ޓެކްސް ދައްކަންޖެހޭ މުއްދަތު މީރާއިން ފަސްކޮށްފި

ޓެކުހާއި އަދި އެހެނިހެން ފީތައް ދައްކަން ޖެހޭ މުއްދަތު މޯލްޑިވްސް އިންލޭންޑް ރިވެނިއު އެތޯރިޓީ (މީރާ) އިން ފަސްކޮށްފިއެވެ.

މީރާއިން ވަނީ ޓެކްސް ދައްކަންޖެހޭ މުއްދަތު އަންނަ މަހުގެ 10ށް އިތުރުކޮށްފައެވެ. ސަރުކާރުން ކޮވިޑު ކޮންޓްރޯލް ކުރުމަށް އެޅި ފިޔަވަޅުތަކުގެ ސަބަބުން މާލެ ސަރަހައްދުގައި ހުންނަ މީރާގެ އޮފީސްތައް ހުޅުވައިގެން ޚިދުމަތް ދިނުން ޖޫން މަހުގެ 8 ވަނަ ދުވަހު ހުއްޓާލި ނަމަވެސް، އޮންލައިން ވަސީލަތްތައް މެދުވެރިކޮށް ޓެކްސް ދެއްކޭނެއެވެ. އެގޮތުން މީރާ ކަނެކްޓާއި ވާރުޕޭ މެދުވެރިކޮށް ޓެކުހާއި ފީ ދެއްކޭނެކަމަށް މީރާއިން ބުނެއެވެ.

މީރާގެ އޮފީސްތަކުގެ ޚިދުމަތް ވަގުތީ ގޮތުން މެދުކަނޑާލާފައިވާއިރު މީރާގެ ހޮޓްލައިން ނަންބަރަށް ސަރުކާރު ބަންދު ނޫން ކޮންމެ ދުވަހަކު ހެނދުނު 9:00ން ފެށިގެން 14:00ށް ގުޅޭނެކަމަށް މައުލޫމާތު ލިބެއެވެ. އަދި މީރާގެ ވައިބަރ ނަންބަރު 9821415 އަށް މެސެޖުކޮށްގެންވެސް މައުލޫމާތު ހޯދޭނެކަމަށް އެ އޮތޯރިޓީއިން ބުނެއެވެ.

އޭޕްރިލް މަހު މީރާ އިން ވަނީ 1.41 ބިލިއަން ރުފިޔާގެ އަމްދަނީއެއް ބަލައިގެންފައެވެ. އޭޕްރީލްމަހު މީރާއަށް ބަލައިގެން ފައިސާއަކީ ވޭތުވެދިޔަ އަހަރުގެ މި މުއްދަތުގައި ލިބުނު އާމްދަނީއަށްވުރެ 173.8 އިންސައްތަ އިތުރު އަދަދެކެވެ. އަދި އެއީ އޭޕްރީލް މަހު ލިބޭނޭ ކަމަށް މީރާއިން އަންދާޒާކުރި އަދަދަށްވުރެ 82.6 އިންސައްތަ އިތުރު އަދަދެކެވެ.