ލާއިންސާނީ ހަމަލާއަށް ތާއީދުކުރާ އެއްވެސް މީހަކަށް "ހަމްދަރުދީ" އެއް ނޯންނާނެ - އިމްރާން

ރައީސް ނަޝީދަކީ "ލާދީނީ" ބޭފުޅެއް ކަމަށް ފާޅުގައި ވިދާޅުވާ ބޭފުޅުންނާ ހޯމް މިނިސްޓަރ އިމްރާނާ އޮންނަ ޚާއްސަ ގުޅުމާމެދު މަޖިލީހުގެ ބައެއް މެމްބަރުން ސުވާލު އުފައްދަވައިފިއެވެ.

ތ.ތިމަރަފުށި، އަދި ތ.ވޭމަންޑޫގައި ފުލުހުންގެ މަރުކަޒެއް ގާއިމު ކުރެވޭނެ ތާރީޚަކާ ގުޅޭގޮތުން ތިމަރަފުށީ ދާއިރާގެ މެމްބަރު އަބްދުﷲ ރިޔާޒް ކުރައްވާ ސުވާލަށް ޖަވާބު ދެއްވަން ހޯމް މިނިސްޓަރު ހޯމަ ދުވަހުގެ ޖަލްސާއަށް ހާޒިރުކޮށް، އިތުރު ސުވާލު ކުރަން ލިބުނު ފުރުސަތުގައި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވަނީ ރައީސް ނަޝީދަކީ "ލާދީނީ" ބޭފުޅެއް ކަމަށް ތަކުރާރުކޮށް ވިދާޅުވަމުން ގެންދަވާ ބޭފުޅުންނާއެކު އިމްރާން ފަރިއްކުޅުއްވައި ގާތް ގުޅުމެއް ބާއްވަވަމުން ގެންދަވާކަން ފާހަގަކުރައްވާފައެވެ.

އިންތި ވިދާޅުވީ އެބޭފުޅުންގެ ތަރޭގައި ރައީސް ނަޝީދަށް އަމާޒުކޮށްދިން ހަމަލާގައި ލިބިވަޑައިގެންނެވި ޒަޚަމްތަކަށް މިހާރު ފަރުވާ ހޯއްދަވަމުން ގެންދަވާއިރު، އެ ކަމަށްވެސް މަލާމާތާ ފުރައްސާރައިގެ ބަސްތައް ފާޅުގައި ވިދާޅުވާ ބޭފުޅުންވެސް ހިމެނޭ ކަމަށެވެ.

ރައީސް ނަޝީދަށް އަމާޒުކޮށް ދިން ހަމަލާއާ ގުޅިގެން މިހާތަނަށް ހައްޔަރުކޮށްފައިވާ ހަތަރު މީހުން ވެސް ހައްދުފަހަނައަޅާފައިވާ ފިކުރުގެ މީހުން ކަމަށް ފުލުހުން ބުނެފައިވާއިރު، އެމަނިކުފާނަކީ "ލާދީނީ" ބޭފުޅެއް ކަމަށް ދީނީ އިލްމުވެރިންތަކެއް ވިދާޅުވަމުން ގެންދެވުމަކީ އެހަމަލާ ދިން ސަބަބެއް ކަމަށް ވުން ގާތް ކަމަށް ވެސް އިންތި ވިދާޅުވިއެވެ.

އެ ސުވާލުގެ ޖަވާބުގައި މިނިސްޓަރ އިމްރާން ވިދާޅުވީ ޕާޓީގެ ތެރެއިން ވިޔަސް އަދި އެހެން ގޮތަކަށް ވިޔަސް ރައީސް ނަޝީދަށް ދެވުނު ލާއިންސާނީ ހަމަލާއަށް ތާއީދުކުރާ އެއްވެސް ފަރާތަކަށް އެމަނިކުފާނުގެ "ހަމްދަރުދީ" އެއް ނޯންނާނެ ކަމަށެވެ. މި ހަމަލާއަކީ އިސްލާމްދީނުގެ އެއްވެސް ހަމައަކުން ގަބޫލުކުރެވޭނެ ކަމެއް ނޫން ކަމަށާއި، މިކަމަށް ތާއީދުކޮށް ހިތްވަރުދޭ ފަރާތަކަށްވާނަމަ އެއީ ގާނޫނީ ގޮތުން އަދަބު ލިބެންޖެހޭނެ މީހެއް ކަމަށް ގަބޫލު ކުރައްވާ ކަމުގައި މިނިސްޓަރ އިމްރާން ވިދާޅުވިއެވެ. އެހެން ކަމުން އެފަދަ އަމަލެއް ކުރާ އެއްވެސް މީހަކު ބަލައިނުގަންނާނެ ކަމަށާއި ގުޅުމެއްވެސް ނުބާއްވާނެ ކަމަށް ވިދާޅުވެ އެވާހަކަފުޅު ތަކުރާރު ކުރެއްވިއެވެ.

މިނިސްޓަރގެ މި ޖަވާބަށް އިޝާރާތް ކުރައްވައި ރިޔާސަތުން ވިދާޅުވީ، ފާއިތުވި ރަމަޟާން މަހުގެ ތެރޭގައި، ރައީސް ނަޝީދަކީ "ލާދީނީ" ބޭފުޅެއް ކަމަށް ފާޅުގައި ވިދާޅުވަމުން ގެންދަވާ ބޭފުޅުން ތަކަކާއެކު މިނިސްޓަރ އިންނެވި ފޮޓޯއެއް ސޯޝަލް މީޑިއާގައި އާއްމުވެފައިވާކަމަށެވެ.

އެކަމާ ގުޅިގެން މިނިސްޓަރ އިތުރު ބަސްފުޅެއް ވިދާޅެއް ނުވެއެވެ.

ހޯމް މިނިސްޓްރީގެ ތެރޭގައި ވެސް ދީނީ ގޮތުން ހައްދުފަހަނައަޅާފައިވާ ބޭފުޅުން ތިބި ކަމުގެ ތުހުމަތު ކުރެއްވުމުން މިނިސްޓަރވަނީ އެފަދަ ޖާގައެއް އަދި ފުރުސަތެއްވެސް ނުދެއްވާނެ ކަމަށް ވިދާޅުވެފައެވެ.