އިންޑިޔާގެ ވެކްސިން އެހެން ގައުމުތަކަށް ފޯރުކޮށްދެވޭ ވަރުވާނީ އޮކްޓޯބަރުގެ ފަހުން

އިންޑިޔާގެ ކޮވިޑް ވެކްސިން އެހެން ގައުމުތަކަށް އޮކްޓޯބަރު މަހުގެ ކުރިން ފޯރުކޮށްދެވުމަކީ ވަރަށް ނާދިރުކަމެއްކަމަށް އިންޑިޔާ ސަރުކާރުގެ ތިން ފަރާތަކާ ހަވާލާދީ ރޮއިޓަރސްއިން ބުނެފިއެވެ.

އިންޑިޔާއަކީ މުޅި ދުނިޔެއަށް ކޮވިޑް ވެކްސިން ހަމަހަމަކަމާއެކު ފޯރުކޮށްދިނުމަށް އެކުލަވާލާފައިވާ ކޮވެކްސް ފެސިލިޓީއަށް ގިނަ އަދަދަކަށް ވެކްސިން ފޯރުކޮށްދެމުން އައި ގައުމެކެވެ. ނަމަވެސް އިންޑިޔާގައި ކޮވިޑްގެ ހާލަތު އިންތިހާއަށް ގޯސްވަމުންދިޔުމާއެކު އެގައުމުން ވަނީ އެހެން ގައުމުތަކަށް ވެކްސިން ފޯރުކޮށްދިނުން މެދުކަނޑާލާފައެވެ.

އިންޑިޔާއިން މީގެ މަހެއްހާ ދުވަސް ކުރިން އެހެން ގައުމުތަކަށް ވެކްސިން ފޯރުކޮށްދިނުން މެދުކަނޑާލުމާ ހަމައަށް 66 މިިއަން ޑޯޒަށްވުރެ ގިނަ ޑޯޒް ފޯރުކޮށްދީފައިވެއެވެ. އިންޑިޔާއިން ވެކްސިން ފޯރުކޮށްދިނުން މެދުކަނޑާލުމާއެކު ބަންގްލަދޭޝް، ނޭޕާލް ، ސްރީލަންކާ އަދި އެފްރިކާ ސަރަހައްދުގެ ގިނަ ގައުމުތަކަށް ވަނީ އެހެން ވެކްސިން ހޯދުމަށް މަޖުބޫރުވެފައެވެ.

ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)އިން ވަނީ އިންޑިޔާ ނޫން އެހެން ގައުމުތަކުން ކޮވެކްސް ފެސިލިޓީއަށް މިހާރު ދެމުންދާ ވެކްސިނަށްވުރެ ގިނައިން ފޯރުކޮށްދިނުމަށް އެދިފައެވެ.

ނަން ހާމަނުކުރުމަށް އެދި އިންޑިޔާގެ އޮފިޝަލަކު ރޮއިޓަރސް އާ ވާހަކަދައްކަމުން ބުނެފައިވަނީ އިންޑިޔާއިން މިހާރު އެންމެ ބޮޑަށް އިސްކަމެއްދެނީ އެގައުމުގައި ވެކްސިން ދިނުމުގެ ޕްރޮގްރާމް ފުޅާކޮށް ހަލުވި ކުރުމަށް ކަމުގައެވެ.

އެހެން ގައުމުތަކަށް އިންޑިޔާއިން މިދަނޑިވަޅުގައި ވެކްސިން ފޯރުކޮށްދޭނެތޯ އިންޑިޔާގެ ތެރޭގައި މިހާރު އަންނަނީ މަޝްވަރާކުރެވެމުން ކަމަށް ރޮއިޓަރސް އިން ބުނެއެވެ. އަދި ބައެއް ގައުމުތަކަށް ކުރިން އިންޑިޔާއިން ވެކްސިން ފޯރުކޮށްދޭނެކަމަށް ބުނެފައިވާ ބުނުމާ އެއްގޮތަށް ދެން ވެކްސިން ފޯރުކޮށްދިނުން ފުރިހަމަވާނެ ކަމަށް ނުނިންމުމަށް އެދިފައިވާކަމަށްވެސް ވަނީ ބުނެފައެވެ. ވެކްސިން ފޯރުކޮށްދިނުން ލަސްވާނެ ގައުމުތައް އޮފިޝަލް ހާމަކޮށްފައެއްނުވެއެވެ.

އެހެން ދެ އޮފިޝަލަކާ ހަވާލާދީ ރޮއިޓަރސް އިން ރިޕޯޓްކޮށްފައިވަނީ އިންޑިޔާއަށް އެހެން ގައުމުތަކަށް ވެކްސިން ފޯރުކޮށްދެވޭނެ ތާރީޚެއް ބިނާވާނީ އެގައުމުގައި ކޮވިޑްގެ ހާލަތު ރަނގަޅުވަމުން އަންނަ އަވަސް ލަސްމިނަށެވެ.

އިންޑިޔާއިން އެހެން ގައުމުތަކަށް ވެކްސިން ފޯރުކޮށްދިނުމާމެދު މިހާރު ގެންގުޅޭ ސިޔާސަތުތަކާއި ގުޅޭގޮތުން އެގައުމުގެ އެކްސްޓަރނަލް އެފެއަރޒް މިނިސްޓްރީގެ ބަހެއް ލިބިފައިނުވާކަމަށް ރޮއިޓަރސް އިން ބުނެއެވެ.

އިންޑިޔާގައި އެންމެފުޅާ ދާއިރާއެއްގައި ވެކްސިން އުފައްދަމުން އަންނަ ސެރަމް އިންސްޓިޓިއުޓްގެ ސްޕޯކްސްމަން ބުނެފައިވަނީ މިހާރު އެންމެ ބޮޑު އިސްކަމެއް ދެނީ އިންޑިޔާއަށް ވެކްސިން ފޯރުކޮށްދިނުމަށް ކަމަށެވެ. އެހެން ގައުމުތަކަށް ވެކްސިން އެންމެ އަވަހަށްވެސް ފޯރުކޮށްދޭން ފެށޭވަރުވާނީ ޖޫން މަހުގައި ކަމަށް ވަނީ ބުނެފައެވެ.

އޮކްޓޯބަރު ގެ ފަހުން އިންޑިޔާއަށް ކޮވެކްސް ފެސިލިޓީގެ ދަށުން ވެކްސިން ފޯރުކޮށްދިނުމާއި ގުޅޭގޮތުން އެފެސިލިޓީ ހިންގުމުގައި އެންމެ އިސްކޮށް ހަރަކާތްތެރިވާ ގަވީން ބުނެފައިވަނީ މެއި މަސް ނިމޭއިރު ސެރަމް އިންސްޓިޓިއުޓުން 140 މިލިއަން ޑޯޒް އެފެސިލިޓީއަށް ފޯރުކޮށްދޭންޖެހޭނެ ކަމަށެވެ.

ކޮވެކްސް އިން ސެރަމް އާއެކު ހަދާފައިވާ އެއްބަސްވުމުގެ ދަށުން 1.1 ބިލިއަން ޑޯޒް ސެރަމް އިން އެފެސިލިޓީއަށް ފޯރުކޮށްދޭންޖެހެއެވެ.

ޖޫން މަސް ނިމޭއިރު ކޮވެކްސް ފެސިލިޓީގެ ދަށުން ފޯރުކޮށްދޭންޖެހޭ ވެކްސިންގެ 190 މިލިއަން ޑޯޒްގެ މަދުވުމެއް އުޅޭކަމަށް ޔުނިސެފުން ވަނީ ބުނެފައެވެ.