ކޮވިޑް-19ގެ އަސްލު ދެނެގަތުމުގެ ފޭސް ދެއަކަށް ޑަބްލިޔުއެޗްއޯއިން ތައްޔާރުވަނީ

ކޮވިޑް-19ގެ އަސްލު ދެނެގަތުމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)އިން ކުރަމުންދާ މަސައްކަތުގައި ދެވަނަ ފޭސްގެ މަސައްކަތްތައް ކުރިޔަށް ގެންދާނެގޮތުގެ ޕްރޮޕޯސަލްއެއް މާހިރުން އެކުލަވާލަމުން ގެންދާކަމަށް ޑަބްލިޔުއެޗްއޯގެ ސްޕޯކްސްވުމަން ފަދޭލާ ޗެއިބް ވިދާޅުވެއްޖެއެވެ.

ޑަބްލިޔުއެޗްއޯއިން މިކަން ހާމަކޮށްފައި މިވަނީ ކޮވިޑް-19ގެ އަސްލު ދެނެގަތުމުގެ ދެވަނަ ފޭސްގެ މަސައްކަތްތައް ކުރިޔަށް ގެންދިޔުމަށް އެމެރިކާއިން ގޮވާލާފައިވަނިކޮށެވެ. އެމެރިކާއިން ވަނީ މިނިވަން ޓީމަކުން އެމަސައްކަތްކުރުމަށް ގޮވާލާފައެވެ. އަދި މާހިރުންގެ ޓީމަށް ޗައިނާއިން އެންމެ ފުރަތަމަ ފެނުނު ކޮވިޑް-19ގެ ސާމްޕަލްތަކުގެ އަސްލާ ހަމައަށް ވާސިލްވުމުގެ ފުރުސަތު ފަހިކޮށްދިނުމަށްވެސް ވަނީ ގޮވާލާފައެވެ.

އެމެރިކާއިން މިކަމަށް ގޮވާލާފައިވަނިކޮށް އިނގިރޭސިވިލާތުންވެސް ވަނީ ހަމަ އެމޭރުމުން ވާހަކަދައްކާފައެވެ.

ޑަބްލިޔުއެޗްއޯގެ ސްޕޯކްސްވުމަން ހުކުރު ދުވަހު ވިދާޅުވީ އެޖަމިއްޔާގެ މާހިރުންގެ ޓީމަކުން ވައިރަސްގެ އަސްލު ދެނެގަތުމުގެ ތަހުގީގުކުރިޔަށް ގެންދާނެ ގޮތުގެ ޕްރޮޕޯސަލެއް ތައްޔާރުކުރުމަށްފަހު ޑަބްލިޔުއެޗްއޯގެ ޑިރެކްޓަރ ޖެނެރަލް ޓެޑްރޯސް އެދަނޮމް އަށް ހުށަހަޅާނެކަމަށެވެ. ނަމަވެސް އެކަންކުރާނެ ވަކި ތާރީޚެއް ހާމަކޮށްފައެއްނުވެއެވެ.

މިހަފްތާގެ ކުރީކޮޅު ޑަބްލިޔުއެޗްއޯގެ އެމަރޖެންސީ ކަންކަމުގައި ހަރަކާތްތެރިވާ އިސް މާހިރެއް ކަމުގައިވާ މައިކް ރިޔާން ވިދާޅުވީ މިމަސައްކަތް ކުރިޔަށް ގެންދާނެ ގޮތުގެ މަޝްވަރާތައް ކުރިޔަށް އޮތް ހަފްތާތަކުގައި މެމްބަރު ގައުމުތަކާއެކު ކުރިޔަށް ގެންދާނެކަމަށެވެ.

ޑަބްލިޔުއެޗްއޯގެ ޓީމެއް މިދިޔަ އަހަރު ފަހުކޮޅު ޗައިނާއަށް ގޮސް ވަނީ ވައިރަސްގެ އަސްލު ދެނެގަތުމަށް ދިރާސާތަކެއްކޮށްފައެވެ. އެދިރާސާތަކަށްފަހު އެކުލަވާލާފައިވާ ރިޕޯޓްގައި ކޮވިޑް-19 އަކީ ޗައިނާގެ ލެބޯޓްރީއަކުން އުފައްދާފައިވާ އެއްޗެއްކަމަށް ދެކެވޭ ވާހަކަތަކަށް ބާރުދޭ ކަންކަން ފެނިފައިނުވާ ކަމަށް ވަނީ ބުނެފައެވެ. އަދި ކޮވިޑް-19 އަކީ ވާލުގެ ޒަރީއާއިން ފެނިފައިވާ ވައިރަހެއް ކަމަށް ބެލެވޭކަމަށް ވަނީ ބުނެފައެވެ. ނަމަވެސް މިކަންކަން އިތުރަށް ބަލާ ތަހުގީގުކުރުމަށް އިތުރު ޑާޓާތައް ބޭނުންވާކަމަށް ވަނީ ބުނެފައެވެ.