ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ހައުސްގައި ކޮވިޑް ފެސިލިޓީއެއް ހަދަން ދިނުމަކީ މި ދަނޑިވަޅުގައި ފުޓްބޯޅަ އާއިލާއަށް ކޮށްދެވޭނެ އެންމެ ބޮޑު އެއް ކަންތައް ކަމަށް އެ އިދާރާގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

ދާދި ފަހުން އެފްއޭއެމް ހައުސް ވަނީ ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ބޭނުމަށް ދޫކޮށްފައެވެ. އެއާއެކު އެމްއެންޑީއެފް ސާވިސް ކޯގެ ބެލުމުގެ ދަށުން އަންނަނީ އެ އިމާރާތުގައި ކޮވިޑް ފެސިލިޓީއެއް ތަރައްގީކުރަމުންނެވެ. އަދި މިހާރު އެ ފެސިލިޓީގެ 70 އިންސައްތަ މަސައްކަތް ނިންމާލާފައިވާ ކަމަށް ދާދި ފަހުން އެމްއެންޑީއެފުން ވަނީ މައުލޫމާތުދީފައެވެ.

އެފްއޭއެމުގެ އިމާރާތް އެޗްޕީއޭ ބޭނުމަށް ދޫކޮށްފައިވަނީ އެ އިމާރާތް 20 ބުރިއަށް ތަރައްގީކުރުމަށް ސައުތު ކޮރެޔާގެ ސްކައި ވިންޑް ކުންފުންޏާއެކު އެއްބަސްވުމެއްގައި ސޮއިކޮށްފައި ވަނިކޮށެވެ. މިދިޔަ އަހަރުގެ މާޗު މަހުގެ ތެރޭގައި އެ މަސައްކަތް ސްކައި ވިންޑް ކުންފުންޏާ ހަވާލުކުރި ނަމަވެސް، ކޮވިޑް-19 އާ ގުޅިގެން މިހާތަނަށް އެ އިމާރާތުގެ މަސައްކަތް ރަސްމީކޮށް ފަށާފައެއް ނުވެއެވެ. އެކަމަކު މީގެ ކުރިން އެފްއޭއެމުން އެ އިމާރާތް ހުސްކުރިއިރު، މިހާރު އެފްއޭއެމުން ޚިދުމަތް ދެމުން އަންނަނީ ޗާންދަނީ މަގުގައި ހުންނަ އޮފީހެއްގައެވެ.

ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން ބައްސާމް ވިދާޅުވީ އެފްއޭއެމް ހައުސްއަކީ ކޮވިޑް ފެސިލިޓީއެއް ތަރައްގީކުރުމަށް ފެންވަރު ރަނގަޅު އިމާރާތެއް ކަމަށާއި، އެ އިމާރާތް ބަދަލުކުރީ އެތަން ތަރައްގީކުރުމަށް ކަމަށެވެ. އެކަމަކު ކޮވިޑުގެ ފެސިލިޓީތައް މަދުވެގެން އުޅޭ ދަނޑިވަޅެއްގައި މި ވަގުތަށް އެންމެ މުހިންމު ކަމަކީ އެފްއޭއެމް ހައުސްވެސް އެޗްޕީއޭގެ ބޭނުމަށް ދިނުން ކަމަށާއި، މިއީ މި ދަނޑިވަޅުގައި ފުޓްބޯޅަ އާއިލާއަށް ކޮށްދެވޭނެ އެންމެ ބޮޑު އެއް ކަންތައް ކަމަށްވެސް ވިދާޅުވިއެވެ. އަދި ކުރިއަށް އޮތް ތިނެއް ނުވަތަ ހަތަރު މަސްވެސް އެ އިމާރާތް އެޗްޕީއޭ ބޭނުމަށް ދޫކުރުމަށް މަޝްވަރާތަކުގައި ވިދާޅުވެފައިވާނެ ކަމަށާއި، އެހެންކަމުން އެފްއޭއެމް ހައުސްގެ މަސައްކަތްތައް މި ދަނޑިވަޅުގައި މަޑުޖައްސާލެވިދާނެ ކަމަށްވެސް ބައްސާމް ވިދާޅުވިއެވެ.

ބައްސާމް އިތުރަށް ވިދާޅުވީ ކޮވިޑާ ގުޅިގެން ކޮރެއާ ކުންފުނީގެ ބޭފުޅުންނަށް ރާއްޖެ ނާދެވި، އެ އިމާރާތުގެ މަސައްކަތް ލަސްވި ކަމަށާއި، އެކަމަކު މިހާރު އެ ކުންފުނީގެ ބޭފުޅުން ރާއްޖެ އައިސްފައިވާ ކަމަށެވެ. އަދި މިހާރު ކުރިއަށްދަނީ ލިޔެކިއުންތަކުގެ މަސައްކަތް ކަމަށާއި، މި މަހުގެ ފަހުކޮޅު ނުވަތަ އަންނަ މަހުގެ ކުރީކޮޅު ހުއްދަތަކަށް އެދެވިގެންދާނެ ކަމަށްވެސް ބައްސާމް ވަނީ ވިދާޅުވެފައެވެ.

އެފްއޭއެމް ހައުސް 20 ބުރިއަށް އިމާރާތް ކުރެވޭއިރު، އެ އިމަރާތުގެ ގިނަ ފަންގިފިލާތައް ބޭނުން ކުރެވޭނީ ފުޓުބޯޅައަށް ޚަރަދުކުރުމަށް ފައިސާ ހޯދުމުގެ ބޭނުމުގައި ކަމަށް ބައްސާމް ވަނީ ވިދާޅުވެފައެވެ. މީގެ އިތުރުން އެފްއޭއެމުން އަންނަނީ ހިއްކި ބިން ސަރަހައްދު (ޓާފް ދަނޑު ފަހަތުގައި އޮންނަ ވެލި ދަނޑު) ގައި ހަތަރު ބުރީގެ އިމާރާތެއްވެސް ހަދަމުންނެވެ. އެ އިމާރާތުގެ މަސައްކަތް މި އަހަރުގެ ފަހުކޮޅު ނިންމާލެވޭނެ ކަމަށް ބައްސާމް ވަނީ ވިދާޅުވެފައެވެ.