މަޑުއްވަރީ ދެކުނު ބަނދަރުގެ 70 އިންސައްތަ މަސައްކަތް ނިންމާލައިފި
އެއްގަމުތޮށި ލުމަށް ބޭނުންވާ ކޮންކްރީޓް ގައު އެތުރުމުގެ މަސައްކަތުގެ 79 އިންސައްތަ މަސައްކަތްވެސް ވަނީ ނިމިފައި
ރ. މަޑުއްވަރީ ދެކުނު ބަނދަރު
ރ. މަޑުއްވަރީ ދެކުނު ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތުގެ %70 ނިމިފައިވާކަމަށް އެމްޓީސީސީއިން ބުނެފިއެވެ.
ރ. މަޑުއްވަރީ ދެކުނު ބަނދަރު ތަރައްޤީކުރުމުގެ އެންމެ ފަހުގެ މަޢުލޫމާތު ހިއްސާކުރަމުން މަސައްކަތުގެ ކޮންޓްރެކްޓަރ އެމްޓީސީސީއިން ވަނީ މަޑުއްވަރީ އެއްގަމުތޮށި ލުމަށް ބޭނުންވާ ކޮންކްރީޓް ގައު އެތުރުމުގެ މަސައްކަތުގެ 79 އިންސައްތަ މަސައްކަތްވެސް ނިމިފައިވާކަން ހާމަކޮށްފައެވެ. އެމްޓީސީސީން ބުނީ، މި މަޝްރޫޢުގެ ދަށުން 7،280 ކިއުބިކް މީޓަރުގެ ސަރަޙައްދެއްގެ ނެރު ފުންކުރުމާއި، 65،520 ކިއުބިކް މީޓަރުގެ ސަރަޙައްދެއްގެ ހާބަރ ބޭސިން ފުންކުރުން ހިމެނޭ ކަމަށެވެ.
މަޑުއްވަރީގައި 411 މީޓަރުގެ ސަރަޙައްދެއްގައި ބޭރުތޮށި ލައި، 566 މީޓަރުގެ ސަރަޙައްދެއްގައި އެއްގަމުތޮށި ލުން ވެސް މި މަޝްރޫޢުގެ ތެރޭގައި ކުރިއަށް ދާނެއެވެ. މަޑުއްވަރީ ދެކުނު ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތުގެ ތެރޭގައި، 2825 އަކަ މީޓަރުގެ ސަރަޙައްދެއްގައި ޕޭވްމަންޓް ހެދުން ވެސް ހިމެނެއެވެ.
މި މަޝްރޫޢު ނިމޭއިރު، މަޑުއްވަރީ ނެރު ބައްތި އަދި މަގުމަތީ ބައްތި ހަރުކުރެވިގެން ދާނެ ކަމަށް އެމްޓީސީސީން ބުނެއެވެ، މި މަޝްރޫޢުގެ ތެރެއިން ބޭރުތޮށި ލުމަށް ބޭނުންވާ ބޮޑު ހިލަ، 2020 އޯގަސްޓް 25 ގައި އެރަށަށް ގެންގޮސްފައިވެއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާއި ހަވާލުކޮށްގެން ކުރިއަށްގެންދާ މި މަޝްރޫޢުއަށް 68.66 މިލިއަން ރުފިޔާ ހަރަދުވާނެކަމަށް އެކުންފުނިން ލަފާކުރެއެވެ.
