ބޯކޮށް ވާރޭވެހި އުލިގަމުގައި ފެން ބޮޑުވެއްޖެ
މޫސުމާ ބެހޭ ގައުމީ އިދާރާއިން ވަނީ ހއ އަތޮޅުން ފެށިގެން ޅ އަތޮޅާއި ދެމެދަށް ރީނދޫ އެލާޓު ނެރެފައި
އުލިގަމު މަގުތަކުން ފެން ހިންދުމުގެ މަސައްކަތުގައި އެމްއެންޑީއެފުން ހަރަކާތްތެރިވަނީ
ރާއްޖެއަށް ކުރަމުންދާ ވިއްސާރައިގައި ހއ. އުލިގަމަށް ބޯކޮށް ވާރޭވެހި މަގުތަކުގައި ފެންބޮޑުވެއްޖެ އެވެ.
އުލިގަމުގެ ބައެއް މަގުތަކުގައި ފެން ބޮޑުވުމުގެ ސަބަބުން ފެން ހިންދުމުގެ މަސައްކަތް އެރަށު ކައުންސިލާއި ގުޅިގެން މިހާރު ކުރަމުން ދާކަމަށް އެމްއެންޑީއެފުން މައުލޫމާތު ދެއެވެ.
އެމްއެންޑީއެފުން ބުނީ މި ހާދިސާގެ ރިޕޯޓް އެއިދާރާއަށް ލިބިފައިވަނީ އަންގާރަ ދުވަހު 11:00 ހާއިރު ކަމަށެވެ.
ރާއްޖެއަށް މިހާރު ކުރަމުންދާ ވިއްސާރައިގައި އުތުރުގެ އަތޮޅުތަކަށް މޫސުން ގޯސްވެ މޫސުމާ ބެހޭ ގައުމީ އިދާރާއިން ވަނީ ހއ އަތޮޅުން ފެށިގެން ޅ އަތޮޅާއި ދެމެދަށް ރީނދޫ އެލާޓު ނެރެފައެވެ. އެގޮތުން އުތުރުގެ އަތޮޅުތަކަށް ބޯކޮށް ވާރޭވެހި ގައޑިއަކު 25 މޭލާއި 30 މޭލާއި ދެމެދުގެ ބާރު މިނެއްގައި ވައިޖެހޭނެ ކަމަށާއި ވިލާގަނޑުގައި 50 މޭލަށް ވައިގަދަވާނެ ކަމަށް އެއިދާރާއިން ލަފާކުރެއެވެ.
މޫސުމާބެހޭ ގައުމީ އިދާރާއިން ބުނީ ވިލާގަނޑުގައި ކަނޑުތައް ގަދަވާނެ ކަމަށާއި ބައެއް ރަށްރަށަށް އުދައެރުމުގެ ފުރުސަތު ވެސް އެބަ އޮތްކަމަށެވެ.
އުތުރުގެ އަތޮޅުތަކުގެ އިތުރުން, ރާއްޖޭގެ އެކިހިސާބަށް ގުގުރުމާއެކު ވިއްސާރަކޮށް, ކަނޑުތައް ގަދަވެ، ދިޔަވަރު ބޮޑުވާ ގަޑިތަކުގައި އުދައިގެ އަސަރު ކުރާނެ ކަމަށް ލަފާކުރެވޭތީ ސަމާލުވުމަށް މޫސުމާބެހޭ އިދާރާއިން އިލްތިމާސްކުރެއެވެ.
