ޗެމްޕިއަންސް ލީގުގެ ޖާގަތައް ލިވަޕޫލާއި ޗެލްސީއަށް

އިނގިރޭސި ޕްރިމިއާ ލީގުގެ ގަދަ ހަތަރެއްގެ ތެރޭގައި މިދިޔަ ސީޒަނުގެ ޗެމްޕިއަން ލިވަޕޫލާއި ޗެލްސީ ހިމެނިއްޖެއެވެ.

ލީގުގެ ފަހު މެޗުތައް އާދީއްތަ ދުވަހުގެރޭ ކުޅުނުއިރު، މި މެޗުތަކުގެ ކުރިން އަންނަ ސީޒަނުގެ ޔުއެފާ ޗެމްޕިއަންސް ލީގުގެ ޖާގަތައް ކަށަވަރުކޮށްފައިވަނީ ޗެމްޕިއަންކަން ހޯދި މެންޗެސްޓާ ސިޓީ އާއި ދެވަނައިގައި އޮތް މެންޗެސްޓާ ޔުނައިޓެޑެވެ. އެހެންކަމުން ތާވަލުގެ ތިންވަނަ މަގާމާއި ހަތަރުވަނަ މަގާމަށް ތިން ޓީމެއް ވާދަކުރިއިރު، އާދީއްތަ ދުވަހުގެރޭ ކްރިސްޓަލް ޕެލަސް 2-0 ގެ ނަތީޖާއަކުން ބަލިކޮށް ލިވަޕޫލުން ވަނީ ތާވަލުގެ ތިންވަނަ ހޯދާފައެވެ.

އަމިއްލަ ދަނޑުގައި ކުޅުނު މެޗުގައި ގލިވަޕޫލުގެ ފަރާތުން ރަނގަޅު ކުޅުމެއް ފެނިގެންދިޔައިރު، މި މެޗުގެ ފުރަތަމަ ހާފުގައި އެ ޓީމުން ވަނީ ލީޑު ނަގާފައެވެ. މެޗުގެ 36 ވަނަ މިނެޓުގައި ކޯނަރަކުން މި ލަނޑު ލިވަޕޫލަށް ކާމިޔާބުކޮށްދިނީ ސަޑިއޯ މާނޭއެވެ. އަދި ދެވަނަ ހާފުގައި މުހައްމަދު ސަލާހު ދިން ޕާހަކުން މާނޭ ވަނީ އިތުރު ލަނޑެއް ޖަހައި، ލިވަޕޫލުގެ ލީޑު ފުޅާކޮށްދީފައެވެ. މި މެޗުން ޕެލަސް ބަލިވިއިރު، މި މެޗަކީ އެ ޓީމުގެ ދުވަސްވީ ކޯޗު ރޯއީ ހޮޖްސަންގެ ކޯޗިން ކެރިއަރުގެ ފަހު މެޗެވެ. 

އާދީއްތަ ދުވަހުގެރޭ ކުޅުނު މެޗުން މޮޅުވެ ލިވަޕޫލް ތާވަލުގެ ތިންވަނައަށް ޖެހިލިއިރު، އެ ޓީމަށް ވަނީ 69 ޕޮއިންޓް ލިބިފައެވެ. ދެވަނައިގައި އޮތް ޔުނައިޓެޑަށް 74 ޕޮއިންޓް ލިބިފައިވާއިރު، ލީގުގެ ފަހު މެޗުން އެ ޓީމު ވަނީ ވުލްވްސް އަތުން 2-1 ގެ ނަތީޖާއަކުން މޮޅުވެފައެވެ.

މީގެ އިތުރުން ލީގުގައި އާދީއްތަ ދުވަހުގެރޭ އެސްޓަން ވިލާ އަތުން 2-1 ގެ ނަތީޖާއަކުން ޗެލްސީ ބަލިވި ނަމަވެސް، ޗެލްސީއަށް ޗެމްޕިއަންސް ލީގުގެ ޖާގައެއް ލިބުނީ ޓޮޓެންހަމް ހޮޓްސްޕާ އަތުން 4-2 ގެ ނަތީޖާއަކުން ގަދަ ހަތަރަކަށް ވާދަކުރަމުން އައި ލެސްޓާ ސިޓީ ބަލިވުމާ ގުޅިގެންނެވެ.

ވިލާގެ ދަނޑުގައި އާދީއްތަ ދުވަހުގެރޭ ކުޅުނު މެޗުގައި ޗެލްސީގެ ފަރާތުން އާދައިގެ ކުޅުމެއް ފެނިގެންދިޔައިރު، ފުރަތަމަ ހާފުގައި ވިލާއިން ވަނީ ލީޑު ނަގާފައެވެ. މި ހާފު ނިމެން ދެ މިނެޓަށް ވެފައި ވަނިކޮށް މި ލަނޑު އެ ޓީމަށް ކާމިޔާބުކޮށްދިނީ ބާޓްރަންޑް ޓްރައޯރޭއެވެ. އަދި ދެވަނަ ހާފުގެ ކުރީކޮޅު ލިބުނު ޕެނަލްޓީއަކުން އަންވަރު އެލް-ގާޒީ ވިލާއަށް ލީޑު ފުޅާކޮށްދިން ނަމަވެސް، މެޗުގެ 70 ވަނަ މިނެޓުގައި ބެން ޗިލްވެލް ވަނީ ލަނޑެއް ޖަހައި، ޗެލްސީއަށް ފަރަގު ކުޑަކޮށްދީފައެވެ.

މި ނަތީޖާއާއެކު ތާވަލުގެ ހަތަރުވަނައިގައި ޗެލްސީ އޮތީ 67 ޕޮއިންޓް ހޯދައިގެންނެވެ. އަދި ތާވަލުގެ ފަސްވަނައަށް ލެސްޓާ ވެއްޓުނުއިރު، އެ ޓީމަށް ލިބިފައިވަނީ 66 ޕޮއިންޓެވެ.