ރައީސް ސާލިހަކީ ޚިޔާލު ތަފާތުވާ މީހުންނާއެކު މަސައްކަތް ކުރެއްވޭނެ ބޭފުޅެއް: މެމްބަރު ރޮޒައިނާ
19 މެއި 2021 | ބުދަ 18:28ރައީސް ސާލިހާއެކު މަސައްކަތް ނުކުރެވޭނެ އެއްވެސް މީހަކު ނުހުންނާނެ
ފަލަސުރުހީ ޕްރޮގްރާމްގައި މެމްބަރު ރޮޒެއިނާ ވާހަކަދައްކަވަނީ،
މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހަކީ ޚިޔާލު ތަފާތުވާ މީހުންނާއެކު ވެސް މަސައްކަތް ކުރެއްވުމުގެ ލާމަސީލު ބޭފުޅެއް ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ އެމްޑީޕީ މެމްބަރު ރޮޒައިނާ އާދަމް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި މެމްބަރު ރޮޒައިނާ ވިދާޅުވީ މިހާރު ހުންނެވި ރައީސަކީ ޚިޔާލު ތަފާތުވާ މީހުންނާއެކުވެސް މަސައްކަތް ކުރެއްވުމުގެ ލާމަސީލު މިސާލެއް ކަމަށާއި، ރައީސް ސާލިހާއި އެކުގައި މަސައްކަތް ނުކުރެވޭނެ އެއްވެސް މީހަކު ނުހުންނާނެ ކަމަށެވެ.
މިސާލު ޖައްސަވަމުން މެމްބަރު ރޮޒައިނާ ވިދާޅުވީ މާލެ ސިޓީގެ މޭޔަރު ޑރ. މުހައްމަދު މުއިއްޒާއެކު ވެސް ރައީސް ސާލިހަށް މަސައްކަތް ކުރެއްވޭނެ ކަމަށެވެ. މުއިއްޒު ނިސްބަތްވާ ޕީޕީއެމް/ޕީއެންސީ އިދިކޮޅު ސިޔާސީ ޕާޓީއެއް ކަމުގައި ވިޔަސް މަސައްކަތް ކުރަން ވާނީ ސަރުކާރާ އެކުކަން މެމްބަރު ރޮޒައިނާ ފާހަގަކުރެއްވިއެވެ.
މެމްބަރު ރޮޒައިނާ ވިދާޅުވީ ސަރުކާރަށް ޖެއްސުން ކުރުމުގެ ނިޔަތުގައި މަސައްކަތް ކުރާނަމަ އެކަމުގެ ދެރައާއި ގެއްލުން ލިބޭނީ ރައްޔިތުންނަށް ކަމަށެވެ. ސަރުކާރެއް އިންތިޚާބު ކޮށްފައި އޮތީ ވެސް ވައުދުތަކަކާއެކު ކަމަށާއި، ދެފަރާތުން އެއްބަސްވެގެން މަސައްކަތް ކޮށްފިނަމަ ރައްޔިތުން ބޭނުންވާ ތަރައްގީއާއި ޚިދުމަތްތައް ދެވިގެންދާނެ ކަމަށް މެމްބަރު ވިދާޅުވިއެވެ.
މެމްބަރު ރޮޒައިނާ ވިދާޅުވީ ކައުސިލްތަކަކީ ވަކި ސަރުކާރު ތަކެއް ނޫން ކަމަށާއި، ކައުންސިލްތަކުން ވެސް މަސައްކަތް ކުރަންވާނީ ސަރުކާރުގެ މައި ޕޮލިސީތަކާއި އެ ޕްލޭންތަކާއި އެއްގޮތްވާ ގޮތުގެ މަތިން ކަމަށެވެ. ކައުންސިލްތަކުން މުނިސިޕަލް ޚިދުމަތްތައް ދިނުމަށް ލާމަރުކަޒީ ނިޒާމުން ބާރުތައް ކައުންސިލްތަކަށް ދީފައިވަނީ މިނިވަން ކަމާއެކު މަސައްކަތް ކުރުމަށް ކަމަށް މެމްބަރު ވިދާޅުވިއެވެ. ނަމަވެސް ސަރުކާރުގެ މައިގަނޑު ޕޮލިސީތަކާއި ދެކޮޅަށް ކައުންސިލްތަކަށް މަސައްކަތް ކުރެވޭ ގޮތަކަށް ލާމަރުކަޒީ ގާނޫނުން ޖާގަ ދީފައިނުވާނެ ކަމަށެވެ.
މެމްބަރު މިމޭރުމުން ވާހަކަދައްކަވާފައިވާއިރު، އަންގާރަ ދުވަހުގެ މާލެސިޓީ ކައުންސިލުން ބޭއްވި ނޫސްވެރިންގެ ބައްދަލުވުމުގައި މޭޔަރު ޑރ.މުހައްމަދު މުއިއްޒު ވިދާޅުވީ ގުޅިފަޅަކީ ގެދޮރުވެރިކަމުގެ މަންޒިލަކަށް ހަދަން ކައުންސިލުން ފާސްކޮށްފައިވާ ކަމަށެވެ. މުއިއްޒު ވިދާޅުވީ، އެކަމާއި ގުޅޭގޮތުން ރައީސް އިބްރާހިމް މުހައްމަދު ސާލިހާއި ބައްދަލު ކުރައްވާނެ ކަމަށެވެ. އަދި ރައްޔިތުންގެ ފަރާތުން އެކަން ހުށަހަޅުއްވާނެކަންވެސް މުއިއްޒު ވަނީ ފާހަގަ ކުރައްވާފައެވެ.
މުއިއްޒު އެހެން ވިދާޅުވެފައިވާއިރު، މި ސަރުކާރުގެ ވިސްނުމަކީ ބައިނަލްއަގުވާމީ ފެންވަރުގެ ޒަމާނީ ބަނދަރެއް ގުޅިފަޅުގައި ތަރައްގީ ކުރުން ކަމަށް މިނިސްޓްރީ އޮފް އިކޮނޮމިކް ޑިވޮލޮޕްމަންޓުން ވަނީ ބުނެފައެވެ. އެގޮތުން މާލޭގެ ވިޔަފާރި ބަނދަރުގެ ޖާގައިގެ ދަތިކަމުގެ ސަބަބުން ވަރަށް ގިނަ ދަތިތަކެއް ރާއްޖެއަށް މުދާ އެތެރެކުރާ ފަރާތްތަކުން އަދި ވިޔަފާރިވެރިން ތަޖުރިބާ ކުރަމުންދާ ކަމަށާއި، ސަރުކާރުގެ ވިސްނުމަކީ މި ދަތިތަކަށް ލުޔެއް ހޯދައިދީ ރާއްޖެއަށް ބޭނުންވާ ފެންވަރުގެ ޒަމާނީ ބަނދަރެއް ގުޅިފަޅުގައި ތަރައްޤީގީ ކުރުން ކަމަށް ސަރުކާރުން ވަނީ ހާމަކޮށްފައެވެ. އަދި އެކަމާ ގުޅޭ މަސައްކަތްތައްވެސް ސަރުކާރުން ވަނީ ފަށާފައެވެ.
