ވެރިރަށް މާލޭގައި ގާއިމު ކުރެވިފައިވާ އިންޑިއާގެ ހައިކޮމިޝަން ގެ އިތުރުން، އެހެން ސަރަހައްދެއްގައި އެގައުމުގެ ކޮންސިއުލޭޓް ޖެނެރަލް އޮފީހެއް ހުންނަން ޖެހޭ ސަބަބެއް ފެންނަން ނެތް އިރު، މިފަދަ ހައްސާސް ވަގުތެއްގައި އެފަދަ އޮފީހެއް އައްޑޫ ސިޓީގައި ގާއިމު ކުރުމަށް އިންޑިއާ ސަރުކާރުން ނިންމާފައި ވުމަކީ ސުވާލު އުފެދޭ ކަމެއް ކަމަށް އިދިކޮޅުން ބުނެއެވެ. އަދި އެކަމުގައި ދިވެހި ސަރުކާރުން އަމަލު ކުރަމުން ގެންދާ ގޮތާ މެދު ކޯލިޝަނުން ވަނީ ކަންބޮޑުވުން ފާޅުކޮށްފައެވެ.
މީގެ އިތުރުންވެސް، އެފަދަ ނިންމުމެއް ނިންމަންވާނީ، އެފަދަ ހުށަހެޅުމެއް ދިވެހި ސަރުކާރަށް ލިބި، އެކަމަކީ ކޮންމެހެން ވެސް ކުރަންޖެހޭ ކަމެއްކަމަށް ދިވެހި ސަރުކާރަށް ފެނިއްޖެ ހިނދެގައި ލިޔެވި ގެޒެޓް ކުރެވިފައިވާ ހަރުދަނާ އުސޫލުތަކެއްގެ ތެރެއިން ކަމުގައި ވެސް ގަބޫލުކުރާ ކަމަށް އިދިކޮޅުން ވަނީ ބުނެފައެވެ. ހަމައެހެންމެ، މިފަހަކަށް އައިސް އިންޑިއާއާއި ރާއްޖެއާ ދެމެދު ހިނގާ ބައެއް މުއާމަލާތްތަކުގެ ފުރިހަމަ ތަފްސީލް އާންމުކުރުމަށް ދިވެހި ސަރުކާރުން ފަސްޖެހޭތީ އެކަމުގެ ކަންބޮޑުވުންތައް ދިވެހި ރައްޔިތުން ނުހަނު ބޮޑަށް ފާޅުކުރަމުން ގެންދާ މިފަދަ ދަނޑިވަޅެއްގައި، އައްޑޫ ސިޓީގައި އިންޑިއާގެ ކޮންސިއުލޭޓް ޖެނެރަލް އޮފީހެއް ހުޅުވުމުގެ ވާހަކަވެސް އާންމު ރައްޔިތުންނާ ހަމައަށް ތިލަވެގެން މިއައީ އެކަން ހިނގަންވާނެ އެންމެ ރަނގަޅު މަގުން ނޫންކަމުގައި ދެކޭ ކަމަށް ބުނެފައިވެއެވެ.
އެހެންކަމުން، އައްޑޫ ސިޓީގައި އިންޑިއާގެ ކޮންސިއުލޭޓް ޖެނެރަލްގެ އޮފީހެއް ގާއިމުކުރުމަށް ބޭނުންވާ ސަބަބުތައް ވަރަށް ތަފްސީލުކޮށް ދިވެހި ރައްޔިތުންނަށް ހާމަކޮށްދެއްވުމަށް އިދިކޮޅުން ސަރުކާރަށް ވަނީ ގޮވާލާފައެވެ. އަދި ރާއްޖޭގެ ތަރައްގީއަށް އިސްކަންދީ ރައްޔިތުންގެ ކުރިއެރުމަށް މަސައްކަތްކުރުމަށް ވެސް ގޮވާލާފައިވެއެވެ. އެއާއެކު ރައްޔިތުންގެ ހިތުގައި ބިރުވެރިކަމާއި ނުތަނަވަސްކަމަށް ޖާގަ ނުދިނުމަށް އިދިކޮޅު ކޯލިޝަނުންވަނީ ގޮވާލާފައެވެ.
