ލޯކަލް ގަވަރމަންޓް އޮތޯރިޓީ (އެލްޖީއޭ) އަކީ ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީން ކުރާ މުހިންމު މަސައްކަތުގައި ދިމާވާ އެންމެހާ ގޮންޖެހުމާ ދަތިތައް ހައްލުކޮށްދިނުމަށް އެންމެ ގާތުން މަސައްކަތްކުރާނެ އިދާރާކަމުގައި ވާނެކަމުގެ ޔަގީންކަން އަރުވާ ކަމަށް އެ އޮތޯރިޓީގެ ޗީފް އެގްޒެކެޓިވް އޮފިސަރ ފާތިމަތު އަފްޝަން ލަތީފް ވިދާޅުވެއްޖެއެވެ.

ލޯކަލް ކައުންސިލްތަކާ އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކަށް އަމާޒުކުރެވިގެން މިމަހުގެ 23 އިން 27އަށް ކުރިއަށް ގެންދެވުނު އޮރިއެންޓޭޝަން ޕްރޮގްރާމް ނިންމުމުގެ ރަސްމިއްޔާތުގައި ވާހަކަ ދައްކަވަމުން އަފްޝަން ވިދާޅުވީ އެ އޮތޯރިޓީން އެންމެ ބޮޑު އިސްކަމެއް ދޭނީ ލާމަރުކަޒީ ނިޒާމް ފުރިހަމަކުރުމަށް ކުރަންޖެހޭ އެންމެހާ މަސައްކަތް ކުރުމަށާ، މިނިޒާމާ މެދު ރައްޔިތުންގެ އިތުބާރު އުފެއްދުމަށާ، މިނިޒާމުގެ ސަބަބުން ސީދާ ރައްޔިތު މީހާއަށް ފައިދާ ލިބޭކަން ކަށަވަރުކުރުމަށް ކަމަށެވެ. އަދި މިކަން ކުރެވޭނީ ކައުންސިލްތަކާ އަންހެނުންގެ ތަރައްގީއަށް މަސައްކަތްކުރާ ކޮމިޓީއާ އެ އޮތޯރިޓީއާ އޮންނަ ގުޅުން ވަރުގަދަވެ ހަރުދަނާވެގެން ކަމަށެވެ. މީގެ ކުރިންވެސް އެލްޖީއޭއާ ކައުންސިލްތަކާ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެދުގައި ވަރަށް ގާތް ގުޅުމަކާ އިތުބާރެއް އޮންނަކަން ފާހަގަކުރައްވާ އެކަން އެގޮތަށް ދެމިއޮންނާނެކަމަށް އުންމީދު ކުރައްވާ ކަމަށް އަފްޝަން ވިދާޅުވިއެވެ.

އޮރިއެންޓޭޝަން ޕްރޮގްރާމް ނިމުމަކަށް އައި ނަމަވެސް، މީގެ އިތުރުންވެސް ކައުންސިލްތަކާ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ކެޕޭސިޓީ ބިލްޑިންގ އަށް އަމާޒުކޮށްގެން ގިނަ ޕްރޮގްރާމްތަކެއް ހިންގުމަށް ވިސްނާކަމަށް އަފްޝަން ވިދާޅުވިއެވެ. އަދި މިދިޔަ އަހަރު ފާސްކުރެވުނު އެލްޖީއޭގެ ކުރިއަށް އޮތް 3 އަހަރުގެ އެކްޝަން ޕްލޭންގައިވެސް އެންމެ ބޮޑު އިސްކަމެއް ދީފައިވާ އެއް ކަމަކީ ކައުންސިލްތަކަށް ތަމްރީނާ ތަޖުރިބާގެ ފުރުސަތުތައް ހޯދަދިނުން ކަމަށާ، މިކަމަށް މިހާރުވެސް މަސައްކަތް ކުރެވެމުން ދާކަމަށެވެ. ހަމައެއާއެކު، ކައުންސިލަރުން ހުވާކުރައްވާތާ 3 މަސް ދުވަހުގެ ތެރޭގައި ލޭންޑް ޔޫސް ޕްލޭނާ ލޯކަލް ޑިވެލޮޕްމަންޓް ޕްލޭން ހުށަހަޅުއްވަން ލާޒިމްވާތީ، މިކަމަށް އަމާޒުކޮށްގެން ސެޝަންތަކެެއް ނެގުމަށްވެސް ތައްޔާރުވަމުންދާކަމަށް އަފްޝަން ވިދާޅުވިއެވެ.

މި އޮރިއެންޓޭޝަނަށް 13 މުއައްސަސާއަކުން 25 ޕްރެޒެންޓަރުން އެލްޖީއޭ ހިމެނިގެން ބައިވެރިވެވަޑައިގެންފައިވެއެވެ. ޕްރޮގްރާމްގެ ސެޝަން ތަކުގައި 1000 އަށްވުރެ ގިނަ ބައިވެރިން ބައިވެރިވެފާތީއާއި ވަރަށް ގިނަ ބޭފުޅުން ގްރޫޕްއެއްގެ ގޮތުގައި ބައިވެރިވެވަޑައިގެންފައިވާތީ މިއަދަދު މިއަށްވުރެ ގިނަ ވާނެކަމަށް އެލްޖީއޭއިން ބުނެއެވެ. މިއޮރިއެންޓޭޝަން ޕްރޮގްރާމް ކުރިއަށް ގެންދެވިފައިވަނީ ގިނަ ފަރާތްތަކެއްގެ އެހީއާ އެއްބާރުލުމާ އެކީގައެވެ. އެގޮތުން މިޕްރޮގްރާމް ހިންގުމަށް އިންޓަނޭޝަނަލް ރިޕަބްލިކަން އިންސްޓިޓިއުޓް މޯލްޑިވްސް (އައިއާރްއައިމޯލްޑިވްސް) ގެ ބޮޑު މާލީ އަދި ފަންނީ އެހީތެރިކަމެއް ލިބިފައިވެއެވެ.

މިޕްރޮގްރާމްގެ ސެޝަންތައް ނެންގެވުމުގައި، އައިއާރުއައިގެ އިތުރުން، ރައީސުލްޖުމްހޫރިއްޔާގެ އޮފީހާ، ސަރުކާރުގެ 6 ވުޒާރާއަކާ 2 މުއައްސަސާއަކާ، ޔޫއެންޑީޕީއާ ޓްރާންސްޕޭރަންސީ މޯލްޑިވްސް ބައިވެރިވިއެވެ. އޭގެތެރޭގައި މިނިސްޓްރީ އޮފް ނެޝަނަލް ޕްލޭނިންގ ހައުންސިންގ އެންޑް އިންފްރާސްޓްރަކްޗަރ، މިނިސްޓްރީ އޮފް އިސްލާމިކް އެފެއާޒް، މިނިސްޓްރީ އޮފް ފިނޭންސް، މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަމަންޓް، މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ސަރވިސަސް، މިނިސްޓްރީ އޮފް އިކޮނޮމިކް ޑިވެލޮޕްމަންޓް، ސިވިލް ސަރވިސް ކޮމިޝަން އަދި މޯލްޑިވްސް ޕޮލިސް ސަރވިސް ހިމެނެއެވެ.