ގައުމީ ފުޓްބޯޅަ ސްކޫލުގެ ތަފުސީލުތައް އަންނަ ޖޫން މަހު އިއުލާން ކުރުމަށް މަސައްކަތްކުރަމުން އަންނަ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

ސަރުކާރުން ޚަރަދުކޮށްގެން ހެދުމަށް ހަމަޖެހިފައިވާ ގައުމީ ފުޓްބޯޅަ ސްކޫލް ހަދަމުން އަންނަނީ ހުޅުމާލޭގައެވެ. މި މަޝްރޫއަށް ދައުލަތުގެ ބަޖެޓުން ޚަރަދުކުރާއިރު، ސްކޫލުގެ މަސައްކަތް ފެށީ 2018 ވަނަ އަހަރުގެ ޖުލައި މަހުގެ ކުރީކޮޅުގައެވެ. ފުޓްބޯޅަ ސްކޫލުގެ އިމާރާތުގެ މަސައްކަތް ނިމިފައިވާއިރު، ޓާފް ދަނޑާއި އެހެނިހެން ބައެއް މަސައްކަތްތައް ކުރަމުންދާ ކަމަށް އެފްއޭއެމުން މީގެ ކުރިން ވަނީ ބުނެފައެވެ.

ގައުމީ ފުޓްބޯޅަ ސްކޫލް (ބައިނަލްއަގުވާމީ ފެންވަރުގެ ހައި ޕާފޯމަންސް ސެންޓަރު) ގައި އެންމެ އިސްކޮށް ހުންނާނީ ޔުއެފާ ޗެމްޕިއަންސް ލީގު ކާމިޔާބުކޮށްފައިވާ ލެޖެންޑެއް ކަމަށް އެފްއޭއެމުން މީގެ ކުރިން ވަނީ ބުނެފައެވެ. އަދި މި އަހަރުގެ މާޗު މަހުގެ ތެރޭގައި ބައްސާމާއި ކުޅިވަރާ ބެހޭ ވަޒީރު އަޙްމަދު މަޚްލޫފް ވަނީ ރާއްޖޭގެ ފުޓްބޯޅަ ކުރިއެރުވުމާ ގުޅޭގޮތުން ސްޕެއިން އަދި ރެއާލް މެޑްރިޑުގެ ލެޖެންޑް އިކާ ކަސިއަސް އާއި އެ ޓީމަށް މީގެ ކުރިން ކުޅެފައިވާ ޑިފެންޑަރު މިޝޭލް ސަލްގާޑޯއާއެކު މަޝްވަރާ ބައްދަލުވުމެއް ބާއްވާފައެވެ.

ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން ބައްސާމް ވިދާޅުވީ އެކި ސަބަބުތަކާ ހުރެ ފުޓްބޯޅަ ސްކޫލް ހުޅުވުން ވަރަށް ބޮޑަށް ލަސްވެގެންދިޔަ ނަމަވެސް، ދެން އޮތީ ފުޓްބޯޅަ ސްކޫލުގެ ތަފުސީލުތައް އިއުލާން ކުރުން ކަމަށެވެ. އެގޮތުން ފުޓްބޯޅަ ސްކޫލުގައި ބައިވެރިވާ ބޭރުގެ ފުޓްބޯޅަ ތަރީގެ ތަފުސީލާއި، އަތޮޅުތަކުގައި ހެދިގެންދާ އެކެޑަމީގެ އިތުރުން ފުޓްބޯޅަ ސްކޫލް ކުރިއަށްދާނެ ގޮތުގެ ތަފުސީލުވެސް އިއުލާން ކުރެވިގެންދާނެ ކަމަށް ވިދާޅުވިއެވެ.

ބައްސާމް ވިދާޅުވީ އެ ހުރިހާ ކަމެއް އިއުލާން ކުރަން މީގެ ކުރިން ތާވަލުކޮށްފައި އޮތީ މި މަހުގެ 20 ވަނަ ދުވަހަށް ކަމަށާއި، އެހެންނަމަވެސް ރާއްޖޭގެ ހާލަތު އޮތްގޮތުން މި ވަގުތު އެކަން ކުރެވެން ނެތް ކަމަށެވެ. އެހެންކަމުން އުއްމީދަކީ އަންނަ މަހުގެ ތެރޭގައި ފުޓްބޯޅަ ސްކޫލުގެ ތަފުސީލުތައް އިއުލާން ކުރެވިގެން ދިއުން ކަމަށްވެސް ބައްސާމް ވިދާޅުވިއެވެ.

ގައުމީ ފުޓްބޯޅަ ސްކޫލް ހުޅުވުމަށް މަސައްކަތްކުރަމުން އަންނައިރު، އެ ސްކޫލުގައި ކުޅުންތެރިންނަށް ކިޔަވައިދޭ ކަރިކިއުލަމް ތައްޔާރުކުރުމުގެ މަސައްކަތް ތަޢުލީމާ ބެހޭ ވުޒާރާއާ ގުޅިގެން މިދިޔަ އަހަރުގެ ތެރޭގައި ވަނީ ފަށާފައެވެ. ހުޅުމާލޭގެ ފުރަތަމަ ފިޔަވަހީގެ މަސައްކަތް ނިންމައި މި އަހަރު ސްކޫލް ހުޅުވުމަށް މަސައްކަތް ކުރަމުން އަންނައިރު، އެ ސްކޫލުގައި ހިމެނޭނީ އެކޮމެޑޭޝަން ބްލޮކަކާއި ޓާފް ދަނޑެއްގެ އިތުރުން އޮފީހެއް ކަމަށް އެފްއޭއެމުން މީގެ ކުރިން ވަނީ ބުނެފައެވެ.

މި އެކެޑަމީއަށް ކުދިން ނެގުމަށް ހަމަޖެހިފައިވަނީ އެފްއޭއެމުގެ ޓެކްނިކަލް ސްޓާފުން އަތޮޅު ތެރެއަށް ގޮސްގެން ކަމަށާއި، އެކެޑަމީއަށް ފުރަތަމަ ނަގާނީ 13 އަހަރާއި 17 އަހަރާ ދެމެދުގެ ކުދިން ކަމަށް މައުލޫމާތު ލިބިފައިވެއެވެ. އަދި ކުދިން ނަގާއިރު ބޮޑަށް ބަލާނީ ފުޓްބޯޅައަށް މަޝްހޫރު ރަށްތަކަށް ކަމަށާއި، އެކެޑަމީއަށް ހޮވޭ ކުދިން އެކެޑަމީގައި ދިރިއުޅޭ ގޮތަށް ބަދަލުކޮށް، އެ ކުދިންގެ ކިޔެވުން ހަމަޖައްސައިދޭނެ ކަމަށްވެސް އެފްއޭއެމުން މީގެ ކުރިން ވަނީ ބުނެފައެވެ.