ފަލަސްތީނު ބިމުގައި ތިބީ އެގައުމުގެ ރައްޔިތުން, ނިކުންނަން ޖެހޭނީ ބޭރުންއައި މީހުން – އިސްލާމިކް މިނިސްޓަރު
ޑރ.ޒާހިރު ވިދާޅުވީ މިކަހަލަ ދަނޑިވަޅެއްގަ ފަލަސްތީނުގެ ރައްޔިތުންނަށް އެހީތެރިވުމަކީ ކޮންމެހެން ވެސް ކުރަން ޖެހޭ ކަމެއް ކަމަށް
އިސްލާމިކް މިނިސްޓަރ، ޑރ. އަހުމަދު ޒާހިރް އަލީ
ފަލަސްތީނުގެ ރައްޔިތުން އެތިބީ އެމީހުންގެ ގައުމުގައި ކަމަށާއި, އެތަނުން ފައިބަން ޖެހޭނީ ބޭރުން އައި އިޒްރޭލު މީހުން ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވެއްޖެއެވެ.
ފަލަސްތީނުގެ ރައްޔިތުންނަށް އެހީތެރިވުމަށް ރާއްޖެޓީވީން ކުރިއަށް ގެންދާ ޚާއްސަ ޓެލެތޮންއަށް ދެއްވި ބަސްދީގަތުމެއްގައި ޑރ. ޒާހިރު ވިދާޅުވީ ޔަހޫދީން ފަލަސްތީނުގެ ބިމަށް އައިސް ވެރިވެގަނެ, އެތަނުގެ ރައްޔިތުންނަށް އަނިޔާކުރާ ކުރުން އެއީ އެއްގޮތަކަށް ވެސް ބަލައި ގަނެވޭނެ ކަމެއް ނޫން ކަމަށެވެ. އެހެންކަމުން އެ ވަޒަނުން ފައިބަން ޖެހޭނީ އިޒްރޭލު މީހުން ކަމަށް ޑރ.ޒާހިރު ވިދާޅުވިއެވެ.
މިނިސްޓަރު ވިދާޅުވީ ފަލަސްތީނުގެ ރައްޔިތުންނަށް އެމީހުންގެ ވަޒަން އަނބުރާ ލިބޭނެ ކަމަށް އުންމީދު ކުރައްވާ ކަމަށެވެ.
ފަލަސްތީނުގެ ރައްޔިތުންނަށް އެހީތެރިވުމުގެ މުހިންމުކަމުގެ މައްޗަށް ވެސް ޑރ. ޒާހިރު އަލިއަޅުއްވާލެއްވިއެވެ. ޑރ.ޒާހިރު ވިދާޅުވީ މިކަހަލަ ދަނޑިވަޅެއްގަ ފަލަސްތީނުގެ ރައްޔިތުންނަށް އެހީތެރިވުމަކީ ކޮންމެހެން ވެސް ކުރަން ޖެހޭ ކަމެއް ކަމަށެވެ. އަދި އެންމެ ރަނގަޅުގޮތަކީ ތަނަވަސްކަން ލިބިހުރި މިންވަރަކުން ފަލަސްތީނުގެ ރައްޔިތުންގެ ހައްގުގައި الله ގެ މަގުގައި ހޭދަކުރުން ކަމަށް ވިދާޅުވިއެވެ.
މީގެ އިތުރުން ޑރ. ޒާހިރު ވިދާޅުވީ ދިވެހި ސަރުކާރުން ފަލަސްތީނުގެ މައްސަލައިގައި ދެކޭ ގޮތް ވަރަށް ސާފު ކަމަށާއި, ސަރުކާރުން ތިބީ ފަލަސްތީނުގެ ރައްޔިތުންނާ އެކުގައި ކަމަށެވެ. އަދި ކުރިއަށް އޮތް ތަނުގައި ވެސް މިގޮތުގައި ސަރުކާރުން ދެމިތިބޭނެ ކަމަށެވެ.
ފަލަސްތީނުގެ ހައްގުގައި ދިވެހި ސަރުކާރުން ގެންގުޅޭ ވިސްނުން ބޭރުގެ ބައެއް މީޑިއާތަކުން ވެސް ފާހަގަ ކޮށްފައި ވެއެވެ. އަދި ފަލަސްތީނުގެ ރައްޔިތުން ވެސް ގެންދަނީ މިކަމުގައި ސަރުކާރުން ކޮށްދެއްވާ މަސައްކަތްތަކަށް ޝުކުރު އަދާކުރަމުންނެވެ. ހަމަ އެހެންމެ ދިވެހިން ފަލަސްތީނުގެ ރައްޔިތުންނާއެކު ތިބި ކަން ހާމަކުރުމަށް ކުރަމުންދާ ގިނަގުނަ ކަންތައްތަކަށާއި ދެމުންގެންދާ އެހީތެރިކަން ވެސް ފަލަސްތީނުގެ ރައްޔިތުން މީސްމީޑިއާގައި ދަނީ ފާހަގަކުރަމުންނެވެ.
