އެމްޑަބްލިޔުއެސްސީން މެއިމަހުގެ ބިލުން ޑިސްކައުންޓް ދެނީ
ގްރޭޓަރ މާލެ ސަރަހައްދާއި ރ.ދުވާފަރު ، ކ.މާފުށި އަދި ހދ ކުޅުދުއްފުށީގެ ކޮންމެ ގޭބިސީއެއްގެ ބިލުން ޑިސްކައުންޓް ދޭނެ
އެމްޑަބްލިޔުއެސްސީ ބިލްޑިންގ
ރާއްޖޭގެ ހުރިހާ ހިސާބެއްގެ ފެންބިލާއި ކަރަންޓު ބިލުން ބޮޑެތި ލުއިތަކެއް ދެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހް ނިންމެވި ނިންމެވުމާއި ގުޅިގެން މެއިމަހުގެ ކަރަންޓާއި ފެންބިލުތަކުން ޑިސްކައުންޓް ދިނުމަށް އެމްޑަބްލިޔުއެސްސީން ނިންމައިފިއެވެ.
އެކަން ހާމަކޮށް އެމްޑަބްލިޔުއެސްސީން ބުނީ އެކުންފުނިން ޚިދުމަތްދޭ ރަށްރަށުގައި މެއި މަހުގެ ފެން އަދި ކަރަންޓް ބިލުން ޑިސްކައުންޓް ދިނުމަށް ހަމަޖެހިފައިވާކަމަށެވެ.
އެގޮތުން ގްރޭޓަރ މާލެ ސަރަހައްދުގައި ހިމެނޭ މާލެ، ހުޅުމާލެ، ވިލިމާލެ، ގުޅީފަޅު އަދި ތިލަފުށީގެ އިތުރުން ރ.ދުވާފަރު, ކ.މާފުށި އަދި ހދ ކުޅުދުއްފުށީގެ ކޮންމެ ގޭބިސީއެއްގެ މެއި މަހުގެ ފެންބިލުން 30 އިންސައްތަ އަދި ކޮންމެ ވިޔަފާރިއެއްގެ ފެން ބިލުން 20 އިންސައްތަ ޑިސްކައުންޓް ލިބޭނެކަމަށް އެކުންފުނިން ބުނެއެވެ.
މީގެއިތުރުން އެމްޑަބްލިޔުއެސްސީން ދުވާފަރުގައި ފޯރުކޮށްދެމުންދާ ކަރަންޓުގެ ޚިދުމަތުންވެސް ޑިސްކައުންޓް ދިނުމަށް ނިންމާފައިވާކަމަށް އެކުންފުނިން ބުނެއެވެ.
މިގޮތުން ދުވާފަރުގެ ކޮންމެ ގޭބިސީއެއްގެ މެއި މަހުގެ ކަރަންޓު ބިލުން 40 އިންސައްތަ އަދި ކޮންމެ ވިޔަފާރިއެއްގެ ކަރަންޓު ބިލުން 20 އިންސައްތަ ޑިސްކައުންޓް ލިބިގެންދާނެކަމަށް އެކުންފުނިން ބުނެއެވެ.
އަދި ކޮވިޑް-19 ގެ ބަލިމަޑުކަމުން އަރައިގަތުމަށް ސަރުކާރުން އަޅުއްވަމުން ގެންދަވާ ފިޔަވަޅުތަކަށް އެކުންފުނިން ފުރިހަމަ އެއްބާރުލުން ދޭނެކަމަށް ވަނީ ބުނެފައެވެ. މީގެއިތުރުން ފެން ބޭނުންކުރުމުގައި ވީހާވެސް އިސްރާފުވުން ކުޑަވާގޮތަށް އަމަލުކުރުމަށް ވަނީ އިލްތިމާސްކޮށްފައެވެ.
ކޮވިޑް-19 އާ ގުޅިގެން މިދިޔަ އަހަރުވެސް ވަނީ ފެން ބިލާއި ކަރަންޓު ބިލުން ލުއިތަކެއްދީފައެވެ.
