ގާނޫނީ ވަކީލު އަހުމަދު ޒަނީން އާދަމް ނިޔާވެއްޖެ
22 މެއި 2021 | ހޮނިހިރު 16:40ވަކީލު ޒަނީން ނިޔާވިއިރު އުމުރަކީ 59 އަހަރު
އަހުމަދު ޒަނީން - އޭނާ ނިޔާވެފައިވަނީ ކޮވިޑަށް ފަރުވާ ހޯދަމުން ދަނިކޮށް
ގާނޫނީ ވަކީލު އަހުމަދު ޒަނީން އާދަމް ނިޔާވެއްޖެއެވެ.
މައުލޫމާތު ލިބިފައިވާ ގޮތުގައި ޒަނީން ނިޔާވެފައިވަނީ ކޮވިޑް-19 އަށް ހުޅުމާލޭ ކޮވިޑް ފެސިލީޓިގައި ފަރުވާދެމުން ދަނިކޮށް ހޮނިހިރު ދުވަހު މެންދުރުގެ ވަގުތެއްގައެވެ. ވަކީލު ޒަނީން ނިޔާވިއިރު އުމުރަކީ 59 އަހަރެވެ. ޒަނީންގެ މަރާއެކު ރާއްޖެއިން ކޮވިޑް ބަލީގައި ނިޔާވި މީހުންގެ އަދަދު މިހާރު ވަނީ 122 އަށް އަރާފައެވެ. އަދި މިއީ މިއަދު މި ބަލީގައި ނިޔާވި ދެވަނަ ފަރާތެވެ.
ޒަނީން އަކީ އިދިކޮޅު ޕީޕީއެމް ޕީއެންސީ ކޯލިޝަންގެ ލީގަލް ޓީމުގެ މެންބަރެކެވެ. ޒަނީން އާދަމް ނިޔާވުމާއި ގުޅިގެން ޕީޕީއެމް ޕީއެންސީން ނެރުނު ނޫސްބަޔާނެއްގައި ބުނެފައިވަނީ އަޙްމަދު ޒަނީން އާދަމް އަކީ މި ކޯލިޝަން އަށް ޤާނޫނީ ގޮތުން ގިނަ ގުނަ، އަގުނުކުރެވޭހާ މުޙިންމު މަސައްކަތްޕުޅު ތަކެއް ކޮށްދެއްވާފައިވާ އަދި ޕީޕީއެމް ގެ ފިކުރުގެ ފެށުން ކަމުގައިވާ ޑީއާރްޕީ ގެ ދުވަސް ވަރުން ފެށިގެން ދެގޮތެއް ނުވެ ސާބިތުކަންމަތީ ޚިދުމަތުގައި ދެމި ހުންނެވި ބޭފުޅެއްކަމަށެވެ. މި ހިތާމަވެރި ދަނޑިވަޅުގައި އަލްމަރްހޫމް ޒަނީން ގެ ޢާއިލާއަށް ޕީޕީއެމްގެ ރައީސް، ރައީސް ޢަބްދުﷲ ޔާމީން ޢަބްދުލްޤައްޔޫމާއި، މިކޯލިޝަންގެ ލީޑަރޝިޕާއި، ކައުންސިލާއި، ޕާލަމަންޓްރީ ގްރޫޕާއި، ސްޓިއަރިންގ ކޮމިޓިތަކާއި އަދި ކޯލިޝަންގެ އެންމެހާ މެންބަރުންގެ ނަމުގައި ތަޢުޒިޔާ ދަންނަވަމެވެ. އަދި ޢާއިލާއަށް ކެތްތެރިކަން މިންވަރުކުރެއްވުން އެދި ދުޢާ ކުރާ ކަމަށް ބުނެފައިވެއެވެ.
ހޮނިހިރު ދުވަހު ކޮވިޑްގައި އެންމެ ފުރަތަމަ ނިޔާވެފައިވަނީ މެންދުރު 12:02 ހާއިރު ހުޅުމާލެ މެޑިކަލް ފެސިލިޓީގައި ފަރުވާ ހޯދަމުންދިއަ އުމުރުން 48 އަހަރުގެ ދިވެހި ފިރިހެނެއްކަމަށެވެ. މިއީ ރާއްޖޭން މި ބަލީގައި ނިޔާވި 121 ވަނަ މީހާއެވެ. މީގެ އިތުރުން ހަވީރު 4:15 ގައި ވެސް ވަނީ ހުޅުމާލެ މެޑިކަލް ފެސިލިޓީގައި ފަރުވާދެމުން ދިޔަ އުމުރުން 59 އަހަރުގެ ދިވެހި ފިރިހެނެއް ނިޔާވެފައެވެ.
ރާއްޖޭގެ ކޮވިޑް-19ގެ ހާލަތު ގޯސްވެފައިވާއިރު ކޮވިޑްގެ ސަބަބުން ނިޔާވަމުންދާ މީހުންގެ އަދަދުވެސް ދަނީ އިތުރު ވަމުންނެވެ. ހުކުރު ދުވަހު އެކަނި ވެސް ރާއްޖޭން މި ބަލީގައި ހަތަރު މީހަކު ނިޔާވެގެން ރިޕޯޓުކޮށްފައިވެއެވެ. މީގެ އިތުރުން ކޮވިޑް ޖެހިގެން ރާއްޖޭގައި މިފަހުން އެންމެ ގިނަ މީހުން އެއްދުވަހާ ނިޔާވެގެން ރިޕޯޓްކޮށްފައިވަނީ ބުދަ ދުވަހުއެވެ. އެދުވަހު އެކަނި 7 މީހުން ވަނީ ނިޔާވެފައެވެ. ކޮވިޑްގެ ހާލަތު ގޯސްވަމުން ދިއުމާއެކު މާލެ ސަރަހައްދުގެ އިތުރުން ރާއްޖޭގެ އެކި ކަންކޮޅުތަކުގައި އަޅާފައިވާ ފިޔަވަޅުތައް އެޗްޕީއޭއިން ވަނީ ވަރުގަދަ ކޮށްފައެވެ. އެގޮތުން މިހާރު ވެސް މާލެ ސަރަހައްދުގެ އިތުރުން ބައެއް ރަށްރަށުގައި ކަރފިއު ވެސް ދަނީ ހިންގަމުންނެވެ.
