އާދީއްތަ ދުވަހު ވެސް ކޮވިޑްގެ ކޭސްތައް 1،500ން މަތީގައި
މާލެ ސަރަހައްދުން އެކަނިވެސް 1،135 ކޭސް
ސަލާމަތީ ބާރުތަކުން ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތައް ތަންފީޒު ކުރުމުގެ މަސައްކަތުގައި
ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން 1،559 މީހުން ކޮވިޑަށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސް ހިސާބުތަކުން ދައްކައިފިއެވެ.
އެޗްޕީއޭއިން އެންމެ ފަހުން އާންމުކުރި ތަފާސް ހިސާބުތައް ދައްކާ ގޮތުން ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން 1،559 މީހުން ކޮވިޑަށް ޕޮޒިޓިވްވެފައިވާއިރު، އޭގެ ތެރެއިން 1،135 މީހުން ޕޮޒިޓިވްވެފައި ވަނީ މާލެ ސަރަހައްދުންނެވެ. އަދި އަތޮޅު ތެރެއިން 401 މީހުން ޕޮޒިޓިވްވެފައިވާއިރު، ރިސޯޓުތަކުން 20 މީހުން ވަނީ ޕޮޒިޓިވްވެފައެވެ. މީގެ އިތުރުން ސަފާރީތަކުން 3 މީހަކު ވަނީ ޕޮޒިޓިވްވެފައެވެ.
އިތުރު 1،559 މީހުން ކޮވިޑަށް ޕޮޒިޓިވްވުމާއިއެކު އެކްޓިވް ކޭސްތަކުގެ އަދަދު ވަނީ 23،464ށް އަރައިފައެވެ. އޭގެ ތެރެއިން 290 މީހުންނަށް ފަރުވާ ދެމުން އަންނަނީ ހޮސްޕިޓަލުގައި އެޑްމިޓް ކޮށްގެނެވެ. ރާއްޖެއިން އާދީއްތަ ދުވަހު އެކަނިވެސް ހަ މީހުން މި ބަލީގައި ނިޔާވެފައިވާއިރު، މި ބަލީގައި ނިޔާވި މީހުންގެ އަދަދު ވަނީ 129ށް އަރާފައެވެ. ރާއްޖެއިން މިހާތަނަށް 32،322 މީހުން ވަނީ ބަލިން ފަސޭހަވެފައެވެ.
ކޮވިޑް-19 ކޭސްތައް އިންތިހާއަށް އިތުރުވެފައިވާއިރު، ފަރުވާދޭނެ ސިއްހީ ހިދުމަތްތެރިން ވެސް މަދުވެ ބެޑް ކެޕޭސިޓީ ވެސް އަންނަނީ ފުލްވަމުންނެވެ. އޭގެ ސަބަބުން ރާއްޖެ މި ބަލީގެ ބޮޑު އަނދަވަޅަކަށް ވެއްޓިދާނެކަމުގެ ބިރު މިހާރު ވަނީ ހީވެފައެވެ. އެކަމަށްޓަކާ ފިޔަވަޅުތަކެއް ވެސް އަޅާފައިވާއިރު، ކާފިއު ވެސް ވަނީ އިއުލާންކޮށްފައެވެ.
