ކާފިއު ހިންގުމާއިއެކު ފީއަލީގައި ކޮވިޑް ކޮންޓްރޯލް ކުރުމަށް ޚާއްސަ ފިޔަވަޅުތަކެއް
ޚާއްސަ ފިޔަވަޅުތައް އަޅާފައިވަނީ މި މަހުގެ 23ން 29ގެ ނިޔަލަށް
ފ.ފީއަލީ، ކޮވިޑްގެ ހާލަތު ގޯސްވުމުން އެޗްޕީއޭއިން ވަނީ ޚާއްސަ ފިޔަވަޅުތަކެއް އަޅާފައި
ފ. ފިއަލީގައި ކޮވިޑް-19 ގެ ހާލަތު ގޯސްވެ، އެރަށުގައި ކާފިއު ހިންގުމާއިއެކު ޚާއްސަ ފިޔަވަޅުތަކެއް އަޅަން ހެލްތު ޕްރޮޓެކްޝަން އެޖެންސީ (އެޗްޕީއޭ)ން ނިންމައިފިއެވެ.
ޑިރެކްޓަރ ޖެނެރަލް އޮފް ޕަބްލިކް މައިމޫނާ އަބޫބަކުރު ސޮއި ކުރައްވާ ނެރުއްވާފައިވާ އިއުލާނުގައި ބުނީ ކޮވިޑްގެ ހާލަތު ގޯސްވެ ފީއަލީގައި ޚާއްސަ ފިޔަވަޅުތަކެއް އަޅަން ނިންމާފައިވާ ކަމަށެވެ. އަދި މިފިޔަވަޅުތައް އަޅާނީ މި މަހުގެ 23 ން 29 ގެ ނިޔަލަށް ކަމަށް އެޗްޕީއޭއިން ވަނީ ބުނެފައެވެ.
އެޗްޕީއޭއިން ފީއަލީގައި އަޅަން ނިންމާފައިވާ ފިޔަވަޅުތަކުގެ ތެރޭގައި ރޭގަނޑު 09:00ން ފެށިގެން ފަތިހު 04:00ށް ކާފިއު ހިންގުމާއި، ޕާޓީތަކާއި ހަފްލާތަކާއި، ރަސްމިއްޔާތުތައް ބޭއްވުން ހުއްޓާލުމާއި، އެއްގެއިން އަނެއްގެއަށް ޒިޔާރާތް ކުރުން ހުއްޓާލުމާއި، އެއްފަހަރާ ތިން މީހުނަށްވުރެ ގިނަ މީހުން މަގުމައްޗާއި އާންމު ތަންތާނގައި އެއްވުން ހުއްޓާލުމާއި، ސެލޫންތަކާއި ޖިމްތަކާއި، ބޯކޮށާ ތަންތަން ބަންދުކުރުމާއި، ހުރިހާ ކުޅިވަރު ހަރަކާތަކާއި، ކަސްރަތު ހަރަކާތްތައް ހިންގުން ހުއްޓާލުމާއި، ފިހާރަތަކުން ޚިދުމަތް ދޭއިރު، އެޗްޕީއޭއިން އާންމު ކޮށްފައިވާ ގައިޑްލައިނާ އެއްގޮތަށް ޚިދުމަތް ދިނުމާއި، ޔުނިވަރސިޓީތަކާއި ކޮލެޖުތަކަށް ދަރިވަރުން ހާޒިރު ކޮށްގެން ކިޔަވައިދިނުން ހުއްޓާލުމާއި، ހޮޓާތަކާއި ކެފޭތަކާއި، ރެސްޓޯރެންޓުތަކާއި، ކާބޯތަކެތި ޚިދުމަތްދޭ އެހެނިހެން ތަންތަނުން ދެމުންގެންދާ ޚިދުމަތްތައް ހުއްޓާލުން (ޑެލިވަރީގެ ހިދުމަތް ފިޔަވައި)، ހިމެނެއެވެ.
އެޗްޕީއޭއިން ބުނީ ކާފިއުގެ ވަގުތުގައި ބައެއް ފަރާތްތައް އިސްތިސްނާ ވާނެ ކަމަށާއި، އެއީ ސިފައިނާއި ފުލުހުންނާއި، ސިއްހީ ޚިދުމަތްދޭ އިދާރާތަކުގެ މުވައްޒަފުންނާއި، އެ މުވައްޒަފުން ދުއްވާ އުޅަނދުފަހަރާއި، އެމްބިއުލަންސް، ފީއަލީ ޓާސްކުފޯހުގެ ފާސް ލިބިފައިވާ ފަރާތްތައް އަދި އެމެޖެންސީކޮށް ސިއްހީ ޚިދުމަތް ހޯދަންޖެހޭ ފަރާތްތައް ކަމަށެވެ.
އެޗްޕީއޭއިން ބުނީ ފީއަލީގައި އަޅާފައިވާ ޚާއްސަ ފިޔަވަޅުތައް ތަންފީޒު ކުރުމަށް މޯލްޑިވްސް ޕޮލިސް ސާވިސްއަށާއި، ކަމާއި ބެހޭ އެހެން މުވައްސަސާތަކަށް އަންގާ ކަމަށެވެ.