އައްޑޫ ސިޓީގައި ކޮންސިއުލޭޓެއް ގާއިމް ކުރުމަށް އިންޑިއާ ސަރުކާރުން ނިންމާފައިވާ އިރު، ރާއްޖޭގައި ހުންނަ އިންޑިއާ ހައިކޮމިޝަނުން ބުނީ ކޮންސިއުލަރ ޚިދުމަތްތައް އަވަސްމިނެއްގައި ދިނުމަށް ހައިކޮމިޝަނަކާއެކު ކޮންސިއުލޭޓްތައް ގާއިމުކޮށް ޚިދުމަތް ދިނުމަކީ މުހިންމު ކަމެއް ކަމުގައެވެ. އިންޑިއާގައިވެސް ރާއްޖޭގެ ހައިކޮމިޝަން ވެރިރަށް ދިއްލީގައި ހުރި އިރު، އެންމެ ގިނަ އަދަދަކަށް ދިވެހިން ދަތުރުކުރާ ޓްރިވެންޑްރަމްގައި ޚިދުމަތް ދެމުން އައުމުގެ މައިގަނޑު ސަބަބަކީ މިއީ ކަމަށް ހައިކޮމިޝަނުން ބުންޏެވެ.
މިފަދަ ނެޓްވޯކެއް ރާއްޖޭގައިވެސް އޮތުން މުހިންމުކަން ފާހަގަކޮށް އިންޑިއާ ހައިކޮމިޝަނުން ވަނީ ޚިދުމަތްތައް ހަރުދަނާކުރުމަށް އައްޑޫގައި އިންޑިއާގެ ކޮންސިއުލޭޓެއް ގާއިމުކުރަން ނިންމައި އެކަމުގެ ހުއްދަ އިންޑިއާ ސަރުކާރުން ދީފައިވާކަން ހާމަކޮށްފައެވެ. މިކަމުގައި ރާއްޖޭގެ ސަރުކާރުން އަދި ވަކިގޮތެއް ނުނިންމާކަން ފާހަގަކޮށް އިންޑިއާއިން ވަނީ މި ނިންމުމަށް އިންތިޒާރު ކުރަމުންދާ ކަމަށް ބުނެފައެވެ.
އެންމެ ފަހުން ރައީސް އިބްރާހިމް މުހައްމަދު ސާލިހު ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވެފައިވަނީ އިންޑިއާގެ ކޮންސިއުލޭޓެއް އައްޑޫ ސިޓީގައި ތަރައްޤީކުރުމުގެ ވާހަކަ މިހާތަނަށް އައިރު، ސަރުކާރާއި ރަސްމީކޮށް ހިއްސާކޮށްފައި ނުވާކަމަށެވެ. ރައީސް ވިދާޅުވީ އިންޑިއާގެ ކޮންސިއުލޭޓެއް އައްޑޫގައި ގާއިމުކުރުމުގެ ކަންކަން ކުރަނީ އިންޑިއާ ސަރުކާރުން އިސްނަގައިގެންކަމަށެވެ. އިންޑިއާގެ ކޮންސިއުލޭޓެއް އައްޑޫގައި ގާއިމުކުރަން ނިންމައި އެކަމުގެ ހުއްދަ އިންޑިއާ ސަރުކާރުން ދިންނަމަވެސް، މިކަމާ ގުޅޭ ޑިޕްލޮމެޓިކް އެއްވެސް މަޝްވަރާއެއް ކޮށްފައި ނުވާކަމަށް ވިދާޅުވިއެވެ. ރައީސް ޞާލިޙް ވަނީ އައްޑޫ ކޮންސިއުލޭޓް ތަރައްޤީކުރުމުގެ ވާހަކަ މިހާތަނަށް އައިރު، ސަރުކާރާއި ރަސްމީކޮށް ހިއްސާކޮށްފަ ނުވާކަމަށް ވިދާޅުވެފައެވެ. ސަރުކާރުންވެސް މިކަމުގައި އަދި ވަކި ގޮތެއް ނުނިންމާކަމަށް ރައީސުލްޖުމްހޫރިއްޔާ ވިދާޅުވިއެވެ.
