ހުކުރު ދުވަހުގެ ހަތަރުވަނަ މަރު، ޖުމްލަ 120ށް
މަރުވީ 57 އަހަރުގެ ދިވެހި އަންހެނެއް
ސަލާމަތީ ބާރުތަކުން ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތައް ތަންފީޒު ކުރުމުގެ މަސައްކަތުގައި
ރާއްޖެއިން ކޮވިޑް-19 ޖެހިގެން ހުކުރު ދުވަހު ހަތަރު ވަނަ މީހަކު މަރުވެއްޖެއެވެ.
މިއާއެކު ރާއްޖެއިން މި ބަލީގައި މަރުވި މީހުންގެ ޖުމްލަ އަދަދު ވަނީ 120ށް އަރާފައެވެ.
ހެލްތު ޕްރޮޓެކްޝަން އެޖެންސީން ބުނީ މަރުވީ 57 އަހަރުގެ ދިވެހި އަންހެނެއް ކަމަށެވެ. އަދި އެމީހާ މަރުވީ ހުޅުމާލެ މެޑިކަލް ފެސިލިޓީގައި ފަރުވާދެމުންދަނިކޮށް، ހުކުރު ދުވަހުގެ ރޭ 7:46 ހާއިރު ކަމަށް އެޗްޕީއޭއިން މައުލޫމާތުދެއެވެ.
ކޮވިޑް ޖެހިގެން ރާއްޖޭގައި މިފަހުން އެންމެ ގިނަ މީހުން އެއްދުވަހާ ނިޔާވެގެން ރިޕޯޓްކޮށްފައިވަނީ ބުދަ ދުވަހުއެވެ. އެދުވަހު އެކަނި 7 މީހުން ވަނީ ނިޔާވެފައެވެ.
ރާއްޖޭގައި މިފަހުން ކޮވިޑްގެ ހާލަތު ވަނީ ވަރަށް ބޮޑަށް ގޯސްވެފައެވެ. އަދި މިއާއެކު ކޮވިޑް ކޮންޓްރޯލްކުރުމަށް އެޗްޕީއޭއިން ވަނީ މާލެ ސަރަހައްދާއި އަތޮޅު ތެރޭގައި ގިނަ ފިޔަވަޅުތަކެއް އަޅާފައެވެ.
