ތުޅާދޫއިން މިހާތަނަށް 49 މީހަކު ޕޮޒިޓިވް
މިހާތަނަށް 49 މީހަކު ޕޮޒިޓިވްވެފައިވާއިރު، 466 ސާމްޕަލެއް ނަގާފައިވޭ
ބ.ތުޅާދޫ، މިހާރު އެރަށް ވަނީ މޮނިޓަރިންގެ ހާތަނަށް ގެނެސްފައި
ބ.ތުޅާދޫއިން 49 މީހަކު ކޮވިޑް-19ށް ޕޮޒިޓިވްވެއްޖެއެވެ.
ތުޅާދޫ ހެލްތް ސެންޓަރުން ނެރިފައިވާ ތަފާސްހިސާބުތައް ދައްކާ ގޮތުން ހުކުރު ދުވަހު އެކަނި ވެސް 4 މީހަކު ވަނީ ޕޮޒިޓިވްވެފައެވެ. ހެލްތް ސެންޓަރުން ބުނީ މިހާތަނަށް 49 މީހަކު ޕޮޒިޓިވްވެފައިވާއިރު، 466 ސާމްޕަލެއް ނަގާފައިވާ ކަމަށެވެ. އަދި ނަތީޖާ ނުލިބި 43 ސާމްޕަލެއް އެބައޮތް ކަމަށެވެ.
ކޮންޓެކްޓް ޓްރޭސިންގެ މަސައްކަތްތައް ކުރިއަށްދާ ކަމަށާއި، މިމަސައްކަތްތަކަށް އާއްމު ރައްޔިތުންގެ ފުރިހަމަ އެއްބާރުލުން ލިބޭ ކަމަށް އެސެންޓަރުން މައުލޫމާތުދެއެވެ.
ކޮވިޑް-19ގެ ކޭސްއެއް ފެނުމާއި ގުޅިގެން ތުޅާދޫ މޮނިޓަރިންގެ ހާލަތަށް ގެނައީ މިމަހުގެ 9 ވަނަ ދުވަހުއެވެ. ޕޮޒިޓިވް ކޭސްތައް ފެންނަމުންދާތީ ރައްކާތެރިވުމުގެ ގޮތުން ގިނަ ފިޔަވަޅުތަކެއް އަޅާފައިވެއެވެ. އެގޮތުން ޒަރޫރީ ބޭނުމެއްގައި މެނުވީ ބޭރަށް ނުކުމެ އުޅުން ވަނީ މަނާކޮށްފައެވެ. ބޭރުގެ މަސައްކަތްތެރިންނަށް ސައިޓްތަކުގައި މަސައްކަތް ކުރުން މަނާކޮށްފައިވާއިރު، ފިހާރަތަކާއި ރެސްޓައުރެންޓް/ކެފޭތަކުން ޑެލިވަރީގެ ޚިދުމަތް ހޯދުމަށް އިލްތިމާސްކޮށްފައިވެއެވެ.
ރާއްޖެއެމްވީ އަށް މައުލޫމާތު ލިބިފައިވާގޮތުގައި މެއި މަހުގެ ހަތަރު ވަނަ ދުވަހުގެ ރޭ މާލޭގައި ތިބި ތުޅާދޫގެ 15 ވަރަކަށް ރައްޔިތުން ވަނީ ރަށަށް ގޮސްފައެވެ. އަދި މިމީހުން ރަށަށް ގޮސްފައި ވަނީ ހަތް ވަނަ ދުވަހު އޮތް ކައިވެނި ޕާޓީއަކަށެވެ. މާލެއިން ތުޅާދޫއަށް ދިޔަ މީހުންގެ ތެރޭގައި ކުޑަކުދިން ހިމެނޭ ކަމަށް ވަނީ މައުލޫމާތު ލިބިފައެވެ.
މެއި ހަތަރު ވަނަ ދުވަހު ތުޅާދޫއަށް ފުރި މީހުން ރަށަށް އެރުވުމަށް ރަށުގެ ކައުންސިލުން ފަސް ޖެހުނު ނަމަވެސް، ކައުންސިލުން ވަނީ އެމީހުން ރަށަށް އެރުމުގެ ފުރުސަތު ދީފައެވެ. މައުލޫމާތު ލިބިފައިވާ ގޮތުގައި ތުޅާދޫ އިން މީހަކު ޕޮޒިޓިވްވެފައި ވަނީ ސިމްޓޮމެޓިކް ވެގެން ނެގި ސާމްޕަލްތަކެކެވެ.
