ހުޅުދެލި ބަނދަރު ތަރައްގީކުރުމަށް ބޭނުންވާ ބޮޑުހިލައިގެ ދެވަނަ ޝިޕްމެންޓް ގެންގޮސްފި
ބާރު ސްޕީޑްގައި މަސައްކަތް ކުރިއަށްދާ ކަމަށް އެމްޓީސީސީން ބުނޭ
ދ. ހުޅުދެލީ ބަނދަރު ތަރައްގީކުރުމުގެ މަޝްރޫއު ކުރިއަށް ދަނީ
ދ. ހުޅުދެލީ ބަނދަރު ތަރައްގީކުރުމުގެ މަޝްރޫއުގެ ދަށުން، ބޭރުތޮށި ލުމަށް ބޭނުންވާ ބޮޑުހިލައިގެ ދެވަނަ ޝިޕްމެންޓް ޕްރޮޖެކްޓް ސައިޓަށް ގެންގޮސްފިއެވެ.
ހުޅުދެލީ ބަނދަރު ތަރައްގީކުރުމުގެ މަސައްކަތްތަކާ ބެހޭ ގޮތުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނީ 17 މެއި 2021 ވަނަ ދުވަހު، އެ ރަށު ބަނދަރު ތަރައްގީކުރުމަށް ބޭރުތޮށި ލުމަށް ބޭނުންވާ ބޮޑުހިލައިގެ ދެވަނަ ޝިޕްމެންޓް ސައިޓަށް ގެންގޮސްފައިވާ ކަމަށެވެ.
މި މަޝްރޫޢުގެ ދަށުން، 49،612 ކިއުބިކް މީޓަރުގެ ސަރަައްދެއްގެ ބަނދަރު ފުންކުރުމާއި، 432 މީޓަރުގެ ސަރަޙައްދެއްގައި އެއްގަމު ތޮށި ލުމާއެކު 337 މީޓަރުގެ ސަރަހައްދެއްގައި ބޭރު ތޮށިލުމާއި، 252 މީޓަރުގެ ސަރަހައްދެއްގައި ރިވެޓްމަންޓް ޖެހުން ހިމެނެއެވެ. އަދި މަގު ބައްތި ހަރުކުރުމާއި، 1،645 އަކަ މީޓަރު ސަރަޙައްދެއްގައި ޕޭވްމަންޓް ހެދުމަށް ވެސް ނިންމާފައިވެއެވެ. މި މަޝްރޫއުއަކީ 39.8 މިލިއަން ރުފިޔާގެ މަޝްރޫއެކެވެ.
މަސައްކަތް ނިންމުމަށް ކަނޑައަޅާފައިވާ ތަރީޚުގައި ނިމޭނެ ކަމަށާއި، ބާރު ސްޕީޑްގައި މަސައްކަތް ކުރިއަށްދާ ކަމަށް އެމްޓީސީސީން ބުނެއެވެ. ބަނދަރުގެ މަސައްކަތް ނިމުމާއެކު އެރަށަށް ދިމާވެފައިވާ ލަފާފުރުގެ ދަތިކަމުގެ މައްސަލައަށް ހައްލު ލިބިގެން ދާނެއެވެ.
