އަނދަމުންދާ އާގުބޯޓުގެ ހާލަތު މި ދަނީ ބަލަމުން، އަދި ނުރައްކަލެއް ނެތް!
ނުރައްކާ ނެތީ ޙާދިސާ ހިނގީ ލަންކާ ކައިރީގައިވުމުންނާއި، ހުޅަނގު މޫސުމުގެ އޮޔާ ވައި މިވަގުތު ހުރިގޮތުންކަމަށް ވަނީ ބުނެފައި
ލަންކާ ކައިރިން ނުރައްކާތެރި ކެމިކަލްތަކެއް ހުރި އާގުބޯޓެއް ދަނީ އަނދަމުން
ނުރައްކާތެރި ކެމިކަލްތަކަކާއެކު ލަންކާ ބޭރުގައި އަނދަމުންދާ އާގުބޯޓުގެ ހާލަތު ބަލަމުންދާކަމަށާއި، މިހާތަނަށް އައިރު މި ހާދިސާއިން ރާއްޖެއަށް އެއްވެސް ނުރައްކަލެއް ނެތްކަމަށް އެމްއެންޑީއެފް ކޯސްޓްގާޑުން ހާމަކޮށްފިއެވެ.
ނުރައްކާތެރި ކެމިކަލްތަކެއް ބަރުކޮށްގެން ލަންކާ ކައިރިން ދަތުރުކުރަމުންދިޔަ އާގުބޯޓެއްގައި ރޯވި އަލިފާންގަނޑު އަދިވެސް ކޮންޓްރޯލް ނުވެ ދަނީ އަނދަމުންނެވެ.
މި ހާދިސާއާ ގުޅޭގޮތުން ރާއްޖެއެމްވީއަށް ވާހަކަދައްކަވަމުން އެމްއެންޑީއެފް ކޯސްޓްގާޑްގެ ކޮމާންޑަރ ކާނަލް ސަލީމް ވަނީ މި ހާދިސާ ހިނގާފައިވަނީ ލަންކާގެ ވެރިރަށް ކޮލޮންބޯއާ 9.5 ނޯޓިކަލް މޭލު ބޭރުންކަމުގައި ވިދާޅުވެފައެވެ. މި ސަބަބާއި ހުޅަނގު މޫސުމުގެ އޮޔާ ވައި މިވަގުތު ހުރިގޮތުން މި ހާދިސާއިން ރާއްޖެއަށް އެއްވެސް ނުރައްކަލެއް އަދި ނެތްކަމަށް ވިދާޅުވިއެވެ. ކާނަލް ސަލީމްވަނީ މިކަން އެމްއެންޑީއެފް ކޯސްޓް ގާޑް އިސްވެ އޮވެ އެންވަޔަރަމެންޓް މިނިސްޓްރީ އަދި އެންވަޔަރަމެންޓަލް ޕްރޮޓެކްޝަން އޭޖެންސީ، އީޕީއޭއިން ގާތުން ބަލަމުންދާކަމަށް ވިދާޅުވެފައެވެ.
މި ހާދިސާއާ ގުޅޭގޮތުން ރާއްޖެއެމްވީއާ ވާހަކަދައްކަވަމުން މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީގެ ސްޓޭޓް މިނިސްޓަރ ޑޮކްޓަރ ޢަބްދުﷲ ނަޞީރު ވަނީ ރާއްޖެއިން ވެސް ބަލަންޖެހޭކަންކަން އެމްއެންޑީއެފް ކޯސްޓް ގާޑުން އިސްވެ އޮވެ ޒިންމާވާ މުއައްސަސާތަކުން ބަލަމުންދާކަމަށެވެ. އެގޮތުން މި ހާދިސާގެ ސަބަބުން ނުރައްކާތެރި ކެމިކަލްތަކަކާއި ތެޔޮ ކަނޑަށް ލީކުވެފައިވާކަމަށް ޚަބަރުތަކެއް ލިބިފައިވާކަމަށް ވިދާޅުވިއެވެ. މިވަގުތު ކަންތައްތައް މޮނީޓަރކުރަނީ ލަންކާ ސަރުކާރުގެ ބަޔާންތަކާއި، ޚަބަރުތަކަށް ބެލުމަށްފަހުގައިކަމަށް ވިދާޅުވިއެވެ. އަދި މި މިވަގުތު ލިބިފައިވާ މަޢުލޫމާތުން މި ހާދިސާގައި ލީކުވެފައިވާ އެއްވެސް އެއްޗެއްގެ އަސަރު ރާއްޖެ ސަރަހައްދަށް އައުން އެކަށީގެން ނުވާއިރު މިކަމުގެ ސީދާ ނުރައްކާ ރާއްޖޭގެ ރަށްރަށަށް ނުކުރާކަމަށް ވިދާޅުވިއެވެ.
ސްރީލަންކާ ކައިރިން އާގުބޯޓުގައި ރޯވެ އަނދަމުންދާތާ މިހާރު ވަނީ ހަފުތާއެއް ވެފައެވެ. މި އާގު ބޯޓުގައި ތިބި ހުރިހާ ފަޅުވެރިން ލަންކާގެ ކަނޑުގެ ސިފައިން ވަނީ ސަލާމަތްކޮށްފައެވެ. ސްރީ ލަންކާގެ ވެރިރަށް ކޮލަމްބޯއާ 9.5 ނޯޓިކަލް މޭލު ބޭރުން ރޯވެފައިވާ އާގުބޯޓުގައި ޖުމުލަ 25 ފަޅުވެރިން ތިއްބެވެ. އޭގެ ތެރޭގައި އިންޑިޔާއާއި ޗައިނާއާއި ފިލިޕީންސާއި ރަޝިޔާގެ ފަޅުވެރިން ހިމެނެއެވެ. ބޯޓުގައި ތިބި އިންޑިޔާގެ 2 ފަޅުވެރިން ސަލާމަތްކުރުމުގައި ލިބުނު ބޮޑެތި ޒަޚަމުތަކުގެ ސަބަބުން އެ މީހުންނަށް ފަރުވާދިނުމަށް ކޮލޮންބޯ ނެޝަނަލް ހޮސްޕިޓަލަށްވަނީ ގެންގޮސްފައެވެ.
