ދިރާގު ދިވެހި ޕްރިމިއާ ލީގު އަލުން ފެށޭނެ ކަމުގެ އުއްމީދު ކުޑަވުމާއެކު، ޚަރަދު ކުޑަކުރުމުގެ ގޮތުން ޔުނައިޓެޑް ވިކްޓަރީ (ޔޫވީ) އިން އެ ޓީމަށް ކުޅެމުން އަންނަ ބިދޭސީ ހަތަރު ކުޅުންތެރިން ދޫކޮށްލައިފިއެވެ.

މި ސީޒަނަށް ޔޫވީން ގެނައި ބިދޭސީ ހަތަރު ކުޅުންތެރިންނަކީ ޓީސީ ސްޕޯޓްސް ކުލަބުގައި 2018 ވަނަ އަހަރު މޮޅު ކުޅުމެއް ދެއްކި ކިރްގިސްތާންގެ މިޑްފީލްޑަރު އަނަޓޯލީ ވްލަސީޗޭވް އާއި، މީގެ ކުރިންވެސް ޔޫވީއަށް ކުޅެފައިވާ ކިރްގިސްތާނުގެ ގޯލްކީޕަރު ރުސްލާން އާމިރޯފާއި، ޔޫކްރޭނުގެ ފޯވާޑް ކީރްލޯ ސިލިޗް އަދި ކިރްގިސްތާނުގެ ޑިފެންޑަރު މަރަޓް އަދްޒިނިޔަޒޯފެވެ.

ދިވެހި ޕްރިމިއާ ލީގުގެ ކުޅުން ދެވަނަ ބުރަށް ފަހު މެދުކެނޑިފައިވާއިރު، ލީގުގެ ތިންވަނަ ބުރު ނުކުޅެ، މި ހިސާބުން ލީގު ނިންމާލުމުގެ ވިސްނުމެއް ގެންގުޅުއްވާ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ދާދި ފަހުން ވަނީ ވިދާޅުވެފައެވެ.

ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން ބައްސާމް ވިދާޅުވީ މިހާރުގެ ހާލަތަށް ބަލާއިރު ލީގު ދިގުދެމިގެންދިއުމުގެ ބަދަލުގައި، އޭނާގެ އަމިއްލަ ވިސްނުމަކީ ލީގުގެ ދެ ބުރު ކުޅެފައިވުމާއެކު، ތިންވަނަ ބުރު ނުކުޅެ މި ހިސާބުން ލީގު ނިންމާލުން ކަމަށެވެ. އެ ހިސާބުން ޕްރެޒިޑެންޓްސް ކަޕް ފަދަ މުބާރާތެއް ބޭއްވުމަށް މަސައްކަތްކުރާނެ ކަމަށްވެސް ވިދާޅުވިއެވެ.

އެހެންކަމުން ލީގު އަލުން ފެށޭނެ ކަމުގެ އުއްމީދު ކުޑަވުމާއެކު ޔޫވީން ވަނީ ބިދޭސީ ހަތަރު ކުޅުންތެރިން ދޫކޮށްލަން ނިންމާފައެވެ. އެއާއެކު އެ ހަތަރު ކުޅުންތެރިން ހުކުރު ދުވަހުގެރޭގެ ވަގުތެއްގައި އެނބުރި ގައުމަށް ފުރާފައިވާ ކަމަށް މައުލޫމާތު ލިބެއެވެ.

ލީގުގެ ދެވަނަ ބުރުގެ ކުޅުން ނިމިފައިވާއިރު، މި ފަހުން އެންމެ ރަނގަޅު ކުޅުމެއް ދައްކާފައިވާ އެއް ޓީމަކީވެސް ޔޫވީއެވެ. އެގޮތުން ލީގުގައި ކުޅުނު ފުރަތަމަ 11 މެޗުން ޔޫވީއަށް މޮޅެއް ނުލިބުނު ނަމަވެސް، ދެވަނަ ބުރުގެ ފަހު ތިން މެޗުން އެ ޓީމު ވަނީ މޮޅުވެފައެވެ. އެހެން ނަމަވެސް ތާވަލުގެ ފުލުގައި ޕޮއިންޓެއްގެ ފަރަގަކާއެކު ޔޫވީ އޮތްއިރު، ކުޅުނު 14 މެޗުން އެ ޓީމަށް ވަނީ 12 ޕޮއިންޓް ލިބިފައެވެ.