ހުޅުމާލެގެ އިމާރާތެއްގެ މަތިން ވެއްޓި އަނިޔާވި މީހާ ވެއްޓުމުގައި އިތުރު މީހެއްގެ ދައުރެއް އޮތް ކަމަށް ތަހުގީގަށް ފާހަގަކުރެވިފައިނުވާ ކަމަށް ފުލުހުން ބުނެފިއެވެ.
ފުލުހުން ބުނީ 20 މެއި 2021 ވަނަ ދުވަހުގެ ރޭ ހުޅުމާލެގެ އިމާރާތެއްގެ މަތިން ވެއްޓި އަނިޔާވި މީހާ ވެއްޓުމުގެ އިތުރު މީހެއްގެ ދައުރެއް އޮތް ކަމަށް ތަހުގީގަށް އަދި މިހާތަނަށް ފާހަގަކުރެވިފައިނުވާ ކަމަށެވެ. އެގޮތުން ތަހުގީގުގައި މިހާތަނަށް ކުރެވުނު މަސައްކަތުން ހާދިސާ ހިނގުމުގެ 10 މިނެޓެއް ހާއިރު ކުރިން 6 ބުރީގެ އިމާރާތަކަށް އެކަނި ގޮސް ވަންނަ މަންޒަރު ސީސީޓީވީ ފޫޓޭޖް އިން ފެނިފައިވާ ކަމަށް ފުލުހުން ބުނެއެވެ.
ފުލުހުން ބުނީ، އޭނާ ވެއްޓިފައިވަނީ 6 ބުރީގެ އިމާރާތުން ޖެހިގެން ހުރި 3 ބުރީގެ އިމާރާތުގެ ޓެރަސް މައްޗަށް ކަމަށާއި، ތިރިއަށް ވެއްޓިފައިވަނީ އެ ތިން ބުރީގެ އިމާރާތުގެ މަތިން ކަމަށް ބެލެވޭ ކަމަށެވެ. ފުލުހުން ބުނީ އެ އިމާރާތަށް ވަނުމުގެ ކުރިން ހުޅުމާލެ މަގުތަކުގައި އަޑުގަދަކޮށް އެކަނި ކޮޅުކޮޅަށް ދުވެ އުޅެފައިވާކަން ސީސީޓީވީ ފޫޓޭޖް އިންނާއި މަންޒަރު ދުށް މީހުންގެ ބަހުން ތަހުގީގަށް އެނގިފައިވާ ކަމަށެވެ.
މި ހާދިސާގައި އަނިޔާވެފައި ވަނީ 21 އަހަރުގެ ޒުވާނަކަށެވެ. އޭނާއަށް ވެސް އައިޖީއެމްއެޗްގައި ފަރުވާދެމުން ދާއިރު, ހޮސްޕިޓަލަށް ގެންދިޔައިރު ހޭވެރިކަން ވެސް ނެތް ކަމަށް ފުލުހުން ވަނީ ބުނެފައެވެ.
މީގެ އިތުރުން މާލޭ ގެއެއްގެ ފަސްވަނަ ބުރިން މި މަހުގެ 21 ވީ ހުކުރު ދުވަހުގެ މެންދަމު 1:00ހާއިރު ވެސް މީހަކު ވެއްޓިފައިވެއެވެ.
މި ދެ މައްސަލަ ވެސް ފުލުހުން މިހާރު ގެންދަނީ ތަހުގީގު ކުރަމުންނެވެ.
