ސިފައިންގެ އިމާރާތުގެ ބޮޑު ސްކްރީނުގައި ފަލަސްތީނުގެ ދިދަ
18 މެއި 2021 | އަންގާރަ 14:39ފަލަސްތީނުގެ ދިދަ އަޅުވާފައިވަނީ އަންގާރަ ދުވަހުގެ ހަވީރުގެ ވަގުތެއްގައި
ބަންޑާރަކޮށީގައި ހުރި ބޮޑު ސްކްރީނުގައި ފަލަސްތީނުގެ ދިދަ އަޅުވާފައި
އިސްރާއީލުގެ ޔަހޫދީން ފަލަސްތީނަށް ދެމުން ގެންދާ ހަމަލާތައް ކުށްވެރިކޮށް، ދިވެހިން ތިބީ ފަލަސްތީނާ އެކުގައިކަން ދެއްކުމަށް ސިފައިގެން އިމާރާތުގެ ބޮޑު ސްކްރީނުގައި ފަލަސްތީނުގެ ދިދަ އަޅުވައިފިއެވެ.
ބަންޑާރަކޮށީގައި ހުރި ބޮޑު ސްކްރީނުން ފަލަސްތީނުގެ ދިދަ އަޅުވާފައިވަނީ އަންގާރަ ދުވަހުގެ ހަވީރުގެ ވަގުތެއްގައެވެ. ސިފައިގެން އިމާރާތުގެ ބޮޑު ސްކްރީނުގައި ފަލަސްތީނުގެ ދިދަ އަޅުވާފައި މިވަނީ ގިނަ ދިވެހިން އެކަމަށް އެދި ގޮވަމުން ދަނިކޮށެވެ. ދިވެހިން ތިބީ ފަލަސްތީނާއެކުކަން ހާމަކޮށްދިނުމުގެ ގޮތުން ތަފާތު އެކި ހަރަކާތްތައް ކުރިއަށް ގެންދެއެވެ. އެގޮތުން ފަލަސްތީނުގެ ރައްޔިތުންނަށް އެހީވުމުގެ ގޮތުން ތަފާތު ހަރަކާތްތައް ވެސް ދަނީ ހިންގަމުންނެވެ.
މީގެ އިތުރުން އަންގާރަ ދުވަހު ހަވީރު މާލެސިޓީގައި ޚާއްސަ ހަރަކާތެއް ކުރިއަށް ގެންގޮސްފައިވެއެވެ. މި ހަރަކާތް ކުރިޔަށް ގެންގޮސްފައިވަނީ ބެލްކަނީތަކުންނާއި، ގޭ ދޮރުމަތިން ދިދަ ހިފައިގެން ތިބެއެވެ.
ޔަހޫދީ ސިފައިން ފަލަސްތީނުގެ ގާޒާއަށް ދެމުން ގެންދާ ހަމަލާތަކުގައި އެތައް އާއިލާއެއް ވަނީ ހާލުގައި ޖެހިފައެވެ. އެތައް ބަޔަކު ޝަހީދު ކޮށްލާފައިވާއިރު، މި ހަމަލާތަކުގައި އަނިޔާވެފައިވާ މީހުންގެ އަދަދު އެތައް ސަތޭކައަކަށް ކޮންމެ ދުވަހަކުވެސް އަރައެވެ. އިސްރާއީލުން ވަނީ ފަލަސްތީނަށް ދެމުން ގެންދާ ހަމަލާތައް ހުއްޓައިނުލާނެ ކަމަށް ބުނެފައެވެ. މެދުކެނޑުމެއްނެތި ގާޒާއަށް ވައިގެ މަގުންނާއި އެއްގަމު މަގުން އަދި ކަނޑު މަގުން ދެމުން ގެންދާ ހަމަލާތަކުން ސަލާމަތްވުމަށް ގެދޮރު ދޫކޮށްދާން ފަލަސްތީނުގެ އެތައް ލައްކަ ބަޔަކަށް ޖެހިފައިވާކަމަށް އދ.ން ވަނީ ބުނެފައެވެ.
