ހަރުކަށި ފިކުރު ފަތުރާ "ބޮޑެއް" ކަމަށް ބުނެ ހައްޔަރުކުރި މީހާގެ ބަންދަށް 15 ދުވަސް ޖަހައިފިއެވެ.

ހަރުކަށި ފިކުރު ފެތުރުމުގަައި އިސްކޮށް ހަރަކާތްތެރިވާ މީހެއްކަމަށް ތުހުމަތުކުރެވޭ މީހަކު ފުލުހުން ހައްޔަރުކޮށްފައިވަނީ 18 މެއި 2021 ވީ އަަންގާރު ދުވަހުގެރެއެވެ.

ފުލުހުން ހާމަކުރިގޮތުގައި އެ މީހާ ހައްޔަރުކޮށްފައިވަނީ އަންގާރަ ދުވަހުގެ ދުވަހުގެ ރޭ މާލެއިންނެވެ. ހައްޔަރުކޮށްފައިވަނީ ހަރުކަށި ފިކުރު ފެތުރުމުގަައި އިސްކޮށް ހަރަކާތްތެރިވާ މީހެއްކަމަށް ތުހުމަތުކުރެވޭ 49 އަހަރުގެ ދިވެހި ފިރިހެނެއްކަމަށް ފުލުހުން މައުލޫމާތުދެއެވެ. މިކަމާއި ގުޅޭ އިތުރު އެއްވެސް ތަފްސީލެއް ފުލުހުން ހިއްސާކޮށްފައެއް ނުވެއެވެ.

ރާއްޖެއެމްވީއަށް އެނގިފައިވާގޮތުގައި ހަރުކަށި ފިކުރު ފަތުރާ "ބޮޑެއް" ކަމަށް ބުނެ ހައްޔަރުކުރީ އއ. ހިމަންދޫގައި 2007 ވަނަ އަހަރު ހިންގި ހަމަނުޖެހުމާ ގުޅިގެން މީގެ ކުރިން ޖަލަށްލާފައިވާ އުމުރުން 43 އަހަރުގެ އަބްދުﷲ އަލިމަނިކެވެ. ކުރިމިނަލް ކޯޓަށް އަބްދުﷲ އަލިމަނިކު ހާޒިރުކުރުމުން އޭނާގެ ބަންދަށް ވަނީ 15 ދުވަސް ޖަހާފައެވެ.

ހަރުކަށި ފިކުރު ފެތުރުމުގަައި އިސްކޮށް ހަރަކާތްތެރިވާ މީހެއްކަމަށް ތުހުމަތުކުރެވޭ މީހަކު ހައްޔަރުކޮށްފައިވާއިރު، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް މެއި 6 ވަނަ ދުވަހުގެ ރޭ ދިން ނިރުބަވެރި ހަމަލައާ ގުޅިގެން މާލެއާއި ރާއްޖޭގެ އެކި ސަރަހައްދުތަކުގައި ސިފައިން ހަތިޔާރާއެކު ހަރަކާތްތެރިވާން ވަނީ ފަށާފައެވެ.

އެމްއެންޑީއެފުން ވަނީ ހަތިޔާރާއެކު ސިފައިން ރާއްޖޭގެ އެކި ކަންކޮޅުތަކުގައި ހަރަކާތްތެރިވަމުންދާކަން ހާމަކޮށްފައެވެ. އެމްއެންޑީއެފުން ބުނެފައިވަނީ، ރައީސް ނަޝީދަށް ދިން ހަމަލާއާއި ގުޅިގެން މާލެ ސަރަހައްދުގެ އިތުރުން ރާއްޖޭގެ އެކި ކަންކޮޅުތަކުގެ ސަލާމަތީކަންކަން ވަރުގަދަކޮށްފައިވާކަމަށެވެ. އަދި އެތަން ތަނުގައި ހަތިޔާރާއެކު ސިފައިން ހަރަކާތްތެރިވަމުން ގެންދާނެކަމަށްވެސް ވަނީ ބުނެފައެވެ. މި ހަމަލާއާ ގުޅިގެން މިހާތަނަށް 3 މީހަކު ހައްޔަރުކޮށްފައިވާއިރު، ގޮއްވާލި ބޮމާއި ގުޅޭ އިތުރު ކަންތައްތަކެއް ދެނެގަތުމުގެ މަސައްކަތް ސިފައިންނާއި ގުޅިގެން ފުލުހުންވެސް ދަނީ ކުރަމުންނެވެ.