މާލެ ގެއެއްގައި ރޯވި އަލިފާންގަނޑު ނިވާލައިފިއެވެ.

އެމްއެންޑީއެފުން ބުނީ އަލިފާނުގެ ހާދިސާ ހިނގީ މއ. މޯނިންގ ވިއު ތިން ވަނަ ފަންގިފިލާގައި ކަމަށެވެ. އެ ހާދިސާގެ ރިޕޯޓު ލިބިފައިވަނީ ފަތިހު ގާތްގަނޑަށް 5:00 ހާއިރު ކަމަށް ބުންޏެވެ. އަލިފާންގަނޑު ނިވާލާފައި ވަނީ 6 ޖެހި ފަހުންނެވެ. އެ ގޭގައި ދިރިއުޅޭ މީހުން މިހާރު ވަގުތީގޮތުން ޣިޔާސުއްދީން ސްކޫލަށް ގެންގޮސްފައިވާއިރު އެ ސަރަހައްދުގައި މާލެ ސިޓީގެ މޭޔަރ ޑރ. މުހައްމަދު މުއިއްޒާއި ޑިފެންސް މިނިސްޓަރ މާރިޔާ ދީދީ ވެސް ދަނީ ހަރަކާތްތެރިވަމުންނެވެ.

އެސަރަހައްދުގައި ހަރަކާތްތެރިވާ ބައެއް އާއްމުން ބުނީ އަލިފާންގަނޑު ވަރަށް ބޮޑަށް ފެތުރިގެން ދިޔަ ކަމަށެވެ. އަދި އެއްޗެހިތަކެއް ގޮވާ އަޑު އިވޭ ކަމަށެވެ. އެ ސަރަހައްދުގެ އެހެން ގެތައް ވެސް ހުސްކޮށްފައިވާއިރު އެއްވެސް މީހަކަށް ގެއްލުމެއް ވިކަމެއް އަދި އެނގިފައެއް ނެތެވެ.

މަންޒަރު ފެނުނު އިރު އަލިފާންގަނޑު ބޮޑުވެ އިމާރާތުން ބޭރަށްވެސް ނިކުމެ ފެތުރިފައިވާއިރު، އަލިފާން ރޯވި ގޮތެއް ވެސް އަދި ގެއަށާއި މީހުންނަށް ލިބުނު ގެއްލުމެއްގެ އިތުރު ތަފްސީލެއް ވެސް އަދި އާންމުކޮށްފައެއް ނުވެއެވެ.