އިސްރާއީލުން ގައްޒާއަށް ދޭ ހަމަލާތައް ވަގުތީ ގޮތުން ހުއްޓާލަން ނިންމައިފި
20 މެއި 2021 | ބުރާސްފަތި 21:51އިސްރާއީލާއި ހަމާސް ޖަމާއަތާއި ދެމެދު އެއްބަސްވުމަކަށްއައީ މިސްރު މެދުވެރިކޮށް ކުރިޔަށް ގެންދިޔަ މަޝްވަރާތަކަށްފަހު
އިސްރާއީލުން ފަލަސްތީނަށް ހަމަލާ ދެނިކޮށް
އިސްރާއީލުގެ ޔަހޫދީ ސަރުކާރުން ފަލަސްތީނުގެ ގައްޒާއަށް ދެމުން ގެންދާ ހަމަލާތައް ވަގުތީ ގޮތުން ހުއްޓައިލާން ނިންމައިފިއެވެ.
އިސްރާއީލުގެ ގައުމީ ސަލާމަތާއި ބެހޭ މަޖިލީހުން ހަމަލާތައް ހުއްޓާލަން ނިންމާފައި ވަނީ އިސްރާއީލުގެ ހައި ލެވެލް ސެކިއުރިޓީ ކެބިނެޓުގައި ހިމެނޭ ހުރިހާ މިނިސްޓަރުންގެ އަޣްލަބިއްޔަތުންނެވެ.
އިސްރާއީލުން ބުނީ ގައްޒާއަށް ދެމުން ގެންދިޔަ ހަމަލާތައް ހުއްޓާލަން ނިންމީ އެގައުމުގައި ހަރަކާތްތެރިވާ ޓެރަރިސްޓު ޖަމާއަތް ބަލިކަށިވެފައިވާތީ ކަމަށާއި، ގައްޒާއިން މި ހަނގުރާމައިގައި ހުރިހާ ކާމިޔާބީއެއް ހޯދައިފައިވާ ކަމަށެވެ.
އިސްރާއީލުން ހަމަލާތައް ހުއްޓައިލާން ނިންމާފައިވާކަން އިއުލާންކުރިއިރު ހަމާސްއިން ވެސް ވަނީ އިސްރާއީލަށް ދެމުން ގެންދާ ހަމަލާތައް ހުއްޓާލަން ނިންމާފައިވާކަން އިއުލާން ކޮށްފައެވެ. ހަމާސްއިން ބުނީ މިރޭ ފަލަސްތީނު ގަޑިން ދަންވަރު 02:00 ގައި ހަމަލާތައް ހުއްޓާލުމަށް ދެފަރާތުންވެސް ނިންމާފައިވާ ކަމަށެވެ.
އިސްރާއީލާއި ހަމާސް ޖަމާއަތާއި ދެމެދު އެއްބަސްވުމަކަށްއައީ މިސްރު މެދުވެރިކޮށް ކުރިޔަށް ގެންދިޔަ މަޝްވަރާތަކަށްފަހުގައެވެ.
އިސްރާއީލުން ގައްޒާއަށް ދިން ހަމަލާތަކުގައި މިހާތަނަށް 232 މީހުން ވަނީ ޝަހީދުވެފައެވެ. މީގެ ތެރޭގައި 65 ކުޑަކުދިންވެސް ހިމެނެއެވެ. އަދި މި ހަމަލާތަކުގައި 1،600ށް ވުރެ ގިނަ މީހުން ވަނީ ޒަހަމްވެފައެވެ.
