ހުޅުމާލެ މެޑިކަލް ފެސިލިޓީގައި އޮތް ބަލި މީހެއްގައިގައި ތަޅާ އަނިޔާކުރި ބިދޭސީއަކު ހައްޔަރުކޮށްފިއެވެ.
ފުލުހުން ބުނީ އެ މައްސަލާގައި އުމުރުން 31 އަހަރުގެ ބަންގްލަދޭޝް މީހަކު ހައްޔަރުކޮށްފައިވާ ކަމަށެވެ. އަދި އެ މައްސަލަ ވަރަށް ހަރުކަށިކޮށް ބަލަމުން އަންނަ ކަމަށް ވެސް ފުލުހުން ބުނެފައިވެއެވެ.
އެޗްޕީއޭއިން މައުލޫމާތު ދިން ގޮތުގައި އެމީހާ އަކީ އާއިލާގެ ފަރާތުން ބަލި މީހާއަށް އެހީތެރިވުމަށް ބަހައްޓާފައިވާ ކެއާޓޭކަރ އެކެވެ. މީހުންގެ އެހީތެރިކަމާ ނުލައި ނޯވެވޭ ވަރުގެ ބަލި މީހުންގެ ގާތުގައި އާއިލާގެ ފަރާތުން މީހަކު ބަހައްޓަން އެޗްޕީއޭއިން އަންނަނީ ހުއްދަ ދެމުންނެވެ.
ހުޅުމާލެ މެޑިކަލް ފެސިލިޓީގައި ހިނގި މި ހާދިސާގައި އަނިޔާކުރީ އެ ފެސިލިޓީގެ މުވައްޒަފެއް ކަމަށް ދޭހަވާ ގޮތަށް ވާހަކަތައް ފެތުރެމުންދާތީ އައިޖީއެމްއެޗް އިން ވަނީ އެކަން ދޮގުކޮށްފައެވެ. ފެސިލިޓީގައި މަސައްކަތްކުރަނީ އެ ހޮސްޕިޓަލުގެ މުވައްޒަފުންނެވެ. ހޮސްޕިޓަލުން ވަނީ އެފަދަ ދޮގު މައުލޫމާތު ނުފެތުރުމަށް އިލްތިމާސްކޮށްފައެވެ. އަދި އެކަމުގެ މައުލޫމާތު ފުލުހުންނަށްދީ އެކަން ވަރަށް ގާތުން ބަލާ ކަމަށް ވެސް އައިޖީއެމްއެޗް އިން ބުނެފައިވެއެވެ.
މި މައްސަލައިގައި ޖެންޑާ މިނިސްޓްރީން ބުނީ އެ އަމަލު ކުށްވެރިކުރާ ކަމަށެވެ. އަދި މިނިސްޓްރީގެ ސޯޝަލް އެންގޭޖްމަންޓު ޓީމުން ބަލި މީހާއަށް އެހީތެރިކަން ފޯރުކޮށްދެމުން އަންނަ ކަމަށް ވެސް ބުނެފައިވެއެވެ. އަދި އެ މައްސަލައާ ގުޅިގެން ކަމާ ބެހޭ އިދާރާތަކާއި އެކު މަސައްކަތްކުރަމުން އަންނަ ކަމަށް ވެސް ބުނެފައިވެއެވެ.
"ރާއްޖެއެމްވީ" އަށް އެނގިފައިވާ ގޮތުގައި އެތަނުގައި އެކަން ހިނގާތާ ވަނީ ދެތިން ދުވަހެއް ވެފައެވެ. އަދި އެމީހާއަށް އަނިޔާކޮށް އެމީހާ ރޯ އަޑު ތަނުގައި ތިބި އެހެން ބަލި މީހުންނަށް ވެސް އިވެއެވެ. ސޯޝަލް މީޑިއާގައި ވީޑިއޯ އާންމުވެ އެކަން ފެންމަތިވެފައިވާއިރު އެނގިފައިވާގޮތުގައި އެ ވީޑިއޯ ވެސް ނަގާފައި ވަނީ ތަނުގައި އޮތް ބަލި މީހެކެވެ.
އާންމުވި ވީޑިއޯއިން ފެންނަ ގޮތުގައި އެހީއަށް އެދުމުން އެމީހާއަށް އަޑު ލައި ހަޅޭއް ލަވައި ރުއިމުން ކޯމަތީގައި ބާރަށް ޖަހާތަން ވެސް ފެނެއެވެ. އަދި ހުއްޓާލަން އިންޒާރުދޭ ތަން ވެސް ފެނެއެވެ.
