ހޮނިހިރު ދުވަހު ރިޕޯޓްކުރި ކޮވިޑް-19 ކޭސްތަކުގެ އަދަދު 2000އާ ގާތަށް
މާލެ ސަރަހައްދުން 1،518 މީހުންނާއި އަތޮޅުތެރެއިން 431 މީހުންގެ އިތުރަށް ރިސޯޓުތަކުން 11 މީހުން
ސަލާމަތީ ބާރުތަކުން ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތައް ތަންފީޒު ކުރުމުގެ މަސައްކަތުގައި
ހޮނިހިރު ދުވަހު ކޮވިޑް-19 ޖެހިގެން ރިޕޯޓުކުރި ކޭސްތަކުގެ އަދަދު 2،000 އާއި ގާތަށް ޖެހިއްޖެއެވެ.
އެޗްޕީއޭއިން އާންމުކުރި ތަފާސްހިސާބުތައް ދައްކާ ގޮތުން، ހުކުރު ދުވަހުގެ އިރު އޮއްސި ހަޔަކާ ހޮނޮހިރު ދުވަހުގެ އިރު އޮއްސި ހަޔަކާ ދެމެދު ނެގި 6،333 ސާމްޕަލްގެ ތެރެއިން 1960 މީހުން ވަނީ ޕޮޒިޓިވްވެފައެވެ. އެއީ މާލެ ސަރަހައްދުން 1،518 މީހުންނާއި އަތޮޅުތެރެއިން 431 މީހުންގެ އިތުރަށް ރިސޯޓުތަކުން 11 މީހުންނެވެ.
މިއާއެކު ޕޮޒިޓިވް ކޭސްތަކުގެ އަދަދު 54،365ށް އަރާފައިވާއިރު އޭގެ ތެރެއިން 31،812 މީހުން ވަނީ ރަނގަޅުވެފައެވެ. އަދި މިހާރު ފަރުވާދެމުން އަންނަނީ 22،421 މީހުންނަށެވެ. ފަރުވާދެމުން އަންނަ މީހުންގެ ތެރެއިން އެޑްމިޓްކޮށްފައިވާ މީހުންގެ އަދަދު ވަނީ 300އާ ގާތްކޮށްފައެވެ. އެގޮތުން 294 މީހަކު އެޑްމިޓްކޮށްފައިވާއިރު، ބެޑް ކެޕޭސިޓީ ފުލްވަމުންދާތީ ކެޕޭސިޓީ އިތުރުކުރުމުގެ މަސައްކަތް އެޗްޕީއޭއިން އަންނަނީ ކުރަމުންނެވެ.
މި ބަލީގައި ރާއްޖެއިން 123 މީހަކު މިހާތަނަށް މަރުވެފައިވާއިރު މި މަހު އެކަނި ވެސް މިހާތަނަށް 50 މީހުން ވަނީ މަރުވެފައެވެ. އޭގެ ތެރެއިން އެންމެ ގިނަ މީހުން މަރުވީ މި މަހުގެ 19ވަނަ ދުވަހުއެވެ. އެއީ 7 މީހުންނެވެ.
ކޮވިޑް-19 ކޭސްތައް އިންތިހާއަށް އިތުރުވެފައިވާއިރު، ފަރުވާދޭނެ ސިއްހީ ހިދުމަތްތެރިން ވެސް މަދުވެ ބެޑް ކެޕޭސިޓީ ވެސް އަންނަނީ ފުލްވަމުންނެވެ. އޭގެ ސަބަބުން ރާއްޖެ މި ބަލީގެ ބޮޑު އަނދަވަޅަކަށް ވެއްޓިދާނެކަމުގެ ބިރު މިހާރު ވަނީ ހީވެފައެވެ. އެކަމަށްޓަކާ ފިޔަވަޅުތަކެއް ވެސް އަޅާފައިވާއިރު، ކާފިއު ވެސް ވަނީ އިއުލާންކޮށްފައެވެ.
