780ށް ވުރެ ގިނަ ދަނޑުވެރިންނާއެކު އެގްރީމަންޓް ހެދުމުގެ މަސައްކަތް ކުރިއަށްދާ ކަމަށް އެގްރޯ ނެޝަނަލް ކޯޕަރޭޝަން (އެގްރޯނެޓް) ގެ މެނޭޖިންގ ޑިރެކްޓަރ ހާރޫން ރަޝީދު ވިދާޅުވެއްޖެއެވެ.

ރާއްޖެޓީވީގެ ވިޔަފާރި މިއަދު ޕްރޮގްރާމަށް ދެއްވި އިންޓަވިއުއެއްގައި ހާރޫން ވިދާޅުވީ 1500ށް ވުރެ ގިނަ ދަނޑުވެރިން ޝައުގުވެރިކަން ފާޅުކުރި ނަމަވެސް ޝަރުތު ހަމަވެފައިވަނީ 780 އެއްހާ ދަނޑުވެރިން ކަމަށެވެ. އަދި އޭގެ ތެރެއިން 500ށްވުރެ ގިނަ ދަނޑުވެރިންނާއެކު މިހާރު އަމަލީ މަސައްކަތް ފަށާފައިވާ ކަމަށެވެ. ދަނޑުވެރިން ތިބީ ވަރަށް ބޮޑު އުންމީދެއްގައިކަން ފާހަގަކުރައްވައި ހާރޫން ވިދާޅުވީ މި ރޯދަ މަހު ވެސް ދަނޑުވެރިން އުފެއްދި ބާވަތްތައް އެގްރޯނެޓުން ގަނެ މާރކެޓްކޮށްފައިވާ ކަމަށެވެ. 10 ރިސޯޓަކުން އެތަކެތި ގަނެފައިވާ ކަމަށް އޭނާ ވިދާޅުވިއެވެ.

އެގްރޯނެޓާއެކު ދަނޑުވެރިން މަސައްކަތް ކުރުމަށް ހުށަހަޅާއިރު ވަކި ޝަރުތުތަކެއް ފުރިހަމަވާން ޖެހެއެވެ. އެގޮތުން ބައެއް ޝަރުތުތަކަކީ ދިވެއްސެއް ކަމުގައިވުމާއި ކައުންސިލުން ހުއްދަ ދޫކޮށްފައިވާ ބިމެއްގައި ދަނޑުވެރިކަން ކުރާ ފަރާތަކަށް ވާން ޖެހެއެވެ.

ދަނޑުވެރިންނާއި ގުޅިގެން އެގްރޯނެޓް ކުންފުނިން ހައްދަން ސަރުކާރުން ހަވާލުކޮށްފައިވަނީ 17 ބާވަތެކެވެ. މި 17 ބާވަތުގެ ތެރެއިން ކޮންމެ ދަނޑުވެރިޔަކަށްވެސް ކޮންމެވެސް ދެ ބާވަތެއް ނެގުމުގެ ފުރުސަތު ލިބެއެވެ.  

އެ ދެ ބާވަތް ހެއްދުމަށްޓަކައި ބޭނުންވާ މުޑުވައް ކުންފުނިން ފޯރުކޮށްދީ އެ ޝެޑިއުލްގެ ދަށުން ދަނޑުވެރިޔާ މަސައްކަތް ކުރިއަށް ގެންދަން ޖެހޭނެ ކަމަށް އެގްރޯނެޓުން ބުންޏެވެ. މީގެ އިތުރަށް ބޭނުންވާ ގަސްކާނާއާ އެހެނިހެން ވަސީލަތްތައްވެސް ފޯރުކޮށްދޭނެއެވެ.

ދަނޑުވެރިކަން ތަރައްގީ ކުރުމަށާއި ދަނޑުވެރިން އުފައްދާ ތަކެތި މާކެޓް ކުރުމަށް ސަރުކާރުން އުފައްދާފައިވާ އެގްރޯ ނޭޝަނަލް ކޯޕަރޭޝަންގެ މަސައްކަތްތައް ރާއްޖޭގެ އެކި ސަރަހައްދުތަކުގައި ކުރިއަށްދާއިރު، ދަނޑުވެރިން ހައްދާ ތަކެތިން ބޮޑު މާކެޓެއް އުފައްދައި ދެއަހަރު ތެރޭގައި ރައްޔިތުންނަށް ވީހާވެސް ބޮޑަށް އޭގެ މަންފާ ލިބިގެންދާނެކަމަށް ހާރޫން ވިދާޅުވެފައިވެއެވެ.

ދަނޑުވެރިންނަށް ހުރި އެންމެބޮޑު ގޮންޖެހުމަކީ ދަނޑުވެރިން އުފައްދާ ތަކެތި މާކެޓް ނުކުރެވުމާއި އިތުރަށް ތަރައްގީ ކުރުމަށް ބޭނުންވާ ވަސީލަތްތައް ނުލިބުން ކަމަށް ގިނަ ދަނޑުވެރިން ބުނެއެވެ. ދަނޑުވެރިންނަށް އެހީތެރިކަން ފޯރުކޮށް ދިނުމަށާއި އަދި ދަނޑުވެރިކަމުގެ ސިނާއަތު ކުރިއެރުވުމަށް މި ސަރުކާރުން އެގްރޯ ނޭޝަނަލް ކޯޕަރޭޝަން ނަމުގައި ކުންފުންޏެއް އުފެއްދީ މިދިޔަ އަހަރުގެ އޭޕްރީލް މަހުގެ 21 ވަނަ ދުވަހުއެވެ.