އިންޑިޔާގެ ގުޖުރާތުން ސްރީ ލަންކާގެ ކޮލޮންބޯ ބަނދަރަށް ދަތުރުކުރި "އެކްސް-ޕްރެސް ޕާރލް"ގެ ނަން ދީފައިވާ އާގުބޯޓުގައި ހުރީ ސިނާޢީ މަސައްކަތްތަކަށް ބޭނުންކުރާ ކެމިކަލާއި ވިހަ މާއްދާތަކެކެވެ. އެ ބޯޓުގައި އެންމެ ފުރަތަމަ ރޯވީ މެއި މަހުގެ 20 ވަނަ ދުވަހުއެވެ. ނަމަވެސް ސްރީ ލަންކާގެ ކަނޑުގެ ސިފައިންނާއި ޕޯޓްސް އޮތޯރިޓީއާއި މެރިން އެންވައިރަމަންޓު ޕުރޮޓެކްޝަން އޮތޯރިޓީންވަނީ އަލިފާންގަނޑު ނިއްވާލައިފައެވެ. ނަމަވެސް އަނެއްކާ މެއި މަހުގެ 25 ވަނަ ދުވަހު ކުރިއަށްވުރެ ބޮޑަށް ބޯޓުގައި ރޯވެ އަލިފާންގަނޑު ނިއްވާލުމުގައި ބޮޑެތި ދަތިތަކަކާ ކުރިމަތިލާން ޖެހުނެވެ.
ސިންގަޕޫރުގައި ދަފުތަރުކޮށްފައިވާ އާގުބޯޓުގައި ހުރި ބައެއް ކޮންޓޭނަރުތައްވަނީ ކަނޑަށް ވެއްޓިފައެވެ. މި އާގުބޯޓުގައި 25 ޓަނުގެ ނައިޓްރިކް އެސިޑްގެ އިތުރުން 300 ޓަނަށްވުރެ ގިނަ އެކި ބާވަތުގެ ތެޔޮ ހުރިކަމަށް ލަންކާ ސަރުކާރުން ވަނީ ހާމަކޮށްފައެވެ. ކޮންޓޭނަރުތަކުގައި ހުރި ނުރައްކާތެރި ސާމާނު ސްރީ ލަންކާގެ ގޮނޑުދޮށްތަކަށް ލެއްގި ނަމަވެސް އެ ތަކެތި ނުނެގުމަށް މެރިން އެންވައިރަމަންޓު ޕުރޮޓެކްޝަން އޮތޯރިޓީންވަނީ ނަޞޭޙަތްތެރިވެފައެވެ. އަދި އެ ސަރަހައްދުގައި ދިރިއުޅޭ މަސްވެރިން ރޯވެފައިވާ ބޯޓާ ކައިރިނުވުމަށްވެސް ސްރީ ލަންކާގެ ކަނޑުގެ ސިފައިންވަނީ އަންގައިފައެވެ. މި ހާދިސާގެ ސަބަބުން ލަންކާގެ ކަނޑަށް ތެޔޮ ލީކުވުމުގެ ފުރުސަތު އޮތް އިރު، ކަނޑަށް ވެއްޓިފައިވާ ކޮންޓެއިނަރުތަކުން ނުރައްކާތެރި ކެމިކަލް ލަންކާގެ ކަނޑުގެ ސަރަހައްދަށް ލީކުވެ ކަނޑުގެ ދިރުމަށް ނުރައްކާވުމުގެ ފުރުސަތު ބޮޑުކަމަށް ލަންކާގެ ސަރުކާރުން ބުނެއެވެ. އިންޑިޔާގެ އެހީތެރިކަމާއެކު ސްރީ ލަންކާގެ ކަނޑުގެ ސިފައިން އަދިވެސް ދަނީ ބޯޓުގައި ރޯވެފައިވާ އަލިފާންގަނޑު ނިއްވާލުމަށް މަސައްކަތްކުރަމުންނެވެ. މި ހާދިސާގެ ސަބަބުން ރާއްޖެ ހިމެނޭހެން މި ސަރަހައްދުގެ އެހެން ޤައުމުތަކަށް ހުރީ ކިހާ ނުރައްކަލެއްކަމެއް އަދި ސާފުވެފައެއް ނުވެއެވެ.
ނުރައްކާތެރި ކެމިކަލްތަކެއް ބަރުކޮށްގެން ލަންކާ ކައިރިން ދަތުރުކުރަމުންދިޔަ، އާގުބޯޓެއް އަނދަމުންދާއިރު، މިދިޔަ އަހަރުގެ ސެޕްޓެމްބަރު މަހުވެސް ސްރީލަންކާ ކައިރިން ދަތުރުކުރަނިކޮށް ތެޔޮ ޓޭންކަރެއްގައި އަލިފާން ރޯވެ ކަނޑުގެ ސަރަހައްދަށް ތެޔޮ ވެސް ވަނީ ލީކުވެފައެވެ. އެހެންނަމަވެސް، ސަރަހައްދީ ބާރުތައް ގުޅިގެން ކުރި މަސައްކަތުން މި އަލިފާންގަނޑު ކޮންޓްރޯލްކޮށް ދިމާވި ނުރައްކާތައް ވަނީ ނައްތާލާފައެވެ.
