އޭއެފްސީ ކަޕުގެ މެޗުތައް ހޯސްޓްކުރަން އަލުން ހުޅުވާލަނީ

އޭއެފްސީ ކަޕުގެ ދެކުނު އޭޝިއާގެ ޓީމުތަކުގެ ގްރޫޕުގެ މެޗުތައް ހޯސްޓްކުރުން އަލުން ހުޅުވާލަން އޭއެފްސީން ނިންމާފައިވާ ކަމަށް ރިޕޯޓުތައް ބުނެފިއެވެ.

މީގެ ކުރިން ރާއްޖެއިން ވަނީ މި މުބާރާތުގެ ގްރޫޕް ޑީގެ މެޗުތައް ހޯސްޓްކުރުމުގެ ބިޑް ކާމިޔާބުކޮށްފައެވެ. އެ ފަހަރު ރާއްޖެއިން ބިޑް ކާމިޔާބުކުރީ އިންޑިއާއާ ވާދަކުރުމަށްފަހުއެވެ. އެއާއެކު އޭއެފްސީން މީގެ ކުރިން ތާވަލުކޮށްފައި އޮތީ މި މަހުގެ 11 ވަނަ ދުވަހު އޭއެފްސީ ކަޕުގެ ކޮލިފައިން ޕްލޭއޮފުގައި ރާއްޖޭގެ ކުލަބު އީގަލްސް އާއި އިންޑިއާގެ ބެންގަލޫރު އެފްސީ ބައްދަލުކުރާ ގޮތަށެވެ. އަދި އެ މެޗަށްފަހު މުބާރާތުގެ ދެކުނު އޭޝިއާ ގްރޫޕުގެ މެޗުތައް މި މަހުގެ 14 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށް ރާއްޖޭގައި ބޭއްވުމަށް އޮތީ ތާވަލުކޮށްފައެވެ.

އެކަމަކު އޭއެފްސީ ކަޕުގެ މައްސަލަ ހޫނުވީ ޕްލޭއޮފް މެޗުގައި އީގަލްސްއާ ދެކޮޅަށް ކުޅެން މާލެއައި ބެންގަލޫރު ޓީމުން ކޮވިޑް-19 ގެ އުސޫލުތަކާ ޚިލާފުވުމުންނެވެ. އެ މައްސަލައިގައި އޭއެފްސީ ކަޕުގެ މެޗުތައް ރާއްޖޭގައި ނުބޭއްވޭނެކަން އެންގުމާއެކު، އޭއެފްސީން ވަނީ ޕްލޭއޮފް މެޗާއި ގްރޫޕް ޑީގެ މެޗުތައް މުއްދަތެއް ނެތް ގޮތަށް ފަސްކޮށްފައެވެ.

ރިޕޯޓުތައް ބުނާ ގޮތުން އޭއެފްސީން މިހާރު މަސައްކަތްކުރަމުން އަންނަނީ ޕްލޭއޮފް މެޗާއި ގްރޫޕް ސްޓޭޖުގެ މެޗުތައް އަންނަ ޖޫން މަހުގެ ފަހު ކޮޅު ފެށުމަށެވެ. އަދި ގްރޫޕް ޑީގެ މެޗުތައް ހޯސްޓްކުރުން އަލުން ހުޅުވާލާނެ ކަމަށްވެސް ވަނީ ރިޕޯޓުކޮށްފައެވެ. "ރާއްޖެ.އެމްވީ" އަށް މައުލޫމާތު ދެއްވަމުން އެފްއޭއެމުގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ވިދާޅުވީ ގްރޫޕް ސްޓޭޖުގެ މެޗުތައް ހޯސްޓްކުރުން އަލުން ހުޅުވާލައިފިނަމަ، ރާއްޖެއިން އަލުން ބިޑް ކުރުމާމެދު ގޮތެއް ނިންމާނީ މަޝްވަރާކުރުމަށްފަހު ކަމަށެވެ. ރިޕޯޓުތައް ބުނާ ގޮތުން އަލުން ބިޑަށް ހުޅުވާލައިފިނަމަ ބަންގްލަދޭޝް އާއި އިންޑިއާއިން އޮތީ މުބާރާތުގެ މެޗުތައް ހޯސްޓްކުރުމަށް ބިޑްކުރަން ތައްޔާރަށެވެ.

ބެންގަލޫރުގެ މައްސަލައިގައި އޭއެފްސީ ކަޕުގެ މެޗުތައް ފަސްކުރިއިރު، މި މައްސަލައިގައި އެފްއޭއެމުން ވަނީ ބެންގަލޫރާ މެދު ފިޔަވަޅު އަޅައިދޭން އޭއެފްސީއަށް ހުށަހަޅާފައެވެ. އަދި ދާދި ފަހުން ރާއްޖެ ޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން އެފްއޭއެމުގެ ރައީސް ބައްސާމް އަދީލް ޖަލީލް ވަނީ އޭއެފްސީ ކަޕް ފަސްކުރި މައްސަލައިގައި ރާއްޖެއަށް އަދަބެއް އައުން ގާތް ކަމަށް ވިދާޅުވެފައެވެ. އެގޮތުން މާޒީގައި ކަންތައްތައް ދިމާވެފައި ހުރި ގޮތަށް ބަލާއިރު، ރާއްޖެއަށް އޭއެފްސީން އަޅަން އޮތީ ދެ ފިޔަވަޅެއް ކަމަށާއި، އެއީ ޖޫރިމަނާ ކުރުން ނޫނީ އޭއެފްސީގެ މެޗުތައް ހޯސްޓްކުރުމުގެ ފުރުސަތު ވަކި މުއްދަތެއް ވަންދެން ރާއްޖެއަށް ނުދޭން ނިންމުން ކަމަށް ވެސް ބައްސާމް ވަނީ ވިދާޅުވެފައެވެ.

އަންނަ މަހުގެ ފަހުކޮޅު އޭއެފްސީ ކަޕުގެ މެޗުތައް ކުޅޭނެ ކަމަށް ބެލެވޭއިރު، ރިޕޯޓުތައް ބުނާ ގޮތުން ޕްލޭއޮފުގައި އީގަލްސް އާއި ބެންގަލޫރު ބައްދަލުކުރާ މެޗު ކުޅޭނީ އަންނަ މަހުގެ 27 ވަނަ ދުވަހުއެވެ. އަދި އެއަށްފަހު ގްރޫޕް ސްޓޭޖުގެ މެޗުތައް ކުޅޭނީ އަންނަ މަހުގެ 30 ވަނަ ދުވަހުން ފެށިގެން ޖުލައި މަހުގެ ހަވަނަ ދުވަހުގެ ނިޔަލަށެވެ. އޭއެފްސީ ކަޕުގެ ގްރޫޕް ސްޓޭޖުގައި މި ވަގުތު އޮތީ ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނާއި، އިންޑިއާގެ މޯހަން ބަގާން އަދި ބަންގްލަދޭޝްގެ ބަޝުންދަރާ ކިންގްސްއެވެ.