ލޯކަލް އައިލެންޑް ޓޫރިޒަމް މެގަޒިންގެ 7 ވަނަ އަދަދު ނެރެފި

އޯރކާ މީޑިއާ ގްރޫޕުން ނެރޭ "ލޯކަލް އައިލެންޑް ޓޫރިޒަމް މެގަޒިން" ގެ 7 ވަނަ އަދަދު ނެރެފިއެވެ.

އޯރކާ މީޑިއާ ގްރޫޕަކީ 2010 ވަނަ އަހަރުން ފެށިގެން މީޑިއާ އަދި މާކެޓިން ހަރަކާތްތަކުގައި ރާއްޖޭގެ މަސައްކަތްކުރާ ކުންފުންޏެކެވެ. "ލޯކަލް އައިލެންޑް ޓޫރިޒަމް މެގަޒިން" ގެ 7 ވަނަ އަދަދުގައި ރާއްޖޭގެ ގެސްޓްހައުސްތަކާއި ލޯކަލް ޓޫރިޒަމާއި ގުޅުންހުރި ގިނަ ބައިތަކެއް ވަނީ ހިމަނާފައެވެ. އޭގެތެރޭގައި ރާއްޖޭގައި ލޯކަލް އައިލެންޑް ޓޫރިޒަމް ފެށިގެން އައިގޮތާއި، ރާއްޖޭގެ ތާރީޚާއި، ސަގާފަތާއި، އާދަކާދަތައް ވަނީ ހިމަނާފައެވެ.

"ލޯކަލް އައިލެންޑް ޓޫރިޒަމް މެގަޒިން" ގެ 7 ވަނަ އަދަދުގައި ވަކިން ޚާއްސަކޮށް ފުވައްމުލަކުގެ ވާހަކަތައް ވަނީ ގެނެސްދީފައެވެ. މި މެގަޒިންގެ ކަވަރ ފޮޓޯގައިވެސް ބޭނުންކޮށްފައިވަނީ ފުވައްމުލަކުގެ ފޮޓޯއެކެވެ. އަދި ލޯކަލް ޓޫރިޒަމްގައި މިހާރު ރާއްޖޭގައި އެންމެ ކުރިއަރާފައިވާ ރަށްރަށުގެ ލިސްޓެއްވެސް މި މެގަޒިންގައި ވަނީ ހިމަނާފައެވެ. ރާއްޖޭގެ 100 އަށްވުރެ ގިނަ ގެސްޓްހައުސްގެ މައުލޫމާތުވެސް ހިލޭ މި މެގަޒިންގައި ވަނީ ހިމަނާދީފައެވެ.

"ލޯކަލް އައިލެންޑް ޓޫރިޒަމް މެގަޒިން" ކުރިން ޝާއިއުކޮށްފައިވަނީ "ގެސްޓްހައުސް މޯލްޑިވްސް މެގަޒިން" ގެ ނަމުގައެވެ. މިއީ ރާއްޖޭގައި ލޯކަލް އައިލެންޑް ޓޫރިޒަމަށް ޚާއްސަކޮށްގެން ނެރޭ ހަމައެކަނި މެގަޒިންއެވެ. މި މެގަޒިން ޕަބްލިޝްކުރަން ފަށާފައިވަނީ 2015 ވަނަ އަހަރުއެވެ.

މި މެގަޒިން ޕަބްލިޝް ކުރަނީ އަހަރަކު 1 ފަހަރުއެވެ. މެގަޒިންގެ އެންމެ ބޮޑު ބޭނުމަކީ ލޯކަލް އައިލެންޑް ޓޫރިޒަމް ކުރިއަރުވައި، ޕްރޮމޯޓްކޮށް، ގެސްޓްހައުސްތަކާއި ގުޅުންހުރި މައުލޫމާތު ފޯރުކޮށްދިނުމެވެ. ރާއްޖޭގައި މިހާރުވެސް 600 އަށްވުރެ ގިނަ ގެސްޓްހައުސް އަންނަނީ ރަޖިސްޓްރީކޮށްގެން ހިންގަމުންނެވެ.

މި މެގަޒިން ވަނީ ޓޫރިޒަމް މިނިސްޓްރީ އަދި މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން، އެމްއެމްޕީއާރުސީން އެންޑޯޒްވެސްކޮށްފައެވެ. އަދި ލޯކަލް އައިލެންޑް ޓޫރިޒަމް ޕްރޮމޯޓްކުރަން އެމްއެމްޕީއާރުސީން ބޭނުންކުރާނެ އޮފިޝަލް މެގަޒިންއަކީވެސް މިއީއެވެ. ރާއްޖެއިން ބޭރުގައި ބާއްވާ ބޮޑެތި ފަތުރުވެރިކަމުގެ ފެއަރތަކުގައިވެސް މި މެގަޒިން ބަހައެވެ.