ވިއްސާރައިގައި ރާއްޖޭގެ ގިނަ ރަށްރަށަށް ގެއްލުން ލިބިއްޖެ
25 މެއި 2021 | އަންގާރަ 15:48މ އަތޮޅު މަޑުއްވަރިއާއި ރަތްމަންދޫއަށް އުދައަރައި ރަށުތެރޭގައި ފެންބޮޑުވެފައިވޭ
ވިއްސާރައިގައި ޅ.ނައިފަރު މަގެއްގައި ފެންބޮޑުވެފައި
ރާއްޖޭގެ ބޮޑު ބަޔަކަށް މިހާރު ކުރަމުންދާ ވިއްސާރައިގައި އުތުރާއި މެދުރާއްޖޭގެ ގިނަ ރަށްތަކަކަށް ގެއްލުން ވެއްޖެއެވެ.
މިހާރު ކުރަމުންދާ ވިއްސާރައިގެ އެންމެ ފަހުގެ މައުލޫމާތު ތަކަށް ބަލާއިރު, ވައި ގަދަވުމުގެ ސަބަބުން އަންގާރަ ދުވަހު ހދ. ކުޅުދުއްފުށީ ގެއެއްގެ ފުރާޅު އެއްލާލާފައިވެއެވެ. ވައިބާރުވެ ފުރާޅު އެއްލާލި ގެޔަކީ މީހުން ދިރިނުއުޅޭ ފަޅުގެޔެއް ކަމަށް މައުލޫމާތު ލިބެއެވެ.
ވިއްސާރައާއި ގުޅިގެން އަންގާރަ ދުވަހު ކުޅުދުއްފުށީ ސިޓީ ކައުންސިލުން އިސްނަގައިގެން ޚާއްސަ ބައްދަލުވުމެއް ވެސް ބާއްވާފައިވެއެވެ. މި ބައްދަލުވުމަކީ މޫސުން ގޯސްވުމުގެ ސަބަބުން ދިމާވާ ހާދިސާތަކަށް އިޖާބަ ދިނުމުގެ މަސައްކަތް ހަރުދަނާ ކުރުމުގެ ގޮތުން އެ ސިޓީގައި އެމެޖެންސީ އޮޕަރޭޝަން ސެންޓަރެއް ގާއިމުކުރުމާއި, ހަލުވި ކަމާއެކު އިޖާބަ ދިނުމާއި ގުޅޭ ގޮތުން ބޭއްވުނު މަޝްވަރާ ބައްދަލުވުމެކެވެ. މި ބައްދަލުވުމުގައި, ނޭޝަނަލް ޑިޒާސްޓާ މެނޭޖްމަންޓް އޮތޯރިޓީއާއި, ސިފައިންނާއި, ފުލުހުންގެ އިތުރުން ދިވެހި ރެޑްކްރެސެންޓުން ބައިވެރިވެފައިވެއެވެ.
މި ވިއްސާރައިގައި ކ. އަތޮޅު ދިއްފުއްޓަށް ވެސް ބޮޑެތި ގެއްލުންތަކެއް ލިބިފައިވެއެވެ. އެގޮތުން އެރަށަށް އުދައަރާ ވަރަށް ގިނަ ގޭގެޔަށް ލޮނުގެ އަސަރުކޮށްފައި ވެއެވެ. އުދައެރުމާ ގުޅިގެން ރަށުގައި ފެންބޮޑުވެ, ފެން ހިންދުމުގެ މަސައްކަތާއި ވެލިބަސްތާ ޖެހުމުގެ މަސައްކަތް ކައުންސިލާއި, ރަށު ރައްޔިތުން ގުޅިގެން މިހާރު ދަނީ ކުރަމުންނެވެ. މި މަސައްކަތަށް ބޭނުންވާ 2000 ގޯނި, ނޭޝަނަލް ޑިޒާސްޓާ މެނޭޖްމަންޓް ސެންޓަރުން, އެމްއެންޑީއެފްގެ އެހީތެރިކަމާއެކު ދިއްފުއްޓަށް ގެންގޮސްފައި ވެއެވެ.
ހއ. އަތޮޅުގެ ބައެއް ރަށްރަށަށް ލިބުނު ގެއްލުމަށް ބަލާއިރު, އެ އަތޮޅު އުލިގަމަށް ބޯކޮށް ވާރޭ ވެހި ފެން ބޮޑުވެފައި ވެއެވެ. އެރަށުން ފެން ހިއްކުމުގެ މަސައްކަތް, ކައުންސިލާއި, އެމްއެންޑީއެފް ނޮދަން އޭރިއާ ގުޅިގެން ވަނީ ކުރިއަށް ގެންގޮސްފައެވެ. އޭގެ އިތުރުން އެ އަތޮޅު ދިއްދޫއަށް އެރި ކޮޅިގަނޑުގައި އެރަށު މީހުން ދިރިއުޅޭ ގެއެއްގެ ފާރެއް ވަނީ ވެއްޓިފައެވެ. މި ހާދިސާގައި އެގެޔަށް އެކިވަރުގެ ގެއްލުން ލިބިފައިވެއެވެ.
ވިއްސާރައިގައި މެދުރާއްޖޭގެ އަތޮޅުތަކުގެ ތެރެއިން މ އަތޮޅުގެ ބައެއް ރަށްރަށަށް އުދަ އަރާ ގެއްލުން ލިބިފައިވެއެވެ. އެގޮތުން އެ އަތޮޅު މަޑުއްވަރިއަށް އުދަ އަރާ ރަށުތެރޭ ފެންބޮޑު ވެފައިވާކަން ފާހަގަކޮށްލެވެއެވެ. އަދި މ. ރަތްމަންދޫ އަށް ވެސް އުދައިގެ އަސަރު ވަރަށް ބޮޑަށް ވަނީ ކޮށްފައެވެ. އެރަށުން ފެން ހިންދުމުގެ މަސައްކަތް, ރަށު ކައުންސިލާއި ރައްޔިތުން ގުޅިގެން ވަނީ ކުރިއަށް ގެން ގޮސްފައެވެ.
ހުޅަނގު މޫސުމުގެ ވިއްސާރައިގައި ޅ. ނައިފަރަށް ވެސް ބޯކޮށް ވާރޭ ވެހިފައި ވެއެވެ. އެ ރަށުގައި ފެން ބޮޑު ވުމުގެ ސަބަބުން, ރަށުތެރެއިން ފެން ހިންދުމުގެ މަސައްކަތް ނައިފަރު ކައުންސިލާއި އެމްއެންޑީއެފް ގުޅިގެން މިހާރު ގެންދަނީ ކުރަމުންނެވެ.
